Esdras 6 - Ma Zhiklè

Ɗèlèwèr Darius

¹ Te deɓaʼa bi Darius a ngoɗ aman ta wèrè te gi mèshèlè, a sam man ta peda ɗèlèwèr a pa te Babylone.

² A ta ngots te gi bi Achmetha, te kokwar Médie, ɗèlèwèr staɗ man ta Windo ma haha, aman a da pca ta a gèɗ azɓai.

³ Aman Cyrus bai, te mvi nshèlèku-raʼa, bi Cyrus a ngoɗa aman ta rèm gi Zhiklè te Jérusalem zaʼa. Sèi ta rèm gai, a sam mvi skwi a Zhiklè, zaʼa. Njüv na a tsi ri 60, nguzloh na a tsi ri 60.

⁴ Ta pi nda-deɓaʼa makar, mafaɗaʼa a wof; bai a pilè te gozhèm na.

⁵ Kolongwi gi Zhiklè, guro a verzhègenè, man Nebucadnetsar a mhulkoɗauda te gi Zhiklè te Jérusalem, a ndaʼa a Babylone, sèi ta vi a deɓa a gi Zhiklè te Jérusalem, a ta pedahi a sam nhalaʼa te gi Zhiklè.

⁶ A bi Darius a ngod ma nengaʼa: Anai, kine Thathnai, bigol bai te wud woyam, Shethar-Boznai, a mandalahi kinè, gwoli Apharsac, te wud woyam: va-jèkeda samaʼa!

⁷ Sèi ta rèm gi Zhiklè. Zorobabel, ngomna te Juda, a ndohi Juif nhalaʼa da rom gi Zhiklè a sam nshèlèkuraʼa.

⁸ I va kinè ma bai a géɗ skwi man kin ga ta ndohi Juif nhalaʼa haha man ta rèm gi Zhiklè: te va skwi bai man a ngots te Suli budu ndohi te wud woyam, sèi ta va ta skwi ntul ndohi haha, a ndohi ta slaha ta gi mi-zlinè a ta nzi a hi azɓai.

⁹ A skwi man ta ndara na Zhiklè te zhiklè te géɗèʼa: marai, drok, wud tambak, dau, boma, barassa, mbar, ara man ndohi mvi skwi a Zhiklè te Jérusalem ta ngra ta, sèi ta va ta a nciɗ sam a nciɗ sam ndèzl, skwi nhtsaʼa ka ɓai,

¹⁰ a ta slaha ta ndara na skwi a Zhiklè te zhiklè te gèɗèʼa, aman ambaha, a ta tsi ri a géɗ nshèffè bai a wudahi nengaʼa.

¹¹ Ko wawa man a gi mèdègèɗ a ma bi haha, sèi ta cè wof staɗ te gi na a ta dzawda a pa, a mʼmets na a pa, a gi nengaʼa a ndi na a dikai.

¹² Zhiklè man nzlembaɗ nengaʼa a nzi a pa a sam haha, da kalda bi staɗ staɗ tèlèba auda te bai, da gedassa ndohi tèlèba man ta gi maya a ta gi mèdègèd a sam ma bi haha a ta woy a ta gedassa gi Zhiklè te Jérusalem. Iyè, Darius, i goɗ ma haha. Sèi ta gi arsa ndèzl zura-zuraʼa!

Ngolala mwin gi Zhiklè

¹³ Thathnai, bigol bai te wud woyam, Shethar-Boznai a mandalahi nengaʼa ta gu zuraʼa ara man bi Darius a mwinda ta.

¹⁴ A ndohi Juifs nhalaʼa ta gu gai, amba amba, ara man Aggée a Zacharie, kra Iddo, ndohi nhadka ma, ta hodko ma. Ta rom gai a ta rufaʼa, ara man Zhiklè Israel a goɗa, ara man Cyrus a Darius a Artaherhes, bi Perse, ta goɗ a ma bi ta.

¹⁵ A ta rufa gi haha te ki Adar, mʼmèn makar, man Darius bai te mvi mamokwaʼa.

¹⁶ Ndohi Israel, ndohi mvi skwi a Zhiklè, ndohi Lévi a njèkèɗi ndohi man ta menkada deɓa te ɓèlè, ta gu ngolala mwi-nè gi Zhiklè haha, a ta wuffè.

¹⁷ Ta va na skwi a Zhiklè, a pats ngolala mwin gi Zhiklè haha: marai 100, drok 200, wud tambaki 400, mazawalhi 12 a gèɗ mali Israel tèlèba, ara nʼngér verzi ndohi Israel 12.

¹⁸ A ta pe ta ndohi mvi skwi a Zhiklè a mizlinè ta, ara man ta veni va nvenai, a ndohi Lévi, ara nʼngél-va ta ara nʼngélva ta, a ta gi mizlinè Zhiklè te Jérusalem, ara man a mwinda te ɗèlèwèr Moise.

¹⁹ Ndohi man ta shkè a deɓa te ɓèlè ta gu ngolala Pâque, te ki nshèlèkuraʼa, mʼmèn 14.

²⁰ Ndohi mvi skwi a Zhiklè a ndohi Lévi ta til va ta tèlèba. Ta tèlèba ta tila ma, a ta zlaha tambak Pâque a gèɗ ndohi tèlèba man ta menkada deɓa ma te ɓèlè, a gèɗ ndohi mvi skwi a Zhiklè, gwoli ta, a gèɗ va ta.

²¹ Ndohi Israel, tengaʼa man ta shkè a deɓa te ɓèlè, ta ndau tambak Pâque a nda ndohi tèlèba man ta ngulko va ta auda te va mʼmbèh skwi ndohi nte deɓa, a to do a va ndohi tengaʼa, a ta woy Ndo nzi pèc pècèk, Zhiklè Israel.

²² Ta gu ngolala, ta wuffè te ngolala movar man skwi nshègèrè a te di ɓai, mʼmèn tsaraɗ, te man Ndo nzi pèc pècèk a wuffeda ndav ta, a ngwodko ndav bi Assyrie a sam ta, aman a takaha ta kumba a sam mizlinè nrèm gi Zhiklè Israel.