Esaie 9 - Ma Zhiklè

Bi yumai

¹ Ndohi man ta nza te ruva, ta rka skwi nhél sam mbiaʼa. A sam ndohi man ta nza a sam mʼmetsai, te mèzhèɓ mʼmetsai, skwi nhél sam a nhulko gèɗ.

² Ka va ta mwuffè a vaʼa, a mwuffè a gi a mbiaʼa. Ta wuffè a sam di ngaya, ara man ta wuffè a pats man ta tsi dau, ara man ta wuffè a nkezli skwi man ta dum-kodai.

³ Wof nkelawa te daʼai tengaʼa, gada a deɗ tengaʼa, gada sojè te ri ndo ndzam ta, ka paslaʼa ara man a pats Madian.

⁴ Kotokoroh züdo man a dè hu-tsasl, hutsaslaʼa, maslaka man pombaz a pa, ta da fa na vogwa, a vogwa a da ndiaʼa.

⁵ Aman ta ya nga kra, nga ngots kra ngu-raʼa, wuɗi ɓai te va nengaʼa; ta baha na: Ndo nʼngra nga maya, mbikaɓai, Zhiklè; bi-wuɗai, Bab nga a mèdèp, Bi gumai.

⁶ Kokwar-bi nengaʼa a da gi a mbiaʼa, a gumi a sam nʼnzi bi David, gumi te kokwar-bi nengaʼa tèlèba, a zhè a mèdèp; aman nengaʼa a da tilèʼa, a va na wuɗai te kita, te ngi-zuraʼa, a hinè antanta, a ndè a ma ma a mèdèp. Srak Zhiklè bi mbiaʼa a da gi arsa.

Israel a ɗèɗèyè sam ambalai

⁷ Bi Zhiklè a nzlündo ma nengaʼa a sam ndohi gi Jacob, a ma a nkala ta a gèɗ a ndohi Israel,

⁸ a ndohi Ephraim a ndohi Samarie tèlèba ta suna, man ta fi va, ta wèl va a ta gaɗa:

⁹ Wujèɗ mʼmbeɗ na aussa, nga da ɗizlè a kwa. Gagaɗ mʼmpasl na, sèi ta menda wof tsna a pa!

¹⁰ Ndo nzi pèc pècèk a mbaha na Retsin, mayamhi tengaʼa, a ta slambaɗa; a mpoko ta gèɗ auda a ndohi man ta mba a va ɓai.

¹¹ Ndohi Syrie a ma tengaʼa, ndohi Philistie te deɓa. Ta ndeda Israel a ma hüyom. Ko ar haha Zhiklè a gi ndav di genè, a ngeda ri na genè.

¹² Aman ndohi ta ngwoda ndav ta a sam Zhiklè man a mbazl ta ɓai, a ta hur ma Zhiklè bi mbiaʼa ɓai.

¹³ Ndo nzi pèc pècèk a nʼngelama na gèɗ a hutor a Israel, kuza nwuzaɗ a gangar, a pats staɗ.

¹⁴ Ndo nhalaʼa, ndo mbiaʼa, nengaʼa gèɗ; ndo nhadka ma ncèkèlma, nengaʼa hutor.

¹⁵ A ndohi ncè ta ma ndohi haha, ta nde ta a ndohi mpe ta a wai, a ta zede ta ndohi man ta cè ta ma.

¹⁶ A gèɗ nengaʼa Bi Zhiklè a wuffè azɓai a gèɗ golahi tengaʼa; wud dikai a ngwozi mazihi ta sia te va azɓai. Aman ta tèlèba ndohi ndérɗèʼa, ndohi shèwa, tèlèba ta derɗe Zhiklè. Ko ar haha Zhiklè a gi ndav di genè a ngeda ri na genè.

Ndohi ta ndi va la a ma a dai

¹⁷ Aman malai a zlèzlèmè ara vogwa, a ndeda vatak a nkuɗdzari a ma, a nfa na vogwa a wof, a vodzok a ndüzhè dekdekaʼa.

¹⁸ A gèɗ ndzoan Ndo nzi pèc pècèk, vogwa a nʼndeda kokwar a ma, a vogwa a ndi ndohi tèlèba. Ndo ngiɗè azɓai man a nhur a woya a ntakaha kra-mam na.

¹⁹ Ta gi metsar tʼuna, mi a keɗ ta genè. Ta ndi skwi tʼuna, a ngeza ta ɓi genè. Ndo staɗ staɗ tèlèba ta ndi va ta a ma a dai.

²⁰ Manassé a sam ndohi Ephraim, Ephraim a sam ndohi Manassé, ta cèw ta gi arsa a Juda. Ko ar haha, Zhiklè a gi ndav di genè, a ngeda ri na genè.