Esaie 60 - Ma Zhiklè

Nʼnjèl Jérusalem man a di a shkè

¹ Slambaɗa, do a sam nhelaʼa! Aman skwi nhél sam ngaya a shkè, a nʼnjèl Ndo nzi pèc pècèk a vèngè a géɗ ngaya.

² Anai vaɗ nʼngaʼa a gèɗ herkeɗa, ndohi herkeda ta te ruva. Aman Ndo nzi pèc pècèk a vèngè a géɗ ngaya, a nʼnjèl nengaʼa a gudko va a dai a géɗ ngaya.

³ Ndohi herkeda ta hi a sam skwi nhél sam ngaya; a bihi a sam nhelaʼa aman a vèngè a géɗ ngaya.

⁴ Ceda gèɗ a zhiklè, ngul dai! Ta tèlèba ta ɓicko va, ta shkè a sam ngaya. Wudahi ngaya ta shkè dra, ta zuɓko dalahi te ba.

⁵ Ka da rkaʼa, a ka wuffè, ndav ngaya a gi langlangaʼa, mʼmana tʼhi ma. Skwi mèshèlè a géɗ iyam mbiaʼa a ndikè a sam ngaya a skwi mèshèlè ndohi herkeda ta da hulkoɗi a sam ngaya.

⁶ Zlugumihi rè-dèdèʼa ta haya a sam ngaya, zlugumihi te Madian, te Epha. Ndohi Saba ta da shkè a guro a ɓurdi a ta njè skwi mbiaʼa man Ndo nzi pèc pècèk a gau.

⁷ Tambakihi te Kédar tèlèba ta ɓica va a sam ngaya, drokihi Nebajoth tèlèba ta zhè, a ka gi skwi a vna, a ka viaʼa a sam mvi skwi a Zhiklè; ta ambahayè. A i woya a i nzala gi ntsi ri ga.

⁸ Tenga wa, man ta hakaɗi ara vanai, ara nkuɗhomhai man ta hakaɗa gi ta?

⁹ Ndohi man ta shèwèlè a géɗ iyam ta ɓicko va a sam ga gokwèn, wuromhi Tarsis a ma, a ta helka ta wudahi ngaya a sam nʼdraʼa. Ta shkè a guro a skwi mèshèlè tenga te rai, aman ta slébèrdè nzlembaɗ Ndo nzi pèc pècèk, Zhiklè ngaya, Zhiklè nkezlaʼa, a vna; aman nengaʼa a nzal ka.

¹⁰ Ndohi man verzi ta tsaɗ ta da rèm zlazlar kokwar ngaya, a bihi tengaʼa ta da gi mizlinè ngaya. I gu ndav, a i tse ka; aman mwoy-ndo ga a gi a ka siyè te va.

¹¹ Ntamagi kokwar ngaya mwinèʼa pèc pècèk, mpizlè ɓai, ko pats ko vaɗ, a ndohi man ta hulkoɗi skwi mèshèlè, ta slaha ta bizhè a pa, a verzi bi tengaʼa.

¹² Aman kokwar-bi a ndohi nengaʼa man ta woya a ta gi mizlinè ngaya azɓai, ta zi ta, a herkeda tengaʼa a gédèsh na.

¹³ Ka da ngècè nʼnjèl Liban a sam ngaya: wof ɗawai, tsna, ɗozok, a ta til sam ga nkezlaʼa a vna, a i slébèrdè sam man sak ga a mbècè a pa.

¹⁴ Wud ndohi man ta zumda ka gèɗ a di ta shkè a sam ngaya a gurmbèzh. Tengaʼa tèlèba man ta derɗe ka, ta da kèlèhi a deɓ sak ngaya, a ta baha ka ‘kokwar Ndo nzi pèc pècèk’ – ‘Sion Zhiklè Israel nkezlaʼa’.

¹⁵ Te va nasa ta jèke ka a pa, ta gu shèwa a ka, ndo a dè a sam ngaya azɓai. Aman anai i woya a i nzal ka a mèdèp, a ndohi te verzi wud wudahi tèlèba ta wuffè.

¹⁶ Ka da si wa ndohi herkeda, ka da ndi skwi mèshèlè bihai. A ka da suna, iyè Ndo nzi pèc pècèk, man i mbel ka, man i sumka ka a deɓa, Zhiklè wuɗi Jacob.

¹⁷ I hulko guro te di man a zi pats, verzhègenè te di man a züdo, guro te di man a kaf, züdo te di man a kwa. I tsi gumi a bihi ngaya, a ngi-zuraʼa a da kwor ka.

¹⁸ Shèwa a cinè te kokwar ngaya azɓai. Gi mʼmbeɗaʼa a diki ta ngècè te kokwar ngaya azɓai. Ka da baha na zlazlar ngaya ‘skwi mʼmbel ndo’, a ntamagi kokwar ngaya ‘nʼnjèlè’.

¹⁹ Pats a gi a skwi nhél sam ngaya asaɓai; kia a hél sam ngaya asaɓai; aman Ndo nzi pèc pècèk, nengaʼa skwi nhél sam ngaya a mèdèp. Zhiklè ngaya, nengaʼa a nʼnjèl ngaya.

²⁰ Pats ngaya a da kèlè azɓai, kia a dè ruva azɓai. Aman Ndo nzi pèc pècèk, skwi nhél sam ngaya a mèdèp, nlèyè ngaya klèng ma.

²¹ Ndohi kokwar ngaya tèlèba, ndohi nzuraʼa, ta co kokwar a mèdèp; tengaʼa skwi man a nftsa a sam ga, i gau a ri ga, aman a nzalyè.

²² Ndo nkèshèa a gi a verzi ndohi gozhèm gozhèm, ntabawaʼa a mène man a gi a kokwar mbiaʼa. Iyè Ndo nzi pèc pècèk, i pasleda ri a hai; a pats nasa i da vèshè va a i giaʼa.