Esaie 61 - Ma Zhiklè

Ma mbelaʼa

¹ Mèzhèɓ Bi Zhiklè a zhè a géɗ ga. Nengaʼa a mfaɗayè mbár a gèɗ, a nzlindyè, aman i njè ta ma mbelaʼa a mbelaw ndohai, aman i bid ta ndohi man ndav ta a kuɗai, a i njè ta ndohi dangai, a ta pra ma, a ndohi ndzawaʼa, a skwi ndzaw ta matsa mpra ma;

² a i njè mvi Ndo nzi pèc pècèk man amba, pats man Zhiklè a jhèɗè skwi mpil gèɗ, a bid ta ndohi tèlèba man ta kuɗai.

³ A ta ngècè mpèɗè gèɗ te di man a mèrwèc, mbar a va te di man a maslaká sam kuɗa, dimèsh te di man a nlèyè, a ta baha ta ‘wof ngi-zuraʼa’, ‘gi lak Ndo nzi pèc pècèk’, man a nzala va na a vna.

⁴ A ta da ɗaɗayda diki nhalaʼa a pa zaʼa, a ta ɗizlè gi mogonahi mʼmbeɗaʼa nhalaʼa, a pa, a ta til kokwar ngedassaʼa mɓuaʼa zaʼa, gi man ndohi nhalaʼa ta jèkeda a pa.

⁵ Ndohi man verzi ta tsaɗ ta da wèr tambakihi kinè a pa. Ndohi herkeda ngiɗè ta pizhè gi dau a gi lak kinè.

⁶ Aman kinè, ta baha kinè ndohi mvi skwi a Ndo nzi pèc pècèk. Ta da baha kinè ndohi mizlinè Zhiklè nga. Kin wèl va a skwi mèshèlè ndohi herkeda, a kin jégèr va a nʼnjèl tengaʼa.

⁷ A géɗ man ndohi ga ta sau matakwan sak cèw, a ta ngots hori a skwi nʼndi gai, sèi ta ngècè te kokwar tengaʼa skwi a gi sak cèw, a mwuffè a mèdèp.

⁸ Aman iyè, Ndo nzi pèc pècèk, i woy ngi-zuraʼa, i gi shèwa a ndohi metsar. I woya a i va ta skwi ntul ta zuraʼa, a nga derzla ma nga a tengaʼa a mèdèp.

⁹ Ndohi nte deɓa ta da sun verzi ndohi sa, a ndohi herkeda ta sun wudahi tertgaʼa. Ta tèlèba man ta rka ta, ta gaɗa: verzi ndohi man Ndo nzi pèc pècèk a mpshè ta ma.

Dimèsh nshid gèɗ

¹⁰ I woya a i ngrédè mwuffè gà a géɗ Ndo nzi pèc pècèk auda a dimèsh, ndav ga do slubordo Zhiklè ga! Aman nengaʼa a vay skwi mʼmbel ndo a va, ara maslaka, a ngi-zuraʼa a va, ara dawar. Lèmèlèmè ara ntsima man a pèɗè gèɗ, a medemai man a pi skwi wi a va.

¹¹ Ara man herkeda a nftsko skwi na, ara man gi lak a nftsko lak na, lèmèlèmè Bi Zhiklè a da ftsko ngi-zuraʼa a sam di ndohi herkeda tèlèba, a ta slébèrdèʼa.