Esaie 6 - Ma Zhiklè

Zhiklè a baha na Esaie

¹ Te mvi man bi Ozias a mʼmets na, i rka Bi Zhiklè a nza a géɗ sam nʼnzi mbiaʼa te géɗèʼa; ma maslaka man a va nengaʼa a nʼndha gi Zhiklè.

² A tsagi nengaʼa séraphinhai, staɗ staɗ a kelpasl a va mokwa. Cèw a pizlè di na a vna, cèw a pizlè sak na a vna, cèw a hi a vna.

³ Ngiɗè a baha na ngiɗè, a ngaɗa: Zhiklè bi mbiaʼa, nkezlaʼa, nkezlaʼa, nkezlaʼa! Nʼnjèl nengaʼa a ndha herkeda tèlèba.

⁴ A ntamagai a nlüvko ma a deɓa; a gi a nʼndhe na a vodzok.

⁵ I gada: Wobau, i da gédèsh ga; aman tapidaf ma ga a gèɗè ma nlizhèʼa, a i nza te ndev ndohi man tapiɗaf ma tengaʼa gèɗè ma nlizhèʼa, a i rka Bai, Zhiklè bi mbiaʼa, a di ga!

⁶ Aman séraphin staɗ a nhakada a sam ga, a ndazli vogwa te rai, man a mberzl-koɗa a magats a sam mvi skwi a Zhiklè.

⁷ A nlama na ma ga a vna, a ngaɗa: Na haha, skwi haha a lama ka ma ngaya, a ncè ka mali ngaya auda, mʼmpra ka mali ngaya ma.

⁸ Te deɓaʼa i tsena ngèɗè Bi Zhiklè man a gaɗa: I zlindè wa? Nʼwoya a ndè a gi mizlinè nga wa? A i gaɗa: Iyè anai, zlindyè!

⁹ Bi Zhiklè a ngaɗayè: Do a ka da gaɗa ta ndohi haha: Kin fi zlembaɗ, a kin cinè azɓai. Kin pi dai, a kin shinè azɓai.

¹⁰ Sassaya ndav ndohi haha, ndèma ta zlembaɗ, ndèma ta dai, a ta rka di ɓai, a ta tsena zlembaɗ ɓai, a ndav tengaʼa a ngècè may a azɓai, ta da menkaɗa deɓa asaɓai, a ta mbél ta azɓai.

¹¹ A i gaɗa: Bi Zhiklè, ta ngèmè? A nengaʼa a ngaɗa: Ha kokwarhi ta nde ta a hèshèkèɗ, ndohi a te pa asaɓai, ndo a te gi asaɓai, a gi dau tèlèba a nʼnde na a hèshèkèɗ ma.

¹² Ndo nzi pèc pècèk a da hel ta ndohi auda dra, herkeda ngedassaʼa a zhè kumba te kokwar.

¹³ Te skwi kula, njèkè skwi staɗ te pa ɗè? Aman te skwi kula skwi staɗ njèkaha, a di a gédèshè zaʼa, lèmèlèmè ara wof man tajèkeda go-doraʼa a pa, lèmèlèmè ara wof lakalak man ta ngelaʼa a ta jèkeda godozlomaʼa a pa. Godozlom nengaʼa, tser ndohi nkezlaʼa.