Esaie 50 - Ma Zhiklè

Israel a fa na gèɗ ɓai

¹ Ndo nzi pèc pècèk a gaɗa: Ɗèlè-wèr man i va na mam kinè man i kwolaʼa, na tema? Ndo man i pre kinè a ma a sam na, na tema? Kin pra ma a géɗ mali kinè. I kwola mam kinè a géɗ mphömè nengaʼa.

² Man i shkè, i ngatsa ndo a pa ɓi èhèmè? Man i boho, ndo a mʼmbeɗay a ma ɓi èhèmè? Ri ga a shila ɓai, kumba tüsloʼa man i preka kinè auda ɗè? Wudi ga aman i mbel kinè azɓi ɗè? Na haha i gwora woyam mbiaʼa a ndzoan ga. I gwora woyam, a i ndeda hèshèkèɗ, a klèfihi te pa ta husl ta, a géɗ man iyam azɓai. A skwihi te pa ta bazl ta a mi iyam.

³ I va na maslaka sam kuɗa a va a giɗfèk, a i mbè a vna.

Ɓèl Zhiklè a fi geɗèʼa

⁴ Bi Zhiklè a mvay nèʼèn gol Zhiklè, aman i slaha a i bid ta ndohi man ta ngeza, a ma ga. A piɗèkwudyè a prèk a prèk, a winay zlembaɗ, aman i tsena ara gol nengaʼa.

⁵ Bi Zhiklè a mwinay zlembaɗ, a i ga mèdègèɗ ɓai, a i mena a deɓa ɓai.

⁶ I geda ta deɓ ga a ndohi man ta ndahyè, a bazlazlam a ndohi man ta tsiyè. I pa ri a di ɓai, aman ndohi ta derɗyè, a tajfay slèslèɓ a dai.

⁷ Aman Bi Zhiklè a takahayè. Gar haha i ngècè hori a di azɓai. I gwora di ga ara kwa; i suna, Zhiklè a ngwodyè azɓai.

⁸ Nenga man a ckay auda a sam kita, a zhè ndul ndul. Nwoya a ngi ma a iyè wa? Ngo-do a pa cèw! Nwoya a mverslè ma a iyè wa? Da shkè!

⁹ Na haha Bi Zhiklè a takahayè. Nwoya a mphomdyè wa? Na haha ta husl ta ara maslaka man nfa-far a ndiaʼa.

Matakwan ndohi man ta woy Zhiklè ɓai

¹⁰ Te ndev kinè ndo man a gi zlau Ndo nzi pèc pècèk, da tsena ma ɓèl nengaʼa! Ndo man a dè te ruva, skwi nhél sam az a sam na ɓai, da pu ndav a nzlembaɗ Ndo nzi pèc pècèk, da gso va a Zhiklè na!

¹¹ Na haha kin tèlèba, man kin vècè vog-wa, a skwi ntiv vogwa te rai, vo-do a ndev nèʼèn vogwa kinè, a va vogwa man kin tivèʼa! Skwi haha ri ga a nga kinè, a kin da si matakwan.