Esdras 3 - Ma Zhiklè

Ta rèm sam mvi skwi a Zhiklè

¹ Aman ki matsaraɗaʼa mvangka ma, ndohi Israel ta te kokwar ta ma, ndohi tèlèba ta ɓica va te Jérusalem, a ndav staɗ.

² Josué, kra Jotsadak, a nslambada, a nda kramamhi na, ndohi mvi skwi a Zhiklè, a Zorobabel, kra Shealthiel, a nda kramamhi na, a ta rom sam mvi skwi a Zhiklè Israel, aman ta ndara na skwi zaʼa, ara man a mwinda te ɗèlèwèr ma kita Moise, ndo Zhiklè.

³ Ta rom sam mvi skwi a Zhiklè a géɗ verzi na halaʼa, ko ta gi zlau ndohi kokwar sa. A ta ndara na skwi a Ndo nzi pèc pècèk a pa, a prèk, a dakwaɗ.

⁴ A ta gu ngolala te godzovok, ara man a mwinda; ta ndara na skwi a Zhiklè pèc pècèk, ara man a mwinda te ɗèlèwèr Zhiklè, a gèɗ pats, staɗ staɗ, ngam ngam ba.

⁵ Te deɓaʼa skwi man ta va na Zhiklè pèc pècèk te mvèng kia, a pats ngolala Ndo nzi pèc pècèk, a skwi man ndohi ta tsokolo ncèkèlè a ta va na Zhiklè, pèc pècèk man ta huro.

⁶ Ta hüno nʼndèr skwi a Zhiklè a pats nshèlèkuraʼa, te ki matsaraɗaʼa, ko ta hüno verzi gi Zhiklè di ɓai.

⁷ Ta pa ta sulai a ndohi mbèzl kwa, a ndohi mbèzl wof, a ta va ta movar a skwi nsai a mbar a ndohi Sidon a ndohi Tyr, da hulkoɗi wof ɗawai te Liban, a ma iyam mbiaʼa te Japho, ara man Cyrus, bi Perse, a mva ta civèɗ a pa.

Ta rèm gi Zhiklè zaʼa

⁸ Aman ta shkè a deɓa a sam gi Zhiklè te Jérusalem ma, te mvi macecèwaʼa, ki cèw, Zorobabel, kra Shealthiel, a Josué, kra Jotsadak, a ndohi tèlèba man ta shke a deɓa te ɓèlè a ta shkè a kokwar Jérusalem, ta hüno mizlinè; a ta pe ta ndohi Lévi, man mvi ta 20, a nde a ma ma, a mɓer mizlinè gi Zhiklè.

⁹ Josuè, a wudahi na a kramamhi na, Kadmiel a wudahi na, te verzi Juda, ta co mizlinè sa, ta tèlèba, a ta ɓer ndohi mizlinè te gi Zhiklè, a nda wudahi Henadad, a nda wudahi ta, a nda kramamhi ta, ndohi Lévi.

¹⁰ Aman ndohi nrèm gi Zhiklè ta hüno verzi gai, ndohi mvi skwi a Zhiklè ta zlatsa a pa, a maslaka ndohi mvi skwi a Zhiklè a va, a tolom; a ndohi Lévi te verzi Asaph, ta zhè a dasal, aman ta slébèrdè Ndo nzi pèc pècèk, ara man David, bi Israel, a tildahai.

¹¹ A ta slu dimèsh, a ta shüd gèɗ a ta slubordo Ndo nzi pèc pècèk: aman nengaʼa amba, pombi nengaʼa a géɗ Israel a nzi a mèdèp. Ndohi tèlèba ta wuffè a ta slubordo Ndo nzi pèc pècèk, a géɗ man gi Zhiklè nhina ma.

¹² Ta kumba te va ndohi mvi skwi a Zhiklè, a ndohi Lévi, a tsuvom ndohai, ndohi nhalaʼa, man ta rka gi Zhiklè halakai, ta kuɗi ngezler-ngezleraʼa, a ta pu verzi gi haha a sam di ta. Ta kumba ta wuffè a ta hazlawa te mwuffè.

¹³ Nhèzlèwè mwuffè a shin te va lalau a nkudi ndohi azbai; ndohi ta hèzlèwè kumba, a cinè dra.