Esdras 8 - Ma Zhiklè

Ndohi Esdras

¹ Na haha tsuvom ndohai, ara verzi ta, ara verzi ta, man ta shkè te Babylone a verzi ga, te va man Artaherhes bai.

² Te verzi Phinées: Guershom. Te verzi Ithamar: Daniel. Te verzi David: Hatthush, kra Shecanya.

³ Te verzi Pareosh: Zacharie a gwoli na, ngurhi 150.

⁴ Te verzi Pachat-Moab: Eljoénai, kra Zerachja, a ngurhi 200 a nda nengaʼa.

⁵ Te verzi Zatthu: Shecania, kra Ichaziel, a ngurhi 300 a nda nengaʼa.

⁶ Te verzi Adin: Ebed, kra Jonathan, a ngurhi 50 a nda nengaʼa.

⁷ Te verzi Elam: Esaie, kra Athalie, a ngurhi 70 a nda nengaʼa.

⁸ Te verzi Shephathia: Zebadia, kra Micael, a ngurhi 80 a nda nengaʼa.

⁹ Te verzi Joab: Abdias, kra Jehiel, a ngurhi 218 a nda nengaʼa.

¹⁰ Te verzi Shelomith, kra Josiphia, a ngurhi 160 a nda nengaʼa.

¹¹ Te verzi Bébai: Zacharie, kra Bébai, a ngurhi 28 a nda nengaʼa.

¹² Te verzi Azgad: Jochanan, kra Hakkathan, a ngurhi 110 a nda nengaʼa.

¹³ Te verzi Adonikam, ntabawhai, nzlembaɗ ta a haha: Eliphéleth. Jeiel a Shemaeja, a ngurhi 60 a nda tengaʼa.

¹⁴ Te verzi Bigvai: Uthai a Zabbud, a ngurhi 70 a nda tengaʼa.

Esdras a ɓic ta ndohai

¹⁵ I ɓic ta ndohi haha a ma woyam man a hi a Ahava, a nga nza a pa mʼmèn 3. Aman i rka ta ndohai a ndohi mvi skwi a Zhiklè, i ngatsa ndohi Lévi te va tengaʼa ɓai.

¹⁶ A i zlündo ndo a sam Eliézer, a Ariel, a Shemaeja, a Elnathan, a Jarib, a Nathan, a Zacharie, a Meshullam, tsuvomhai; a Jojarib a Elnathan, ndohi maya;

¹⁷ a i njè ta ma a gèɗ a géɗ Iddo, tsuvomaʼa te kokwar Casiphia, a i gaɗa ta ma man ta da menda na Iddo a kramamhi nengaʼa, ndohi ntil gi Zhiklè te kokwar Casiphia. I dzhoɗo aman ta zlündoko nga ndohi mizlinè a gi Zhiklè nga.

¹⁸ Zhiklè nga a ntakaha nga a ri nengaʼa man amba, a mva nga ndo man maya na zhè staɗ te va wudahi Machli, kra Lévi, te verzi Israel: Shérébia. A nda wudahi na, a kramamhi na, tèlèba ndohi 18.

¹⁹ Te va wudahi Merari, Hashabia a Esaie, a nda kramamhi na a wudahi na, tèlèba 20.

²⁰ Te va ndohi Néthin, man David a tsuvom ndohai ta pe ta a mizlinè ndohi Lévi, ndohi 220, man ta baha ta staɗ staɗ tèlèba a nzlembaɗ ta.

Ndè a deɓa a Jérusalem

²¹ Te pa, te wud woyam Ahava, i boho aman ta jèkeda skwi nʼndai, a nga manda gèɗ a hi a sam Zhiklè nga, a nga tsi rai, aman a til civèɗ a ma nga, a géɗ wudahi nga a kolongwi nga tèlèba.

²² Aman i da dzhoɗo bai aman bi a va nga nhèyè-va sojè a ndohi plèsh, aman ta takaha nga a sam mayamhi nga a civèɗ ar horai. A vava nga gaɗa na bai: Zhiklè nga a takaha ta ndohi tèlèba man ta woyaʼa a ri na man amba; aman a gi ndzoan, a ga ta wuɗai a ndohi tèlèba man ta jèkeda.

²³ A nga jèkeda skwi nʼndai, a nga tsu ri Zhiklè a géɗ skwi haha, a nengaʼa a ntsena ma nga.

²⁴ Te deɓaʼa i par ta 12 te va tsuvom ndohi mvi skwi a Zhiklè: Shérébia, Hashabia a kramamhi tengaʼa 10 a nda tengaʼa.

²⁵ I liva ta verzhègenè a guro a kolongwai, man bai a ndohi ncèmma nengaʼa a tsuvomhi nengaʼa a ndohi Israel tèlèba man ta zhè a pa, ta vau a géɗ gi Zhiklè nga.

²⁶ I lüvo a ri tengaʼa: Suli 650.000; kolongwi verzhègenè te di 100.000; guro te di 100.000;

²⁷ kokwi guro 20 te di 1.000, 1.000; kokwi züdo man guro te maʼa cèw, mbelaʼa ara guro.

²⁸ A i gaɗa ta: Kinè ndohi Ndo nzi pèc pècèk nkezlaʼa. Kolongwi haha, kolongwi nkezlaʼa. Suli haha a guro haha, skwi man ta tsokolo ncèkèlè a Ndo nzi pèc pècèk, Zhiklè babhi kinè.

²⁹ Va-gu maya, va-ɓüro, ha kin livè a sam di tsuvom ndohi mvi skwi a Zhiklè a ndohi Lévi a tsuvom ndohi Israel te Jérusalem, te gala gi Zhiklè.

³⁰ Te deɓaʼa ndohi mvi skwi a Zhiklè a ndohi Lévi ta co skwi man ta lüvo, verzhègenè a guro a kolongwai, a ta daʼa a Jérusalem, a gi Zhiklè nga.

³¹ A nga jèkeda woyam Ahava, te ki nshèlèkuraʼa, mʼmèn 12, aman nga dè a kokwar Jérusalem. Zhiklè nga a ntakaha nga a ri nengaʼa, a mɓer nga te ri mayamhi nga, te ri metsarhi a civèɗ.

³² A nga ndika a kokwar Jérusalem, a nga sok va te pa mʼmèn makar.

³³ Te mʼmèn mafadaʼa, nga lüvo verzhègenè, guro a kolongwai te gi Zhiklè nga, a nga pa ta a ri Meré-moth, kra Urie, ndo mvi skwi a Zhiklè, a Eléazar, kra Phinées a Jozabad, kra Jo-sué, a Noadia, kra Binnui, ndohi Lévi.

³⁴ Ta ngur tèlèba, ta lüvo tèlèba, a ta winda tèlèba.

³⁵ A pats nasa, ndohi man ta shkè a deɓa te ɓèlè, man ta menkada deɓa a kokwar ta, ta va na skwi a Zhiklè, a ta ndara na skwi a Zhiklè Israel: mari 12 a géɗ Israel tèlèba, drokhi 96, wud tambakihi 77, mazawalhi 12 a géɗ malai. Tèlèba skwi man ta ndara na Ndo nzi pèc pècèk.

³⁶ Te deɓaʼa ta ngra ta ma bai a bigolahi bai, a ngomnahai te wud woyam, a ta takaha ta ndohi a sam mizlinè gi Zhiklè.