Esaie 8 - Ma Zhiklè

¹ Ndo nzi pèc pècèk a ngaɗayè: Co wof nkapaʼa mbiaʼa, a ka windeda pa a maya mwindè ndohai: Maher-Shalal-Chash-Baz (Nhi a metsarnhil skwi yau yau).

² A ka woykoy ndohi malwuɗihi nzuraʼa: Urie, ndo mvi skwi a Zhiklè, a Zacharie, kra Bérékia.

³ A i mana a ngwoz nhadka ma. A nengaʼa a nʼngots kra, a nyu kra nguraʼa. Ndo nzi pèc pècèk a ngaɗayè: Va na nzlembaɗ Maher-Shalal-Chash-Baz.

⁴ Aman ga kra bèbèy ngèɗè mama a baba, ta da na skwi mèshèlè Damas, a skwi man ta heldama a metsar te Samarie, a bi Assyrie.

⁵ Ndo nzi pèc pècèk a ngaɗayè a vaʼa:

⁶ A géɗ ndohi haha ta kwola iyam Siloé, man a hi puwaʼa, a géɗ man ndav tengaʼa mʼmbeɗ na a sam di Retsin a kra Remalia,

⁷ na haha, Bi Zhiklè a baha na iyam woyam mbiaʼa, man a hi a wuɗai: bi Assyrie a nʼnjèl nengaʼa tèlèba, a nzede ta. Woyam mbiaʼa sa a dè auda a dzah, a tsagi woyam,

⁸ a hi a kokwar Juda, a zede herkeda, a ndohi te pa, ta daʼai, a wuzhè gèɗ na a géɗ herkeda ngaya tèlèba, Emmanuel ga!

⁹ Kinè ndohi herkeda, va-suna, va-gudzau! Va-fu zlembaɗ, kinè ndohi tʼherkeda dra! Va-tila skwi var kinè, a kin nza a zlau! Va-tila skwi var kinè a kin nza a zlau!

¹⁰ Va-herda ma a hai — a di a gédèsh na. Va-basla gèɗ kinè — a da gi arsa azɓai, te man Zhiklè a zhè a nda nga.

Ma a sam Esaie

¹¹ A vava Ndo nzi pèc pècèk a ngaɗayè, a ngsyè te rai, a mfay ma a gèɗ, aman i dè a civèɗ ndohi haha azɓai, a ngaɗa:

¹² Skwi man ndohi kokwar ta sla na nvhè ma a hai, nengaʼa nvhè ma a hi tèlè ka ɓai. A skwi man ta gi zlauaʼa, kin gu zlau ar kinè ɓai, kin gudzu ɓai!

¹³ Zhiklè bi mbiaʼa, nengaʼa man kin gaɗa, nkezla, sèi kin gi zlau nengaʼa, sèi kin gudzi a géɗ nengaʼa!

¹⁴ Nengaʼa a ndi a sam nkezlaʼa, a kwa ntsama ta sak a ndohai, a go-dokwom nkala ta a sak ndohi gi Israel cèw, a gaɗda a ɓalai a ndohi Jérusalem.

¹⁵ Ta kumba man sak ta a dè slèfèɗè, a nkalda ta hai, a ta pasl ta, skwa a mʼmbeɗa ta a sak, a ngsama ta sak.

Sam ndzakaɓa

¹⁶ I woya a i nghédè ma malwuɗi haha, a i ndè ma haha a ndav golahi ga.

¹⁷ I zhèr Ndo nzi pèc pècèk, man a ngheda di nengaʼa a sam ndohi gi Jacob, a i pi di a verzi nengaʼa.

¹⁸ Na haha nga a wudahi ga man Ndo nzi pèc pècèk a mvayè. Nga ndohi malwuɗai, a skwi nrkedai, a sam ndohi Israel, te ri Zhiklè bi mbiaʼa, man a nzi a géɗ za Sion.

¹⁹ Aman ta gaɗa kinè: Vo-goɗ vrai, vo-do a gi ngwozla man a gèɗ ma numnumaʼa a ngél kwa! — kin gada ta: Ndohi kokwar ta jhèɗè a sam Zhiklè nengaʼa ka ɓi ɗè? A ndohi man ta zhè a nshèffè ta jhèɗè ndohi mʼmetsa ʼa ɗè?

²⁰ Ndohi maya tengaʼa a ndohi mal-wuɗi tengaʼa a vava ta da gèɗè arsa, man ɓai di tengaʼa nciɗ ɓai.

²¹ Ta ndima a dala, ta kuɗi te ndav ta, mi a keɗ ta. Aman mi a keɗ ta, ta gi ndav a ta dérɗè ɓai, a ta dérɗè Zhiklè tengaʼa. Aman ndo a cid gèɗ a zhiklè,

²² aman a pi di a gèɗ herkeda, na haha, zlau a ruva, sam toɗoɗokoʼa, matakwan genè, ta za te va ruva.

²³ Zlau mʼmetsai a zhè te ruva ka bi ɗè? Halaʼa Zhiklè a ngez ta ndohi Za-bulon a Nephthali. Aman a ma ma a da til civèɗ ndè a ma iyam mbiaʼa, kokwar a wud woyam Jourdain kokwar ndohi nte deɓa.