Esaie 55 - Ma Zhiklè

Zhiklè a baha ta ndohai

¹ Kin tèlèba, man iyam a dza kinè, vo-washkè a sam iyam! Kinè ba, man suli kinè azɓai, vo-washkè! Kin ngècè ambalai, a nshum ka ɓai, barassa a wa!

² Kin pi sulai a géɗ skwi man movar ka ɓi èhèmè? Kin gi mizlinè a géɗ skwi man a ngeza kinè hwaɗ azɓai èhèmè? Va-tsena ma ga, va-ndau skwi njènaha kinè leɓakaʼa, a ndav kinè nruɓa a skwi ngraʼa.

³ Va-fu zlembaɗ, vo-washkè a sam ga, va-tsenaʼa, a kin nzi a nsheffè. I woya aman nga derzlokoy ma nga a nda kinè a mèdèp, aman i va kinè pombai man i pasla na ri a David.

⁴ Na haha, i vau a ndo malwuɗai a sam ndohai, a ɓai, aman a ncè ta ma ndohi tèlèba.

⁵ Na haha, ka baha ta ndohi herkeda man ka sen ta ɓai. A ndohi man ta sen ka ɓai, ta hi a sam ngaya, a géɗ man Ndo nzi pèc pècèk, Zhiklè ngaya, Zhiklè Israel nkezlaʼa a nslebarde ka.

⁶ Va-woy Ndo nzi pèc pècèk, aman ani a zhè dai. Va-baha na, aman ani a zhè ndul ndul a sam kinè dai!

⁷ Ndo man ambaɓai da jèkeda civèɗ nengaʼa. Ndo malai da jèkeda skwi ambaɓiaʼa man a nhuro, da menkaɗa deɓa a sam Ndo nzi pèc pècèk, a da sia te va; a sam Zhiklè nga, aman nengaʼa a prè mali kumba.

⁸ Skwi man i hérèʼa, az lèmèlèmè ara man kin hérè te ndav kinè ɓai. Civèɗ kinè az lèmèlèmè ara civèɗ ga ɓai, Ndo nzi pèc pècèk a gada.

⁹ Ara man giɗfèk a zhè kerpaʼa dra a géɗ herkeda, lèmèlèmè civèɗ ga a zhè kerpaʼa dra a sam civèɗ kinè; a skwi man i hérèʼa a géɗ skwi man kin hérè ar kinè.

¹⁰ Ara man iyam a min-mèn ta shkè te zhiklè, a ta minè a deɓa azɓai, aman a ruɓ herkeda a iyam, a skwi a fcè a vna, a grè, a grè, a vi tser skwai a ndo nzlekau, a movar a ndo man a ndiaʼa,

¹¹ lèmèlèmè ma ga a shkè a deɓa a sam ga ambalai azɓai, sèi man a gi skwi man i woyaʼa, a rufko skwi man i zlündo a pa.

¹² Aman kin dè a mwuffè te ndav; a i da de kinè a gumai. Za a ngègèdhai ta da wuffè a ma kinè, a wofhi te dak ta da wuf-fè a ta gècè.

¹³ Te gi vatak wof mbelaʼa a ftskaɗa pa, te gi nkuɗdzarai nèʼèn zlè a ftskaɗa pa. A gi arsa a nʼnjèl Ndo nzi pèc pècèk, a gi a skwi nʼngredè Zhiklè man a zhè a mèdèp, man a gédèshè azɓai.