Esdras 1 - Ma Zhiklè

Ma bi Cyrus

¹ Cyrus, bi Perse. Te nhin ngi bi nengaʼa, Ndo nzi pèc pècèk a mpoko na gèɗ auda, a mboho te kokwar-bi tèlèba, a ngaɗa ta, a ɗèlèwèr ba. Aranta a gu ara man Ndo nzi pèc pècèk a goɗ te ma Jérémie.

² Cyrus, bi Perse, a goɗ ar haha: Ndo nzi pèc pècèk, Zhiklè te zhiklè te géɗèʼa, a mvay kokwar-bihai a géɗ herkeda tèlèba, a ngaɗayè te ma na, aman a i rèm gi nengaʼa te Jérusalem, te Juda, zaʼa.

³ Ko wawa te ndev kinè, man nte verzi ndohi na, Zhiklè da zhè a sam na, do do a kokwar Jérusalem, te Juda, do rom gi Zhiklè Israel! Nasa Zhiklè man a zhè te Jérusalem.

⁴ Njèkèdi ndohi tèlèba, a sam tèlèba man ta nza a pa ara mbrokihai, ndohi kokwar sa, da takaha ta a sulai, a guro, a kolongwai, a skwi kuɗom, a skwi man ta cèkèlè ncèkèlè a géɗ gi Zhiklè te Jérusalem.

Ta shke a deɓa te Babylone

⁵ Tsuvom ndohi te verzi Juda a Benjamin, ndohi mvi skwi a Zhiklè a ndohi Lévi, ta tèlèba man Mèzhèɓ Zhiklè a nslambaɗda ta, to do a ta da rèm gi Zhiklè te Jérusalem.

⁶ A nslamagihi ta, ta takaha ta a skwi tsaɗ tsaɗ tèlèba: sulai, guro, kolongwai, skwi kuɗom, a skwi mèshèlè kumba, a skwi man ta tsokolo ncèkèlè a vaʼa.

⁷ A Cyrus, bi Perse, a nhulko kolongwi gi Zhiklè auda zaʼa, man Nebucadnetsar a nheldama te Jérusalem a mpeda a gi mʼmbèh skwi na.

⁸ Cyrus, bi Perse, a ngaɗa na Mithredath, ndo mɓer sulai, aman a nhelkoɗauda, a ngreʼa a sam Sheshbatsar, kra bi Juda.

⁹ Na haha skwi man a ngraʼa: gandafihi guro 30, gandafihi verzhègenè 1.000, gwèsh 29,

¹⁰ kokwi guro 30, kokwi verzhègenè 410, a kolongwi ngiɗè 1.000,

¹¹ kolongwi guro a verzhègenè tèlèba 5.400. Sheshbatsar a nhulkoɗi skwi haha tèlèba a rai, aman ndohi Juda ta men ta a deɓa te ɓèlè te Babylone a kokwar Jérusalem.