Esaie 54 - Ma Zhiklè

Zhiklè a woy Israel

¹ Hazlawa a mwuffè, ka delai man ka ya kra ɓai! Da wuffede ka, ngwossa man ka disha kra ɓai! Aman ngwoz man nya kra ɓai, wudahi nengaʼa a fena wudahi man a baki na zhè, Ndo nzi pèc pècèk a gaɗa.

² Herda sak gi maslaka ngaya a deɓa, pra maslaka gi ngaya, ka gu ndrè a pa ɓai! Lüva a teɓa ngur-gurèʼa, dizla a gada nzuraʼa,

³ ka zlèzlèmè te civèɗ ri mandai, ka zlèzlèmè te civèɗ ri gula, a ndohi te verzi ngaya ta da ndi kokwar-bihai, a ta nzi te kokwar man dikai.

⁴ Ka gu zlau ɓai, ka da ngècè hori a di azɓai; ka hur gèɗ ɓai, ka da gi hori azɓai. Hori ngaya man ka bidalai, a da pca ka a gèɗ. Matakwan ngaya man ka ngwoz mazai ka da hérè azɓai.

⁵ Nengaʼa man a nge ka, baki ngaya; nzlembaɗ na Zhiklè bi mbiaʼa, Zhiklè Israel nkezlaʼa, man a mbel ka. Ta baha na Zhiklè herkeda tèlèba.

⁶ Ara ngwoz man ta kwolaʼa, ngwoz man a kuɗai, Ndo nzi pèc pècèk a baha ka. Ngwoz gola, ndo a slaha a nkwola ɗè?

⁷ I jèke ka nʼnzi kètè; aman i da cka ka a deɓa, ka siyè te va kumba.

⁸ Ndav ga a nslambaɗa a ndzoan, a i ngheda va ga a ka, nʼnzi kètè; aman a pombi ga a mèdèp ka siyè te va, Ndo nzi pèc pècèk, man a mbel ka, a gaɗa.

⁹ Pats haha a gi a sam ga lèmèlèmè ara pats Noé. Ara man i mbaɗa, a iyam Noé a di a shkè a deɓa a géɗ herkeda asaɓai, lèmèlèmè i mbaɗa, i da gi ndav a géɗ ngaya azɓai, i ga ka ndzoan azɓai.

¹⁰ Ko za a de na a sam ngiɗè, ko der za a gidè va, aman pombi ga a shkè auda a géɗ ngaya azɓai, a nderzlè-ma gumi ga a prè azɓai. Ndo nzi pèc pècèk, man ka sia te va, a gaɗa.

Zhiklè a ɗèɗèyè Sion zaʼa

¹¹ Ka ngwoz mbelawa, man matakwan a nhal ka a hai, ara kozlar a tsede ka hai, man ndo a mbid ka azɓai. I woya a i dizlè ka a saphirs, ka mbelaʼa. I pi verzi gi a dazkwa.

¹² I paɗa na gèɗ a rubis, kwa mbelaʼa, a ntamagi ngaya a béryl, kwa mbelaʼa, a dergi tèlèba a wud kwa mbelaʼa,

¹³ a wudahi ngaya tèlèba ta ndi a wudahi Ndo nzi pèc pècèk. Wudahi ngaya ta da wèl va kumba,

¹⁴ ngi-zuraʼa a da zhè te verzi ngaya. Ka zhè dra a sam shè-wa. Skwi ngiɗè man ka gi zlauaʼa, azɓai, skwi a pra ka zlau a va, a zhè dra a sam ngaya, a herdeka ka va azɓai.

¹⁵ Aman ta gi var a ka, iyè a ngia ka ɓai; ndo man a gi var a ka, a metsi na a dal var a sam ngaya.

¹⁶ Na haha i gau ngwozla, aman a vècè vogwa, a viɗè skwi ngi var. I gu ndo ngedassa skwi ba, aman a gedas ta.

¹⁷ Skwi var ko mèmè man ta gu a géɗ ngaya, a slaha ka ɓai. Ma wawa man a pin ka, ka tseda ta a sam kita. Nasa nʼndi gi ɓèlèlihi Ndo nzi pèc pècèk, a skwi man ta ngècèʼa a sam ga, Ndo nzi pèc pècèk a gaɗa.