Esaie 62 - Ma Zhiklè

Ntisi rai a géɗ Jérusalem

¹ I slaha a i nzi tètè azɓai a géɗ Sion. I nzeda verzi a hi azɓai a géɗ Jérusalem, ha pats man ngi-zura nengaʼa a hél sam ara pats wushèr, a skwi mʼmbel ndo nengaʼa a gi ara skwi ntiv vogwa.

² Te deɓaʼa ndohi herkeda ta da rka ngi-zura ngaya, a bihi tèlèba ta rka nʼnjèl ngaya, a ta da baha ka a nzlembaɗ mɓuaʼa, man Ndo nzi pèc pècèk a ngoɗ te ma na.

³ Te deɓaʼa ka, ka skwi mpèɗè gèɗ ɓai te ri Ndo nzi pèc pècèk, ka zlatsa ara pokwa ɓai.

⁴ Ta da baha ka ‘kokwar man ndohi ta jèkeda’ asaɓai. Sèi ta da baha ka ‘mwuffè ga’, ‘herkeda man nco ngwoz’, aman Ndo nzi pèc pècèk a wuffè a géɗ ngaya, ara baki a wuffè man a nco ngwoz.

⁵ Ara man gola a tsima dam, ndo nram ka a tsima ngaya; ara man ntsima a wuffè a géɗ medemi na, Zhiklè ngaya a da wuffè a géɗ ngaya.

⁶ Jérusalem, i pau ndohi mɓer zlazlar kokwar ngaya. Ta nzi ɓeslè azɓai, ko pats ko vaɗ. Kinè man kin wina na zlembaɗ a Ndo nzi pèc pècèk, aman Sion a pca na a gèɗ azɓai, kin jèkeda mbèhè ɓai!

⁷ A kin va na nshèk va ɓai, ha a ntila Jérusalem zaʼa, a ngi a skwi nʼnjèl herkeda.

Zhiklè a ngoɗo

⁸ Zhiklè a mbada a wuɗi nengaʼa: A vava i da va ta dau ngaya a ndohi mayamhi ngaya ta ndiaʼa asaɓai. Ndohi man verzi ta tsaɗ ta si barassa ngaya, man ka gu mi-zlinèʼa, asaɓai.

⁹ Aʼai, tengaʼa man ta ɓica dau, sèi tengaʼa ta ndiaʼa, a ta shid gèɗ a Ndo nzi pèc pècèk. Tengaʼa man ta para nyi wof, sèi ta si iyamaʼa, te mozodo ga nkezlaʼa.

¹⁰ Va-beza a pa, va-beza a pa a ntama-gai! Va-tila ta civèɗ a ndohi ga! Va-ɗaɗala civèɗ, va-ɗaɗala civèɗ! Va-par ta kwa auda a civèɗ, va-zlatseda skwi man ndohi herkeda ta shinè te pa!

¹¹ Na haha, Ndo nzi pèc pècèk a gèɗè, a ta cinè te verzi herkeda: Va-gaɗa na kokwar Sion: Na haha, ndo mʼmbel ngaya a shkè a skwi man a pil ka a vna a nda nengaʼa, a skwi ntul nengaʼa a ma na.

¹² A ta da baha ta ‘ndohi Zhiklè nkezlaʼa’, ‘ndohi man Ndo nzi pèc pècèk a sumka ta a deɓa’. Ka, ta da baha ka: ‘Kokwar man ta has ka’, ‘kokwar man ta da jèke ka azɓai a mèdèp’.