Esaie 59 - Ma Zhiklè

Ndohi man ta woy Zhiklè ɓai

¹ Na haha, ri Ndo nzi pèc pècèk tüsl kata genè ka ɓai, a slaha a mbel kinè genè. Nzlembaɗ nengaʼa nʼndè ɓai, a slaha a ntsena genè.

² Aman mali kinè a kezl kinè a Zhiklè kinè. A gèɗ mali kinè a ngheda va na a sam di kinè, ntsena ɓai.

³ Pombaz a ri kinè. Ri kinè a lama na skwi man ambaɓai. Kin gèɗ ma ambaɓiaʼa; ncèkèlma a zhè te ma kinè.

⁴ Ndo man a pin ndo a gèɗ skwi man a ngu gokwèn, azɓai. Ndo man a dè kita a géɗ skwi nzuraʼa, azɓai. Ta fi gèɗ a skwi man civèɗ ka ɓai; ta zli ma, mali tʼhwaɗaʼa, ta yi ncèkèlma.

⁵ Ta mènè a géɗ slasli ndemhal, a ta kelawda sam a pa ara mbèzlkuɗèc. Ndo man a ndi slasli tengaʼa, a metsi na. Aman ta batsa staɗ, zhüzhok a shkè auda.

⁶ Saba madama amba a ntsi maslaka ɓai, amba a nfi a va azɓai. Skwi man ta giaʼa, skwi malai, ri tengaʼa a gi skwi a wuɗai.

⁷ Sak tengaʼa ta hi a sam ambaɓiaʼa, ta vèshè va a nkédè ndo. Skwi man ta hérèʼa, skwi malai. A sam man ta bizhè a pa, ta jèkeda gi mʼmbeɗa, a dikai, a pa.

⁸ Ta sun civèɗ gumi ɓai. Ngi-zuraʼa az a civèɗ tengaʼa ɓai. Ta bizhè a civèɗ ndzaraʼa, ndo man a dè a pa, a sun gumi ɓai.

Ngredè malai

⁹ A géɗ nengaʼa ngi-zuraʼa a zhè dra a sam nga, skwi mʼmbel ndo a ndikè nga a va azɓai. Nga zhèr skwi nhél sam, aman ruva a zhè.

¹⁰ Nga tètèmè va a dergai ara mandazlihai, nga tètèmè va ara ndo man di na azɓai. Skwi a slafadama nga sak a géɗ pats, lèmèlèmè ara man a sam nkeza-waʼa. Nga nzi te ruva ara ndohi mʼme-tsaʼa.

¹¹ Nga bebrè ara skwi dak, nga kuɗai ara nkuɗhom, nga zhèr ngi-zuraʼa, aman nengaʼa a shkè azɓai. Nga zhèr skwi mʼmbel ndo, aman nengaʼa a zhè dra a sam nga.

¹² Skwi ambaɓiaʼa man nga gau a sam ngaya a zhè kumba. Malihi nga ta gi mal-wuɗai a gèɗ nga. Nga sun skwi ambaɓiaʼa man nga gau, nga sun mali nga.

¹³ Nga suna, nga lèɓèslɓai, nga cèkèlma a géɗ Ndo nzi pèc pècèk, nga jèkeda Zhiklè nga, nga hur skwi shèwa, a ngi rai, nga cko ncèkèlma auda te ndav nga.

¹⁴ Gar haha skwi mʼmbel ndo a zhè dra, a nga pceda ngi-zuraʼa a hi a vna. Ta woy ma nzuraʼa a luma ɓai, ngi-zuraʼa a ngècè civèɗ a pa azɓai.

¹⁵ Gar haha ta ngatsa ngi-zuraʼa te pa ɓai; a ndo man a kwola skwi man ambaɓai, ta cèma na skwi na. Ndo nzi pèc pècèk a nrkaʼa, ambaha ɓai, aman a sam tèlèba ngi-zuraʼa azɓai.

Zhiklè a kèlè a pa

¹⁶ A nrkaʼa, ndo man a kèlè a pa azɓai, ko staɗ. A Zhiklè a ntila a ri na, a ngi-zura nengaʼa.

¹⁷ A mfeda ngi-zuraʼa a va ara limbèt, a skwi mʼmbel ndo a gèɗ ara dzokwom. Skwi mpil gèɗ man a jhèɗèʼa, nara man a feda skwi var a va, a feda srak a va ara dawar.

¹⁸ A pil skwi staɗ staɗ ara man ndohi ta gau: shèwa a ndohi shèwa na; wuɗai lèmèlèmè ara mayamhi nengaʼa ta ga na. A pil skwi a herkeda nte ndev iyam.

¹⁹ A ta da gi zlau nzlembaɗ Ndo nzi pèc pècèk, te civèɗ dukwaɗ, a ta da gi zlau nʼnjèl bi nengaʼa te civèɗ mvèng pats. Aman nengaʼa a shkè ara woyam nterzlaʼa, man nshèffè Ndo nzi pèc pècèk a hèdèʼa.

²⁰ Ndo mʼmbel Sion, ndo mʼmbel ndohi te gi Jacob, man ta menkaɗa deɓa te mali tengaʼa, a shkè, Ndo nzi pèc pècèk a gaɗa.

²¹ Aman iyè, nga derzla ma nga aranta a tengaʼa, Ndo nzi pèc pècèk a gada: Mèzhèɓ ga man a nzi a géɗ ngaya, a ma ga man i va ka a ma, da kazla auda te ma ngaya ɓai a mèdèp, ko te ma wud wudahi ngaya, a hinè antanta a ndè a ma ma a mèdèp, Ndo nzi pèc pècèk a gaɗa.