Esaie 49 - Ma Zhiklè

Mizlinè ɓèl Zhiklè

¹ Kinè herkeda nte ndev iyam, va-tsenaʼa! Kinè ndohi herkeda dra, va-fu zlembaɗ! Ndo nzi pèc pècèk a mbahayè, man i tʼhwaɗ mam ga dai, a mbahayè a nzlembaɗ ga, man i ye di ɓai.

² A ntaslay ma ga ara tsakwal, a mɓeryè tʼhwaɗ ri na, a ngiyè a shèr sulom, a mfiyè a godoma nengaʼa.

³ A ngaɗayè: Ka Israel, ɓèl ga, i ngreda nʼnjèl ga te ka.

⁴ Aman i gada: I ngeza ambalai, i keɗa ndhtsan a gèɗ ambalai; aman Ndo nzi pèc pècèk a gi kita ga, skwi ntul ga te ri Zhiklè ga.

⁵ Aman Ndo nzi pèc pècèk, man a ngiyè a ɓèl na, man i tʼhwaɗ mam ga dai, a woy aman i hulkoɗi ndohi Jacob a deɓa a sam na, a i ɓicka ta ndohi Israel a sam na. Ndo nzi pèc pècèk a nzalyè; Zhiklè ga, nengaʼa wuɗi ga.

⁶ A gada: Aman ka ɓèl ga, a ka til ndohi te verzi Jacob, a ka helka ta ndohi Israel man ta mbel ta a deɓa, a slra ɓai; sèi i ge ka a skwi nhél sam ndohi herkeda; a skwi mʼmbél ndo a ndi-kè a verzi herkeda tèlèba.

⁷ Ndo nzi pèc pècèk, man a mbel Israel, Zhiklè Israel nkezlaʼa, a ngaɗa na ɓèl ndohi shèwa, man ndohi ta kwolaʼa, man a mpra ta zlau a va a ndohi herkeda: Bihi mbibihiaʼa ta da rkaʼa, a ta slambaɗa; bihi nkèshèʼa ta da gurɓèhai a sam Ndo nzi pèc pècèk man nlèɓèslèʼa, a sam Zhiklè Israel nkezlaʼa, man a nʼngatska ka auda.

Zhiklè a wara ta dai

⁸ Ndo nzi pèc pècèk a goɗ ar haha: A pats man amba, i co ntsi ri ngaya. A pats mbelè, i takaha ka. I fe ka, a i ge ka a ndo nderzlè ma ndohai, man i takaha kokwar zaʼa, a i kezla ta nʼndi gai man nksaraʼa a ndohi zaʼa.

⁹ I gaɗa ta ndohi dangai: Vo-do auda! A ndohi te ruva: Vo-washkè a sam nhelaʼa! Skwi a ndi mandai a zolom civèɗ tèlèba, ta ndi mandai a géɗ ɓala.

¹⁰ Mi a bazl ta azɓai, iyam a dza ta azɓai, pats a te ta azɓai; aman ndo man ta sia te va, a de ta, a lè ta a sam nlèlè iyam.

¹¹ I bazla civèɗ te za tèlèba, a civèɗ ntila te géɗèʼa.

¹² Na haha ndohi ngiɗè ta shkè dra, ndohi ngiɗè ta shkè te civèɗ man a géɗèʼa, te civèɗ dukwaɗ, ndohi ngiɗè te kokwar ndohi Sinim.

¹³ Kinè giɗfèkihai, va-gu langlangaʼa. Herkeda, wuffa! Zahai, va-guzlau! Aman Ndo nzi pèc pècèk a bid ta ndohi na, mbelawahi nengaʼa ta sia te va.

Ndohi Sion ta ndev ɓai

¹⁴ Sion a gaɗa: Zhiklè ga a njèkyè ma, ì pca na a gèɗ a Ndo nzi pèc pècèk.

¹⁵ Kra nkèshèa a pca na gèɗ a mam na ɗè? Kra hwaɗ na a sia te va azɓi ɗè? Ko man mpca na a gèɗ, ka pcèy a gèɗ a iyè azɓai.

¹⁶ Na haha i vèhda kokwar ngaya a hwaɗ ri ga. Zlazlar kokwar ngaya a zhè a sam di ga pèc pècèk.

¹⁷ Ndohi nram ka ta hakadai; ndohi mʼmbeɗ ka a ndohi ngedas ka ta de ta.

¹⁸ Ngul dai, rka! Ta tèlèba ta ɓica va, ta dè a sam ngaya ara man i zhè á nshèffe a vava, Ndo nzi pèc pècèk a gada. Ta tèlèba ta ndi a skwi wi ngaya, a ka tila va ngaya a vna ara medemai.

¹⁹ Sam hèshèkèɗ ngaya, gi ngaya man mʼmbeɗ na, kokwar ngaya man ngedassa, a slra ta a ndohi kokwar ɓai; a ndohi ngedas ka ta zhè dra.

²⁰ Wudahi ngaya man ka nyaka ta ka ɓai, ta da gada ka dai: Sam a slra nga ɓai; va-nga dalbara a nga nzi a pa!

²¹ Ka da hérèʼa: myokoy wudahi haha wa? Iyè, i ya wudahi ɓai i delai. Tenga haha, ngre ta wa? Njèkè i staɗgenè, tenga haha ta nza a ma?

²² Zhiklè Ndo nzi pèc pècèk a goɗ ar haha: I kutèka ta ri a ndohi nte deɓa, i zlècèdè skwi man ndohi herkeda ta senyè te pa; wud ngurhi ngaya ta paka ta a ndav; dalahi ngaya ta manka ta a ba.

²³ Bihi ta gre kinè, ngwozi bi ta gre kinè a wa. Ta da tücahi a herkeda a sam di ngaya, a ta nèkèɗè lokotor auda a deɓ sak ngaya. Te deɓaʼa ka da suna, iyè Ndo nzi pèc pècèk; ndohi man ta pi ndav a iyè, ta ngècè hori a di azɓai.

²⁴ Skwi man ngul-ndo a mco, ka ngezlama na auda te ri ɗè? ʼBèlèlihi man ndo mbiaʼa a mporo, ta slaha ta hi ɗè?

²⁵ Ndo nzi pèc pècèk a gaɗa: Ko gar haha, i da ngezlama ta ɓèlèlihi te ri ngul-ndo; a skwi man ndo mbiaʼa a ngso, a hi na. Iyè, man nga bèzl va a ndo mayam ngaya; iyè man i da mbel ta wudahi ngaya.

²⁶ Ndohi nʼngeda ka matakwan, i va ta zluèɗ va ta, a ta ndiaʼa, a ta si pombaz ta, a ta ngeza ara zom man a keɗ ta. A herkeɗa tèlèba a suna, iyè, Ndo nzi pèc pècèk, i takaha ka; wuɗi Jacob man a mbel ka.