Esaie 57 - Ma Zhiklè

¹ Ndo nzuraʼa a metsi na, ndo nhérèʼa azɓai. Ndohi man ta woy Zhiklè, ta bazl ta, ndo a nfa ta gèɗ ɓai. Te man mali a zhè, ndo nzuraʼa a metsi na,

² a dè a sam gumai. Ta da shèk va, tengaʼa man to do a civèɗ nzuraʼa.

³ Aman kinè, wud ngwoz ngwozla, verzi ndohi mphömè, verzi fali dam, vo-washkè!

⁴ Kin ngwossaha wa? Kin livka wa? Ta yeka kinè te mali ka ɓi ɗè? Kinè wudahi ncèkèlma.

⁵ Kin gi wai a sam mʼmbèh fakalau, te verzi gagaɗ, te verzi wof mèmè, a kin zlama ta daʼai a wudahi kinè te slrats te gi za.

⁶ Skwi man ka ngècèʼa, te za; tengaʼa skwi nʼndi gi ngaya. Ka mboh skwai a ka ɓala ta skwai, a ka va ta tengaʼa ba; ndav ga a mènèhi arsa ɗè?

⁷ Ka gu sam mʼmènè ngaya a géɗ za te géɗèʼa; ko do a pa a mʼmbèh skwai.

⁸ Ka vau mʼmbèh skwi a ri a ntamagai, a géɗ gai. Ka ngwodyè, ka tila sam mʼmènè ngaya, ka zleɓa pats cèw, a ka cko ngwoz a ka mènè a vna, a ka pu di ntétékè a sam ngwoz.

⁹ Ko do a sam Mèlèk a ka faɗa na mbar a ɓurdi a va; ka zlinde ta ndohi sak ngaya dra, a hai a sam mʼmetsai.

¹⁰ Ka ngeza a civèɗ ngaya; aman ‘skwi ambali’ ka gada ɓai. Ka ngots wuɗi mɓuaʼa pèc pècèk, ka ngez ɓai.

¹¹ Ka ga zlau ɓai, ka ga hori ndo ngiɗè ɓai, ka tsokol ma, ka heryè ɓai. Katʼka ɓai! I nza tètè, i pizlè di ga; a géɗ nengaʼa ka ga zlau ga ɓai.

¹² I woya a i ngredè ngi-zura ngaya a mizlinè ngaya auda. Mʼmbèh skwi ngaya a takaha ka azɓai.

¹³ Aman ka bèhè, ta mbel ka azɓai. Kozlar a hel ta ma, a venda ta gèɗ. Aman ndo man a pi ndav a iyè, a ndi herkeda, a ngècè za ga nkezlaʼa.

Ndohi Israel man ta woy Zhiklè

¹⁴ Ta da tsenaʼa: Va-bazla civèɗ, va-bazla civèɗ, va-lèmda! Kwa tèlèba va-patsa na auda a civèɗ a ndohi ga!

¹⁵ Nengaʼa man mbiaʼa man a nzi te géɗèʼa, man a nzi a géɗ sam nʼnzi ɓai a mèdèp, nzlembaɗ nengaʼa nkezlaʼa, a goɗ ara haha: I nzi a géɗ sam nʼnzi ɓai te géɗèʼa, i nkezlaʼa. I zhè a sam ndohi man ta manda gèɗ a hai, a ndav ta a mbeɗè. I menda na ndav a pa a ndo man a manda gèɗ a hai; a i slambaɗda na gèɗ a ndo man ndav na a mbedè.

¹⁶ I woya a i gi ndav a mèdèp azɓai, i verslè a mèdèp azɓai, man ɓai a fena wuɗi ndohi man i ge ta, a mèzhèɓ tengaʼa a mbats na.

¹⁷ I gu ndav a gèɗ shèwa tengaʼa. I tsau, ndav a ndzayè, i ngheda va ga. Aman tengaʼa ta tsena gèɗ ɓai, to do a civèɗ ara man ndav tengaʼa a woyaʼa.

¹⁸ I rka civèɗ tengaʼa; i woya a i mbel ta, i woya a i de ta, i woya a i bid ta a i va ta wuɗai a ndohi tengaʼa man ta kuɗai.

¹⁹ Ta da gèɗè ma malwuɗai, ma gumai a ndohai, ko ndohi dra, ko ndohi ndul ndul; a i mbel ta, Ndo nzi pèc pècèk a gaɗa.

²⁰ Aman ndohi nʼnderɗe Zhiklè ta ara iyam man a gi tsuvoɗoh-tsuvoɗohaʼa a zlècèhi azɓai, a dhwoɗkoɗi zumanai a draɓ.

²¹ Skwi mʼmbel ndohi nʼnderɗe Zhiklè azɓai, Zhiklè ga a gaɗa.