Esdras 7 - Ma Zhiklè

Esdras a ɓir Jérusalem

¹ Te deɓ nengaʼa, aman Artaherhes bi Perse, Esdras a mshkè, kra Seraja, te verzi Azaria, te verzi Hilkija,

² te verzi Shallum, te verzi Tsadok, te verzi Achithub,

³ te verzi Amaria, te verzi Azarja, te verzi Merajoth,

⁴ te verzi Zerachja, te verzi Uzzi, te verzi Bukki,

⁵ te verzi Abishua, te verzi Phinées, te verzi Elèazar, kra Aaron, ndo mvi skwi a Zhiklè.

⁶ Esdras haha a mshkè te Babylone. Nengaʼa ndo mwindè ɗèlèwèr, man a sun ma kita Moise, man Ndo nzi pèc pècèk, Zhiklè Israel, a mvau. A Ndo nzi pèc pècèk, Zhiklè nengaʼa, a takaha a ri na, a bai a mva na skwi tèlèba man a woyaʼa.

⁷ Te va man Artaherhes bai, te mvi matsaraɗaʼa, ndohi Israel ngiɗè ta shkè Jérusalem a vaʼa, te va ndohi mvi skwi a Zhiklè, ndohi Lévi, ndohi nfi dimèsh, ndohi mɓer ntamagai, ndohi ntil gi Zhiklè.

⁸ Esdras a nʼndika a kokwar Jérusalem te ki mazlamaʼa; bai a ngu bi te mvi matsaraɗaʼa.

⁹ Esdras a njèkeda Babylone te ki nshèlèkuraʼa, a pats nshèlèkuraʼa, a nʼndika a kokwar Jérusalem te ki mazlamaʼa, mʼmèn 5, te man Zhiklè a ntakaha a ri na man amba.

¹⁰ Esdras a nfu gèɗ a vna, a nwuzhè ma kita Ndo nzi pèc pècèk, a njèjèrèʼa, a nslebda ta ndohi Israel ma kita a ma nkwèr Zhiklè.

Ɗèlèwèr Artaherhes a sam Esdras

¹¹ Na haha ɗèlèwèr man bi Artaherhes a mva na Esdras, ndo mvi skwi a Zhiklè, ndo ɗèlèwèr, man a slebda ta ndohi Israel ma man Ndo nzi pèc pècèk a mva ta te ma kita nengaʼa.

¹² Artaherhes, bi mbiaʼa, a sam Esdras, ndo mvi skwi a Zhiklè, ndo man a sun ma kita Zhiklè te zhiklè te géɗèʼa…

¹³ I goɗ a ma bai, aman ta va ta civèɗ a ndohi Israel te kokwar bi ga tèlèba, man ta woy a ta dè Jérusalem a verzi ngaya, a ndohi mvi skwi a Zhiklè tengaʼa, a ndohi Lévi.

¹⁴ Bai a nzlinde ka, a ndohi ncèmma nengaʼa tsaraɗ, aman kin jénjèrè te Juda, te Jérusalem, ara man ma kita Zhiklè man a zhè te ri ngaya, a goɗa;

¹⁵ a ka da ta verzhègenè a guro man bai a ndohi ncèmma nengaʼa ta va na Zhiklè Israel, man gi nengaʼa a zhè te Jérusalem;

¹⁶ a verzhègenè a guro man ka ngècè te ri ndohi Babylone tèlèba; a skwi man ndohai a ndohi mvi skwi a Zhiklè tatsokolo ncèkèlè a géɗ gi Zhiklè tengaʼa man a zhè te Jérusalem;

¹⁷ ka da shum marai, a drokihi, a wud tambakihi, a skwi nʼndi, a skwi nsi, a vna, a ka daʼa a sam mvi skwi a Zhiklè te gi Zhiklè kinè te Jérusalem.

¹⁸ A njèkèɗi verzhègenè a guro, kinè a kramamhi kinè, va-gau ara man ambaha Zhiklè kinè, ara man Zhiklè a woyaʼa.

¹⁹ Kolongwi man ta da va ka a géɗ gi Zhiklè ngaya, fedahi a sam Zhiklè te Jérusalem.

²⁰ Skwi ngiɗè man a woya a zhè a géɗ ntil gi Zhiklè ngaya, sèi ka da shumaʼa a skwi mèshèlè a Suli bai.

²¹ Iyè, bi Artaherhes, i gaɗa ta ndohi mɓer skwi mèshèlè te wud woyam tèlèba, a ta vi skwi tèlèba man Esdras, ndo mvi skwi a Zhiklè, ndo ɗèlèwèr ma kita Zhiklè te zhiklè te géɗèʼa, a dzhaɗ kinè:

²² ko Suli gozhem tèmèrè dau bho 100, barassa duzlakhi 100, mbar gongong 100, a boma ara man a woyaʼa.

²³ Ko skwi mèmè man Zhiklè te zhiklè te géɗèʼa a ngoɗa, da gau te gi Zhiklè nengaʼa, a kita ndzoan a shkè a géɗ kok war-bai, a géɗ bai a wudahi nengaʼa, asaɓai.

²⁴ A géɗ ndohi mvi skwi a Zhiklè tèlèba, a ndohi Lévi, a ndohi nfi dimèsh, a ndohi mɓer ntamagai, a ndohi ntil gi Zhiklè, i gaɗa kinè: sèi kin jhèɗè budu a duak te ri ta azɓai, a kin cèkèlè skwi a sam ta azɓai.

²⁵ Ka, Esdras, a maya man Zhiklè ngaya a va ka, pu ndohi kita a ndohi mbèzl kita man ta gi kita a ndohi tèlèba te wud woyam, ta tèlèba man ta sun ma kita Zhiklè ngaya. Ko wawa man a sun ɓai, ka senda na.

²⁶ Ndo man a jèjèr ma kita Zhiklè ngaya azɓai, a gi ara ma kita bi azɓai, sèi ta ga na kita mwuɗitpa a gèɗ: gar ta keɗaʼa, gar ta dzamdauda te kokwar, gar a pil gèɗ, gar a dè dangai. Esdras a gaɗa:

²⁷ I shid gèɗ a Ndo nzi pèc pècèk, Zhiklè babhi nga, aman a ngra na bai te ndav na, aman a njèl gi Ndo nzi pèc pècèk man a zhè te Jérusalem;

²⁸ aman a mvay pombai a sam di bai, a sam ndohi ncèmma nengaʼa, a sam tsuvomhi bi tèlèba, a sam mbibihiaʼa, a i ngots wuɗai, a géɗ man Ndo nzi pèc pècèk, Zhiklè ga, a ntaka-hayè a ri na, a i ɓic ta tsuvom ndohi Israel, aman ta dè a verzi ga.