Esaie 53 - Ma Zhiklè

¹ Nco ma man nga tsena, wa? Wuɗi Ndo nzi pèc pècèk a ngudo-ko na va a di a wa?

² Ɓèl Ndo nzi pèc pècèk a gra a sam nga, ara skwi nftsaʼa, ara zluzlor tʼherkeda ngworaʼa. Mbambi az a di nengaʼa ɓai, nga pa di a pa ɓai. Nara ndo ka ɓai, ambaha nga ɓai.

³ A ndara ta ndohai, a ndohi ta jèkeda, ndo man va a dza na, a sun matakwan, ara ndo man nga pizle di nga a pa. A ndara nga holholaʼa, a nga rkaʼa ara ndo ambalai.

⁴ Aman a vava a mzuɓ matakwan nga, a mco skwi ndzi nga. A nga rkaʼa, ma a gèɗ na, ara ndo man ta ga na kita, man Zhiklè a mtsau, a mʼmanda na gèɗ a hai.

⁵ Mali nga a nʼnga na mblè a va nengaʼa, skwa a ndza na a géɗ maharam nga. Kita man kala a gèɗ nengaʼa a mva nga gumai; te mblè nengaʼa nga mbel nga.

⁶ Nga tèlèba nga zlak nga, ara tambakihai, nga tèlèba, ngiɗè a civèɗ na, ngiɗè a civèɗ na, a Ndo nzi pèc pècèk a mʼmanda mali nga tèlèba a gèɗ nengaʼa.

⁷ Aman ta ɓurto na, nengaʼa a mco genè; a mʼmbeɗa a ma ɓai, ara tambak man ta dè a sam man ta zli daiaʼa a pa, ara tambak man ta zli mamliaʼa.

⁸ Ta co auda te va matakwan, te va kita; aman a nhur nʼndikèma nenga wa? Ta gedassedaussa tʼherkeda man ndohi ta zhè a nshèffè; ta keɗaʼa a géɗ mali ndohi ga.

⁹ Ta gu gi dzavi nengaʼa te ndev ndohi malai, ta rda a va ndohi mèshèlè, ko nengaʼa a nʼnga skwi ambaɓia ɓai, a ntsakala ma ɓai.

¹⁰ Aman Ndo nzi pèc pècèk a woya a nkalda a matakwan. Aman a mvau nshèffè na a skwi mpil gèɗ, a da rka ndohi nte verzi nengaʼa man ta gi kumba; a pats nshèffè nengaʼa ta herda a ma ma; a skwi man Zhiklè a woyaʼa, a da rufa te nengaʼa.

¹¹ A géɗ man a ngeza te matakwan, a da wuffè. Matakwan nengaʼa, ɓèl ga, ndo nzuraʼa, a va ta ngi-zuraʼa a ndohi kumba, a da zhüɓ mali tengaʼa.

¹² Gar haha i da pa na ndohi mbibihiaʼa a skwi nʼndi gi nengaʼa. A da kezli skwi ɓèlè a nda ndohi man wuɗi ta a zhè, te man a mvau gèɗ na a mʼmetsai. Ta ngra na a va ndohi amba-ɓihiaʼa; aman nengaʼa a nzuɓ mali ndohi kumba, a ntsu rai a géɗ ndohi malihai.