Esaie 65 - Ma Zhiklè

Zhiklè a mbeɗa ta a ma

¹ I va ta civèɗ a sam ga a tengahi man ta dzhaɗyè ɓai. I herda va a sam tengahi man ta hassyè ɓai. I gaɗa: Iyè anai, i zhè, a sam ndohi man ta tsay ri ɓai.

² I tila ri ga pèc pècèk a sam ndohi man ta woya ɓai, ta tsena gèɗ ɓai, man ta a civèɗ ambaɓiaʼa, ara man ndav tengaʼa a woyaʼa.

³ A sam ndohi man ta pokoy gèɗ auda pèc pècèk, man ta ndar ɓurdi te gi lak, a ta ndar ɓurdi a sam man ta roma.

⁴ Ndohai man ta nzi a gi dzavihai, a ta mènè a za a vaü, man ta ndi zluèɗ wodala, a skwi nlizhèʼa a zhkè te gandaf ta.

⁵ Man ta gada: Men ngay a deɓa, ka herd-ka nga va ɓai, i kezla. Tengaʼa ara vodzok man a ɗuzkay a htsan, ara vogwa man a mbècè azɓai.

⁶ Na haha, i windo, a i jèkè azɓai,

⁷ ha ta pelay mali ta a mali bab ta tèlèba, Ndo nzi pèc pècèk a gada, tenga man ta ndor ɓurdi te za, a ta derdyè te kwazlazlam. Gar haha i liva ta ara mali tengaʼa tèlèba.

Giɗfèk mɓuaʼa a herkeda mɓuaʼa

⁸ Ndo nzi pèc pècèk a goɗ ar haha: Aman ta ngècè nyi barassa iyamaʼa, a ta gaɗa: Ka gedassa ɓai, skwi mbelaʼa te pa! I woya a i gi lèmèlèmè a géɗ ɓèlèlihi ga, a i da gedassa tèlè ɓai.

⁹ I gi a ndohi ta shkè auda te verzi Jacob, a ndo nʼndi za ga te ndev ndohi Juda. Ndohi man i par ta ta ngècèʼa, a ɓèlèlihi ga ta nzi a pa.

¹⁰ Saron a gi a sam nwèr skwai, slrats Acor sam rèwè zlèhai ndohi ga man ta woy iyè.

¹¹ Aman kinè man kin jèkeda Ndo nzi pèc pècèk, man za ga nkezlaʼa mpca kinè a gèɗ, man kin va na skwi nʼndi a Gad, a kin ndha kokwi a kin va na Meni,

¹² i woya a i zlinda kinè tsakwal, a kin tè-lèba kin güɓdè deɓ a hai a sam man ta bazl kinè a pa. Aman i boho, kin mbeɗay a pa ɓai; aman i godo, kin tsena ɓai; aman kin gau skwi man ambaɓai a sam ga, a skwi man i woya ɓai kin woya holholaʼa.

¹³ Gar haha Ndo nzi pèc pècèk Zhiklè a gaɗa: Na haha, ɓèlèlihi ga ta da ndi skwai. A kinè, mi a keɗe kinè. Na haha, ɓèlèlihi ga ta da si skwai. A kinè, iyam a dza kinè. Na haha, ɓèlèlihi ga ta wuffè. A kinè, kin gshè gèɗ.

¹⁴ Na haha, ɓèlèlihi ga ta da sli dimèsh a mwuffè te ndav. Kinè, ndav a dza kinè a kin kuɗai, kin dish va, mèzhèɓ az a ndav kinè ɓai.

¹⁵ Nzlembaɗ kinè a gi a skwi mphom-daʼa a sam ndohi man i par ta, a ta gada: Bi Zhiklè da gedas ka! Aman ɓèlèlihi ga ta da ngècè nzlembaɗ ngiɗè.

¹⁶ Ndo te kokwar man a woya a ngècè mpshè ma, a ngècè a sam Zhiklè nzuraʼa. Ndo man a woya a mbèɗè, a mbèɗè a nzlembaɗ Zhiklè nzuraʼa. Aman matakwan nha-laʼa mpcèy a gèɗ, a di ga a rka asaɓai.

¹⁷ Na haha, i gi giɗfèk mɓuaʼa a herke-da mɓuaʼa, a ta hér skwi nzlèzlèʼa asaɓai, a pca ta a gèɗ.

¹⁸ Aman i gi a kin wuffè a gèɗ skwi man i giaʼa a mèdèp. Na haha, i gi Jérusalem a skwi nslebardaʼa; a i gi ndohi na a skwi mwuffè.

¹⁹ I da wuffè a gèɗ Jérusalem, i da gi langlangaʼa a gèɗ ndohi ga. Ta da tsena kuɗ a lalau a ma ma te pa asaɓai.

²⁰ Kra man a wa a te pa ɓai, man a nzi a nshèffè kèshkata genè. Babgi a te pa ɓai, man a metsi na te mpataka. Ndo man a ndikè mvi 100, ta baha na ndo man a mʼmets na te gola. Ndo man a ndikè mvi 100 azɓai, mphomdaʼa.

²¹ Ta da rèm gai a ta nzi a pa, ta da gi gi lak a ta ndi nyi nengaʼa.

²² Ta da rèm gi a ndohi ngiɗè ta nzi a pa azɓai. Ta gi gi lak a ndohi ngiɗè ta ndi nyiè azɓai. Mvi ndohi ga, a gi ara mvi wof, a ndohi man i par ta ta gi mizlinè a skwi man ri tengaʼa a ngau.

²³ Ta ngézhè ambali azɓai. Ta yi wudahi man ta metsi tsam-tsam azɓai. Aman tengaʼa verzi ndohi man Ndo nzi pèc pècèk a mpshè ta ma, a wudahi ta ta nzi a nda tengaʼa.

²⁴ Ga ta bahayè, i woya a i mbeɗa ta a ma. Ta gèɗè dai, i tsena ma.

²⁵ Kokoya a tambak ta war ta a sam staɗ, a marizhèlè a ndi ksof ara zlè. Aman zhüzhok a nèkèdè lokotor. A gèɗ za ga nkezlaʼa tèlèba, ta da gédèshè skwi azɓai, tagi mali azɓai, Ndo nzi pèc pècèk a gada.