Esaie 7 - Ma Zhiklè

Syrie a Ephraim ta derzla ma ta

¹ Te va man Achaz, kra Jotham, kra Ozias, bi Juda — Retsin, bi Syrie, a Pékach, kra Remalia, bi Israel, to do aman a ta gi var a kokwar Jérusalem. Aman ta slaha ta duma ɓai.

² A ndohi ngiɗè ta hodko ta ma haha a ndohi gi David: Ndohi Syrie to do a ta derzla ma ta a ndohi Ephraim. A ndav bi a ndav ndohai mʼmana hi ɓai, ara wof te dak man a nzi tètè azɓai te ri kozlar.

³ Ndo nzi pèc pècèk a ngaɗa na Esaie: Vo-do a verzi Shear-Jashub, kra ngaya, a kin da zli gèɗ a Achaz, a sam man iyam nhayaʼa a pa te géɗèʼa, a tsagi gi dau ndo nligoɗè skwai.

⁴ Gaɗa na: Gu maya a ka nza tètè, ka gu zlau ɓai, ndav ngaya da gudzu ɓai a géɗ pèmbèzh cèw haha man vodzok a ɗüzhè a pa, a géɗ ndav Retsin a Syrie a kra Remalia, man a vècè ara vogwa.

⁵ Te man Syrie, Ephraim a kra Remalia ta basla gèɗ ta, ta woy a ta ga ka skwi man ambaɓai, a ta gaɗa:

⁶ Ngo-dokoya a kokwar Juda, ngo-prokoy zlau a va tengaʼa, ngo-dumokoya, ngo-vokoy kra Tabeel a bi te pa.

⁷ Bi Zhiklè Ndo nzi pèc pècèk a goɗ aranta: Azɓai, a gi arsa azɓai!

⁸ Aman Damas, a kwèr Syrie. Rason, bi Damas.

⁹ Samarie, a kwèr Ephraim. Kra Remalia, bi Samarie. Njèkè mvi 65, Ephraim a da mbeɗ na, ndohi Ephraim klèng, ta ndev ta. Aman kin cè a ndav azɓai, kin nzi azɓai.

Emmanuel

¹⁰ Ndo nzi pèc pècèk a ngaɗa na Achaz aranta zaʼa:

¹¹ Dzhoɗo Ndo nzi pèc pècèk, Zhiklè ngaya, da ngra ka skwi a sam mʼmetsai te godok, man ɓai a sam nte géɗèʼa.

¹² Achaz a ngaɗa: I woya a i jhèɗè ɓai, i pi Ndo nzi pèc pècèk a wi azɓai.

¹³ Te deɓaʼa Esaie a ngaɗa: Va-tsena, ɗakwa, kinè ndohi gi David! Kin ngez ta ndohi na, a slra kinè ɓai, a kin ngézhè Zhiklè ga a va ɗè?

¹⁴ Gar haha Bi Zhiklè a da ngreda kinè skwi a ri na: Na haha, bidalai a da gi a hwaɗ, a da yi kra nguraʼa, a da va na nzlembaɗ na Emmanuel.

¹⁵ A da ndi mbar wa a vongwom, ha pats aman a sun ndèl skwi man ambaɓai te va skwi man amba.

¹⁶ Ga kra a shin nɗel skwi man ambaɓai te va skwi man amba, herkeda haha, man kin gi zlau bihi ten-gaʼa cèw, ngedas na ma.

Bi Assyrie a ga la matakwan a ndohi Israel

¹⁷ Ndo nzi pèc pècèk a di a zlündkoɗi patshi man wuɗitpa a géɗ ngaya, a géɗ ndohi ngaya, a géɗ ndohi gi bab ngaya, ara man ta ngatsa ɓai, daga man Ephraim a Juda ta kezla gèɗ.

¹⁸ A pats nasa Ndo nzi pèc pècèk a da baha ta dzuwihai a ma woyam Egypte, a vongwomhai te kokwar Assyrie.

¹⁹ Ta da shkè a ta nzi a hai a ma vèvèɗ slrats te gi za, a va vatakihai, a sam nwèr skwi tèlèba.

²⁰ A pats nasa Ndo nzi pèc pècèk a da shèma ta gwots auda te gèɗ, a sak, a bozozom, a pidök man a ndzhoüo a slembelom te wud woyam Euphrate.

²¹ A pats nasa ndo staɗ staɗ tèlèba a da mènè zlè staɗ a tambakihi cèw.

²² Wa tengaʼa te pa kumba, a ndohi ta ndi mbar wa. Njèkèɗi ndohi kokwar staɗ staɗ tèlèba ta da ndi mbar wa a vongwom.

²³ A pats nasa, a sam tèlèba man wof barassa 1.000 te di sul i gurso gozhèm nʼnga te pa, vatakihi a nkuɗdzarai mènè.

²⁴ Ta dè a pa a lèkèɗ a sulom; aman a samaʼa, vatakihi a nkuɗdzari genè.

²⁵ A za tèlèba, man anai ta pizhè te pa a devar, ka dè a pa te deɓaʼa azɓai, te ri zlau vatakihai. Ta da mbal ta zlèhi a pa, a tambakihi ta da kekerɗda samaʼa a pa a sak.