Esaie 58 - Ma Zhiklè

Njèkè skwi nʼndai

¹ Boho a wuɗai! Ka mbatsedaha daʼai ɓai! Boho ara tolom, ka ngra ta mphömè a ndohi ga, a malihi a ndohi gi Jacob!

² Ta woy iyè lèk-lèk, a ta woy a ta sun civèɗ ga. Ara ndohi man ta gi skwi nzuraʼa, a ta jèkeda ma kita Zhiklè ɓai, ta jhèɗè ma kita nzuraʼa a sam ga; ta woya aman Zhiklè a herda ta va.

³ Ta gada: Aman ka rka ɓai, nga jèkeda skwi nʼndi èhèmè? Aman ka shid gèɗ a vna azɓai, nga ga na va nga èhèmè? Na haha, a pats man kin jèkeda skwi nʼndai, kin jèjèr ntétékè kinè, akin vas ta ndohi mizlinè kinè tèlèba.

⁴ Kin jèkeda skwi nʼndai, a kin gi wuɗai, kin bèzl va, a kin dük ndo ntawassaʼa. Njèkè skwi nʼndi aranta, Zhiklè a slaha a cinè te géɗèʼa asaɓai.

⁵ Njèkè skwi nʼndi aranta ambahay ɗè? Pats man ndo a ga na va na; a kalda gèɗ a ndav ara mwurzhè mɓutoʼa, a mana a va mèrwèc a maslaka sam kuɗa a va; nasa njèkè skwi nʼndi ɗè? Pats man ambaha Ndo nzi pèc pècèk ɗè?

⁶ Njèkè skwi nʼndi man ambahayè aranta ka ɓi dè: Man ka pra ta cèlèlèu a ndohi man ta par ta ambalai; ka proko ta wof nkelawa auda te daʼai, ka proko ta ndohi man ta ɓurte ta, a ka paslko ta wof nkelawa te daʼai tèlèba auda.

⁷ Ka tsaka na movar ngaya a ndo man a ngècè skwi nʼndi azɓai; ka pa ta ndohi man ta slaha ta ngècè gi azɓai, a gai; aman ka rka ndo adai, ka va na maslaka, a ka mitko va ngaya a deɓa a sam kramamhi ngaya ɓai.

⁸ Te deɓaʼa skwi nhél sam ngaya a shkè auda ara pats wushèr, a mbel ka tsam tsam. Ngi-zuraʼa a dè a ma ngaya, nʼnjèl Ndo nzi pèc pècèk a dzadzar ka te deɓa.

⁹ Aman ka bèhè arsa, Ndo nzi pèc pècèk a mbeɗa ka a ma. Aman ka tsi rai, a di a gada: Iyè, anai! Aman ka proko ta wof nkelawa auda te daʼai ndohi man ta zhè a sam ngaya, ka jèkeda nkutèka na ri a di a ndo, ka jèkeda ma ambaɓiaʼa,

¹⁰ ka tsaka na skwi nʼndi ngaya a ndo man a ngècè skwi nʼndi azɓai, ka bidè ndo man ndav na a mbedè; te deɓaʼa skwi nhél sam ngaya a hél sam te ruva, a sam ruva ngaya a ndi ara gèɗ pats.

¹¹ Ndo nzi pèc pècèk, man a cè ka ma a mèdèp, a ngeza ka skwi a hwaɗ tʼhèshèkèɗ, a va ka wuɗi a va. Ka gi ara gi lak man ta ɓèl iyam a pa zuraʼa, ara nlèlè iyam man iyam a shè te pa azɓai.

¹² Wudahi ngaya ta da ɗaɗaya kokwar man mʼmbeɗ na hai, a pa, ka da ɗizlda verzi gi ndohi ngaya nzlèzlèʼa. Ta da baha ka ‘Ndo nʼndè slratsaʼa’, ndo man a til gi zaʼa.

Ndo man a slébèrdè pats nshèk va

¹³ Aman ka shèk sak ngaya a ka dè gani azɓai a pats nshèk va ga, man i kezlaʼa; aman ka wuffè a gèɗ pats nshèk va Zhiklè, a ka slébèrdè pats man Ndo nzi pèc pècèk a nkezlaʼa ara pats mbiaʼa, ka da gi skwi ara man ka woyaʼa azɓai, a ka da gi gani ngaya azɓai, ka tsi tsaval ambalai azɓai,

¹⁴ te deɓaʼa ka ngècè mwuffè a sam Ndo nzi pèc pècèk. I da tevda ka a géɗèʼa, ara man ka tsi sabai, a i va ka skwi nʼndi gi Jacob, bab ngaya. Aman Ndo nzi pèc pècèk a goɗ te ma na.