Esaie 56 - Ma Zhiklè

Gi ntsi rai

¹ Ndo nzi pèc pècèk a goɗ arsa: va-dzodzor ma kita, va-gu zuraʼa, skwi mʼmbel ndo ga a shkè ndul ndul; a ngi zura ga a gudoko va auda a di ndohai ndul ndul.

² Mwuffè a sam ndo man a gi arsa, a sam ndo man a gshè va a vna, aman a gi maya, a derɗa pats nshèk va azɓai, a ɓer ri nengaʼa, aman a gi skwi ambaɓiaʼa azɓai.

³ Ndo man verzi ndohi ngiɗè, a nhumdko va a Ndo nzi pèc pècèk, da goɗ arsa: Ndo nzi pèc pècèk da dzamyè auda te va ndohi na ɓai. Ndo man ngwon nʼngela, da goɗ ɓai: na haha i tsuɓa.

⁴ Aman Ndo nzi pèc pècèk a gaɗa: Ndohi ntsuɓa man ta slébèrdè pats nshèk va ga, a ta gi skwi man ambahayè, a ta jèjèr nderzlè-ma ga,

⁵ i woya a i hér ta te gi ga, a i slubarde nzlembaɗ ta tʼhwaɗ gi ga, a fena wudahi a dalahi ga. I woya a i va ta nzlembaɗ man a gédèshè azɓai a mèdèp.

⁶ Ndohi te verzi ngiɗè, man ta humdko va a Ndo nzi pèc pècèk, a ta gi mizlinè nengaʼa, a ta woy nzlembaɗ Ndo nzi pèc pècèk, a ta gi a ɓèlèlihi na, ta tèlèba man ta dérɗè pats nshèk va ga azɓai, a ta jèjèr nderzlè-ma ga,

⁷ i woya a i de ta a sam za ga nkezlaʼa, a i va ta mwuffè te gi ntsi ri ga. Skwi tengaʼa man ta ndarayè a ta zlayè a sam mvi skwi a Zhiklè, a gi ambahayè. Aman gi ga, sèi ta baha na gi ntsi rai ndohi herkeda tèlèba.

⁸ Bi Zhiklè man a ɓic ta ndohi Israel man ta venda gèɗ ta, a goɗ arsa: I da ɓic ta ndohi ngiɗè a vaʼa, a va ndohi mɓicaʼa.

Ndohi mɓer ndohi Israel ta sun skwo ɓai

⁹ Kinè skwi hèshèkèɗ, skwi dak, vo-washkè tèlèba, a kin da ndau!

¹⁰ Ndohi mɓer ndohi ga ta tèlèba mandazlihai, ta sun skwa ɓai. Ta tèlèba kdadihai man ta winè ma azɓai, ta slaha ta bkwè ɓai. Ta nzi zumbutaʼa, ta manahai, ta woy ta nzhun ta.

¹¹ Tengaʼa kdadihai man mi a gudèma ta gèɗ, a skwi nʼndi a ngeza ta azɓai. Tengaʼa ndohi mɓer skwai man ta slaha ta tsena skwi ɓai, ngiɗè a dè a civèɗ na, ngiɗè a civèɗ na, staɗ staɗ ta hèsh skwi ta, tèlè ta lèmèlèmè.

¹² Ta gaɗa: Vo-washkè, i da woy zom a nga siaʼa, ha zom a nkeɗe nga! Angoslèm ba nga da gi lèmèlèmè ara mpatsna genè, a ta gèɗè a géɗèʼa: Gaka na va! Ndheda pa!