Esaie 48 - Ma Zhiklè

Zhiklè a ngreda skwi man a di a shkè

¹ Kinè ndohi gi Jacob, man ta baha kinè a nzlembaɗ Israel, man kinè te verzi man a Juda, man kin mbèɗè a nzlembaɗ Ndo nzi pèc pècèk, a kin tsi ri a Zhiklè Israel; aman a ncè-a-ndav zura ka ɓai.

² Kin co nzlembaɗ kokwar nkezlaʼa, kin thè va a Zhiklè Israel, nzlembaɗ na Zhiklè bi mbiaʼa.

³ Skwi nshèlèkuraʼa i ngreda kinè nʼnzi a zhè. Kin tsena te ma ga, i gaɗa kinè. I goɗo, tsam tsam a ngu ar haha.

⁴ A géɗ man i suna, ka tsena gèɗ ɓai, gèɗ ndangaʼa a zhiklè, ka mèdègèɗ,

⁵ i ngra ka nʼnzi a zhè, ga a gai; i senda ka, aman ka da hur ɓai, vri ga a ngau, mblom wof a züdo ga a ngodo.

⁶ Ka tsena tèlèba; anai ka rkaʼa. Kin woy a kin njè ɓi ɗè? A hinè antanta, ka da cinè skwi mɓuaʼa a skwi nʼnghedaʼa, man ka sun halaʼa ɓai.

⁷ Nʼngaʼa antanta genè, zlèzlèa ka ɓai. Ka tsena ma nengaʼa halaʼa ɓai, aman ka da goɗ ɓai, i sun ma.

⁸ Ka tsena ɓai, ka sun ɓai, a nhaka ka a zlembaɗ ɓai, te man i suna, ka lèɓèslɓi pal ba. Ta baha ka ndo malai daga man ka tʼhwaɗ mam ngaya.

⁹ A géɗ nzlembaɗ ga, i keɗda gèɗ ndzoan ga a hai, a géɗ nʼnjèl ga i ɓer ka, i zede ka ɓai.

¹⁰ Na haha i wosl ka, aman ara mwèsl verzhè-genè ka ɓai; i jkede ka a matakwan, ara man ta wèsl züdo te gezla.

¹¹ I giaʼa, a géɗ ga, a géɗ nzlembaɗ ga. Ta derɗe nzlembaɗ ga kumba. I vi njèl ga a ndo ngiɗè azɓai.

¹² Ndohi gi Jacob, a Israel, man i ngotskoɗauda, va-tsena ma ga! Iyè, i zhè! I ndo nshèlèkuraʼa, a ndo nʼndikèma skwai.

¹³ Ri ga a ngau herkeda, ri mandi ga a mwuzhè giɗfèk, a i baha ta, tèlèba ta zhè ma.

¹⁴ Va-bica va tèlèba, va-tsenaʼa! Te va tengaʼa wa, man a njo ar haha? Nengaʼa man Zhiklè a woyaʼa a ndav na, a di a gi skwi man Zhiklè a woyaʼa te Babylone, a ngreda wuɗi na a sam ndohi Chaldee.

¹⁵ Iyè, i godo, i baha na, i gada na da shkè, a i takaha a civèɗ na.

¹⁶ Va-herdekay va, va-tsenaʼa! Tʼhinkaɗ na i godo, a metsar ka ɓai. Daga man skwi haha a gai, i zhè. Anai Ndo nzi pèc pècèk a nzlindyè a Mèzhèɓ nengaʼa.

Va-jèkeda Babylone!

¹⁷ Ndo nzi pèc pècèk, ndo mʼmbel ka, Zhiklè Israel nkezlaʼa, a goɗ ar haha: Iyè, Ndo nzi pèc pècèk, i Zhiklè ngaya, man i slebda ka skwi man amba, man i lamda ka a civèɗ man i woy a ka dè a pa.

¹⁸ Aman agassa ka fu gèɗ a ma nkwèr ga! Ar manam ngaya a dè a ma ma, a ngi-zura ngaya a hai ara iyam te woyam mbiaʼa.

¹⁹ Ar ndohi te verzi ngaya ta gi ara wyak, wud hwaɗ ngaya ta kumba ara wyak. Ar nzlembaɗ tengaʼa a zi a gédèshè a sam ga azɓai.

²⁰ Va-jèkeda Babylone! Va-hu auda te ndev ndohi Chaldée! Ndo nzi pèc pècèk a nsumko Jacob, ɓèl nengaʼa, a deɓa.

²¹ Nengaʼa a nde ta a civèɗ hèshèkèɗ, iyam a ndza ta ɓai. A ncizla za, a iyam a hakaɗauda.

²² Gumi ndohi ambaɓihiaʼa azɓai, Ndo nzi pèc pècèk a gaɗa.