Esaie 52 - Ma Zhiklè

¹ Piɗèkwe ngaya, piɗèkwe ngaya, Sion, sala va ngaya! Jérusalem, feda maslaka wi a va! Ka kokwar nkezlaʼa! Anai ndo man ngwon nʼngel ɓai, ndo man ndav mpan ɓai, a dè a sam ngaya asaɓai.

² Jérusalem, man ka dzawaʼa, tassa na lokotor auda a sak ngaya. Slambaɗa! Proko teɓa auda te daʼai ngaya, ka dem Sion ndzawaʼa!

Ma mbelaʼa a géɗ Sion

³ Aman Ndo nzi pèc pècèk a goɗ aranta: Ta pre kinè a ma, ta pa suli ɓai; ta da shum kinè a deɓa, ta da pi suli azɓai.

⁴ Aman Ndo nzi pèc pècèk Bi Zhiklè a gaɗa: Halaʼa ndohi ga to do a kokwar Egypte, a ta nza a pa ara mbrok, a ndohi Assyrie ta ga ta wuɗai ambalai.

⁵ Anai i gi mè a haha? Ndo nzi pèc pècèk a gaɗa. Ndohi ga ta hel ta a metsar, ndohi shèwa tengaʼa ta fi va, Ndo nzi pèc pècèk a gaɗa, a ta derɗe nzlembaɗ ga pèc pècèk.

⁶ Gar haha a pats nasa ndohi ga sèi ta shin nzlembaɗ ga, a ta suna, iyè, man i goda, i zhè.

⁷ Sak nengaʼa mbikaɓai, man a njè ma mwuffè, ma gumai te za, a va ta ma mbelaʼa, a njè ta ma mʼmbel ndo, a gaɗa na Sion: Zhiklè ngaya, bai!

⁸ Tsenaʼa, ndohi mɓer kokwar ngaya ta hin mbèhè, ta guzlai, aman ta rka a di ta, ara man Ndo nzi pèc pècèk a shkè ngwai a Sion.

⁹ Va-wuffa, va-guzlau, kinè gi dikihai te Jérusalem! Aman Ndo nzi pèc pècèk a bid ta ndohi na, a sumka ta ndohi Jérusalem a deɓa.

¹⁰ Ndo nzi pèc pècèk a ngreda wuɗi nengaʼa nkezlaʼa auda, a gi nrkedi a ri nengaʼa nkezlaʼa, a sam di ndohi herkeda tèlèba; a ndohi te verzi herkeda tèlèba ta rka skwi mʼmbel ndo Zhiklè nga.

¹¹ Vo-do kinè! Vo-do kinè! Va-jèkeda sam haha! Kin lama na skwi nlizhèʼa ɓai! Vo-do auda te ndev tengaʼa! Va-pana ri kinè man kin zhüɓ kolongwi Ndo nzi pèc pècèk!

¹² Aman kin vasso va ɓai, kin hu mhi ɓai! Ndo nzi pèc pècèk a dè a ma kinè, Zhiklè Israel nkezlaʼa a dè a verzi kinè.

Ɓèl Zhiklè a si matakwan

¹³ Na haha ɓèl ga a da gi a ndo, a grè a gi a mbiaʼa, a ta slébèrdèʼa.

¹⁴ Lèmèlèmè ara man ta kumba ta gu zlau nengaʼa – anai a nʼngwoda nga va a dai, di nengaʼa ara di ndo ka ɓai, va nengaʼa ara va ndo ka ɓai –

¹⁵ lèmèlèmèʼndohi kumba ta da rzl ta a géɗ nengaʼa; a bihi ta mbeɗi ma azɓai tètèʼa. Skwi man ndo a njè ta zlè-zlèa ɓai, ta pi di a pa; a skwi man ta tsena zlèzlèa ɓai, ta rkaʼa.