Esaie 5 - Ma Zhiklè

Gi wof barassa

¹ I woya a i sla na dimèsh a mandal ga, ara man a wuffè a gèɗ gi wof barassa na. Mandal ga a nʼngots gi wof barassa. Skwi a gi te pa kumba.

² A mwus-saʼa, a mporko kwa auda te pa, a ngeda wof a pa. A nramda gi ngurèʼa a ndevaʼa, a nrda vèvèɗ nkèl nyi wof a pa. A zhèrèʼa, aman a ngècè nyi wof te pa; aman nyi nengaʼa a jèn ɓai, ɗuzlekzlekaʼa.

³ Anai, ndohi te kokwar Jérusalem, a kinè ndohi Juda, va-ngela nga kita nga a gi wof barassa ga.

⁴ Mizlinè man i ga te gi wof barassa ɓai a zhi ɗè? I zhèr nyi wof man i gada a jèn, sata a myu man a jèn ɓai, èhèmè?

⁵ Anai i woya a i ngra kinè skwi man i da gi a gi wof barassa ga. I zlinè civèɗ a pa, i ptsoda zlazlar aussa, a i fa na vogwa.

⁶ I woya a i gedassedaussa klèk. Ta sliɗè skwi te pa asaɓai, ta pizhè te pa asaɓai, a da y i sèi va-tak a nkuɗdzarai. I fa ta ma a gèɗ a vani-hai, da goko iyam a hi asaɓai.

⁷ Aman gi wof barassa man a Zhiklè bi mbiaʼa, nengaʼa gi Israel. Ndohi Juda, wof man a wuffè a géɗèʼa. A nhur a da ngècè skwi man amba, — a ta keɗa ndo; a nhur a da ngècè skwi nzuraʼa, — anai ta dzakaɓaʼa.

Wobau a géɗ ndohai

⁸ Wobau a gèɗ ndohi man ta pa gi ndèc-ndèpaʼa, a ta gu gi dau ndersl-nderslaʼa; a samaʼa a ndev na, herkeda a tengaʼa mènè.

⁹ Ma Zhiklè bi mbiaʼa a ntsenkay a zlembaɗ: Gihi kumba, mbia nshefaʼa, ntila amba, man ta da mbeɗ ta, a ndo a da nzi a pa azɓai.

¹⁰ Gi lak, teɓa kula, a da y i á gi gadagar staɗgenè. Tser sk wai, bas-sara zlèl nʼndha dzkaʼa, ta da ngècè wuda a gi gandaf staɗgenè.

¹¹ Wobau a gèɗ ndohi man a prèk te gi langa ta jèjèr zom, man ta zhè a zom te gèɗ, ha vaɗ.

¹² Ta mènè a va skwi nʼndai, a ta sli dimèsh a ganzavar a tèzlèzlèu a ganga a shingelèk; aman skwi man Ndo nzi pèc pècèk a giaʼa, ta hera ɓai, ta rka skwi man ri nengaʼa a gia ɓai.

¹³ A gèɗ nengaʼa i da venda ta gèɗ a ndohi ga; ndohi nengaʼa mbibi-hiaʼa ta da tiɗ ta a mai; nhèyè ndohi nengaʼa ta da bèzl ta a mi iyam.

¹⁴ Gar haha sam mʼmetsai a da winè vèvèɗ daʼai nengaʼa zlatataʼa, a nʼnjèl ndohi Jérusalem, a nhèzlèwè dimèsh, a ntsi ndzegarah, ko wawa man a wuffè, ta wushahi a pa.

¹⁵ Ndohi mbibihiaʼa ta da mèndè gèɗ a hai, a ndohi nkèshkèshèhiaʼa ta da gi huyokokoʼa holholaʼa.

¹⁶ Zhiklè bi mbiaʼa a da tsoko gèɗ na auda a mbiaʼa te kita, Zhiklè nkezlaʼa a da ngredè va na auda a ngi-zuraʼa, i kezla a vava.

¹⁷ Wud tam-bakihai ta da ndi mandai te pa ara dak ta. Kokwar man ta wèr skwi te pa, a nʼngwoda na a hèshèkèɗ.

¹⁸ Wobau a géɗ ndohi man ta ngèzlè malai a nʼngwèdè ndo, a mphömè a teɓa dazlaʼa man ta gshè zlè a vna.

¹⁹ Man ta gaɗa: Da vaska va, da ndeva mizlinè nengaʼa yau yau, aman nga rkaʼa! Skwi man Sion a nhur a da giaʼa, da gau, a nga suna!

²⁰ Wobau a géɗ ndohi man ta baha na skwi man ambaɓai, amba; a skwi man amba, ambaɓai; man ta ngwoda ruva a skwi nhel sam, a skwi nhel sam a ruva; man ta ndeda skwi nɗuzlekzlekaʼa a skwi nhontuktukaʼa; a skwi nhontuktukaʼa a skwi nduzlekzlekaʼa.

²¹ Wobau a géɗ ndohi man ta gaɗa: nga ndohi maya, a ta fa va ta a ndohi maya.

²² Wobau a géɗ ndohi man wuɗi ta a zhè a sam nsi zom, a ta sun ntèshè zom amba a vata.

²³ A géɗ man ta ruɓ ta, ta prokoɗi ndo mali auda te kita, a ta fa na kita a gèɗ a ndo man nʼnga mali ɓai.

²⁴ Gar haha lèmèlèmè ara nèʼèn vogwa a ndi düsh dau, a vogwa a ndeda ksof a ma hüyom, zluzlor tengaʼa a da nde na a ndefèn vogwa, a nwurzhè a nɗuz na ara mbokom. A géɗ man ta dérɗè ma kita Zhiklè bi mbiaʼa, a ta kwola ma Zhiklè Israel Zhiklè bi mbiaʼa, a ta kwola ma Zhiklè Israel nkezlaʼa,

²⁵ ndav a ndza na Ndo nzi pèc pècèk worworaʼa a gèɗ ndohi nengaʼa. A ngeda ri a géɗ tengaʼa, a mbazl ta. Za a gudzai. Nckondohi tengaʼa ta mana a civèɗ ara koskosai. A Ndo nzi pèc pècèk a gi ndav a géɗ ndohi na genè, a ngeda ri na dai.

Ndohi dra ta kala na va a kokwar

²⁶ Zhiklè a zlècèdè bata, a ndohi man ta dra ta rkaʼa. A da baha ta a tolom te verzi herkeda. Na haha ta haka tsam-tsam.

²⁷ Ndo man ntulè a keɗaʼa, azɓai; ndo man a kalahi, azɓai; ndo man a zhingètè, azɓai; man a nzhuna, azɓai; ndo man deɓ nengaʼa mpraʼa, azɓai; ndo man teɓa kotokoroh nengaʼa nʼngesla, azɓai.

²⁸ Sulom tengaʼa ntasla, ncwèr lèkèɗ tengaʼa mʼmana, kotèkwèr plèsh tengaʼa nara kwa, sak kiki var tengaʼa ta hai ara ko-zlar.

²⁹ Ta kuɗkaɗarai ara mam marizhè-lè, ta kuɗi ara wud marizhèlèhai, man ta kuɗi wa, a bebrè a gshè skwai, a ngézlèʼa, ndo a slaha a nkèldè ɓai.

³⁰ A pats nasa skwi a hèzlèwè a géɗ tengaʼa ara njürv iyam. Aman ndo a pi di a herkeda, a rka ruva genè, a pa na zlau a gèɗ, lèk lèk a hér gèɗ, ruva a zede skwi nhél sam.