Esaie 51 - Ma Zhiklè

Abraham, bab kinè

¹ Va-tsenaʼa, kinè man kin zeɓi ngi-zuraʼa, kinè man kin hèsh Ndo nzi pèc pècèk. Va-pu di a za, te nengaʼa ta paslka kinè; a vèvèɗ kwa, te nengaʼa ta ndzavka kinè auda.

² Va-pu di a Abraham, bab kinè, a Sara man a nyeka kinè. Man i baha na, na staɗgenè. A i pshè na ma, a mana a vata.

³ Aman Sion a si Ndo nzi pèc pècèk te va, a gi man mʼmbeɗ na te pa a sia te va; a nʼngwoda tazli hèshèkèɗ nengaʼa a gi lak Eden, a dak nengaʼa a gi lak Ndo nzi pèc pècèk. Ta wuffè a ta wèl va te pa, ta sli dimèsh a ta shid gèɗ.

⁴ Ndohi ga, va-tsena, va-fu zlembaɗ a ma ga, kinè ndohai! I vi ma kita, a ngi a skwi nhél sam ndohi herkeda.

⁵ Te deɓaʼa ngi-zura ga a herda kinè va, a nasa nasa skwi mʼmbel ndo ga a gudoko kinè va a dai, a ri ga a gi kita ndohi herkeɗa. Tʼherkeda dra ta zhèryè te ndav, ta pi di a ri ga.

⁶ Va-ceda gèɗ azhiklè, va-pu di a hai a herkeda! Giɗfèk, a da cizl na, a kezli gèɗ ara vodzok, a herkeda a da hèl na ara masl, a ndohi te pa ta bazl ta ara dzuwaj. Aman skwi mʼmbel ndo ga a nzi a mèdèp; ngi-zura ga a ndiv azɓai.

⁷ Va-tsenaʼa, kinè ndohi man kin sun ma kita, man ma kita ga a zhè te ndav kinè! Kin ga zlau ndohi man ta derɗe kinè ɓai, man ta tsa kinè derngasl. Kin gudzu te ndav ɓai!

⁸ Ta ndiv ta ara maslaka man nfafar a ndiaʼa, ara bkwi man duho a shiɗèʼa. Aman ngi-zura ga a nzi a mèdèp; skwi mʼmbel ndo ga a dè a ma ma te verzi wud wuda.

Zhiklè a va ta wuɗai a ndohi na

⁹ Slambaɗ ngaya, slambaɗ ngaya! Sala ri ngaya, Ndo nzi pèc pècèk! Slambaɗ ngaya ara nzlèzlèʼa, ara nhalaʼa. Ka man ka gedassa Egypte, a ka keɗa skwi man nara kedam ka ɓi ɗè?

¹⁰ Ka man ka gwora iyam mbiaʼa, iyam mbiaʼa man a hakaɗauda tʼhwaɗ herkeda; man ka bazl-da civèɗ a woyam mbiaʼa, a ndohi man ka sumka ta a deɓa ta bezkaɗa pa, ka ɓi ɗè?

¹¹ Ndohi man Ndo nzi pèc pècèk a mpreka ta auda, ta da shkè a deɓa a ngwai, a deɓa a kokwar Sion, a ta sli di-mèsh, a wuffede ta a mèdèp. Mwuffë a nwèl va ta da zhè a sam ta; matakwan a nlèyè klèng.

¹² Iyè man i bid kinè. Ka wa man ka gi zlau ndohai, ndohi man ta bèzl ta gene, a ta ndev ta ara kuza?

¹³ Ndo nzi pèc pècèk man a nge ka, man a mwuzhè giɗfèk, a ngu herkeda, a pca ka a gèɗ, kè! Ka gu gudza gudzaʼa a sam shèwa ma-yamhi ngaya pèc pècèk, man a woya a ngedas ka; Shèwa mayamhi ngaya ani na tema?

¹⁴ Ndul ndul ma, ta prokodi ndo dangai auda te cèlèlèu, a metsi te dangi azɓai, a tèkwèn movar azɓai.

¹⁵ Iyè Ndo nzi pèc pècèk, Zhiklè ngaya, man i geda iyam mbiaʼa, a gi tsuvoɗoh-tsuvoɗohaʼa—nzlembaɗ ga Zhiklè bi mbiaʼa.

¹⁶ I va ka ma ga a ma ngaya, i ɓer ka tʼhwaɗ ri ga, aman i wuzhè giɗfèk a i gi herkeda, a i gaɗa ta ndohi Sion: Kinè ndohi ga.

Jérusalem, slambaɗa!

¹⁷ Piɗèkwe ngaya, piɗèkwe ngaya, Jérusalem, slambaɗ ngaya, ka man ka sau kokwi ndzoan te ri Ndo nzi pèc pècèk; ka sau te kokwi man skwi ngiɗè te pa a nked ka, a ka sedama.

¹⁸ Te va wudahi tèlèba man ka yau, man ka gre ta, ko staɗ azɓai, man a de ka, man a gs ka te rai.

¹⁹ Matakwan cèw ta keɗ ka; nda lay ka wa? Metsar, ngédèshè, tsakwal a mai; nda bid ka wa?

²⁰ Wudahi ngaya ta zurdo dai a der kokwar, wuɗi ta azɓai, ara skwi te ɓalai. Ndzoan Ndo nzi pèc pècèk a nge-dassama ta may a te gèɗ, man Zhiklè ngaya a nguv ta.

²¹ Gar haha tsena ma haha, ka mbelaw ngwoz, man skwi ngiɗè a dza-kaɓama ka gèɗ, aman zom ka ɓai.

²² Bi ngaya, Ndo nzi pèc pècèk, Zhiklè ngaya, man a nza ta deɓa a ndohi na, a goɗ aranta: Na haha i cè kokwi man skwi ngiɗè te pa a nkeɗ ka, kokwi ndzoan ga, auda te ri ngaya. Ka da siaʼa ani asaɓai.

²³ I da va ta a ri a ndohi man ta ga ka matakwan, man ta gaɗa ka: Guɓda deɓ a hai, a nga bizhè a pa! A deɓ ngaya a ngau a sam man ta beza a pa, ara civèɗ man ndohi ta shèwèlè a pa.