Esaie 47 - Ma Zhiklè

Babylone ngedas na

¹ Washkèhai, nza a va mèrwèc, bidalai, dem Babylone! Nza a herkeɗa, washkè auda a sam nʼnzi ɓai, dem Chaldee! Ta baha ka dem röftukwaʼa; a lèɓèslè te deɓaʼa asaɓai.

² Co vova tʼhai, a kra vova, sud nshidè! Ca na maslaka auda a di ngaya, takossko maslaka ngaya a géɗèʼa, a dos ngaya da nza a dala, beza a ndev iyam!

³ Sèi ka nzi a dai, a hori ngaya a ngrédè auda! I jhèɗè a ka pelay gèɗ, ka siyè te va azɓai.

⁴ Ndo mʼmbel nga a gaɗa: nzlembaɗ na Zhiklè bi mbiaʼa, Zhiklè Israel nkezlaʼa.

⁵ Nza a hi tètè, do a va ruva, dem Chaldée! Antanta ta da baha ka dem bi kokwarhi asaɓai.

⁶ I gu ndav a géɗ ndohi ga; i rka nʼndi-gi ga ara skwi mphomaʼa, i pa ka a rai. Ta se ka te va ɓai; ko babgai, ka kelawa na wof a daʼai.

⁷ Ka gaɗa: I dem bi kokwar a mèdèp. Ka hur skwi te ndav ɓai, ka hur ndikèma skwi ɓai.

⁸ Gar haha tsena ma haha, dem man a wèl va, man a nzi a géɗ sam nʼnzi ɓai, a her skwi ngiɗè azɓai, man a gada: Iyè, genè, ndo ngiɗè azɓai! I ndi a ngwoz mazi azɓai, i nzi a deli azɓai.

⁹ Skwi ncèw haha a da gi a sam ngaya a pats staɗ: ka delai, ka da ndi a ngwoz mazai, tèlè a gi a sam ngaya, ko ka mbèh skwi kumba, ko ka pi kwa kumba.

¹⁰ Ko ka fi gèɗ a shèwa ngaya a ka huro: Ndo ngiɗè a nrka ɓai. Maya ngaya, kilèa ngaya, ta zlakede ka, a ka hur te ndav ngaya: Iyè genè, ndo ngiɗè azɓai!

¹¹ Aman matakwan a shkè a géɗ ngaya, ka slaha ka dzama ɓai. Skwi a da gedas ka, ka slaha ka tilè ɓai. Skwi ngiɗè a zede ka tsam tsam, ga ka hérèʼa.

¹² Washkè a mpi kwa ngaya, a mʼmbèh skwi ngaya tèlèba, man ka gu wuɗi a géɗèʼa te gol ngaya. Gar ta slaha a ta takaha ka, gar ta slaha a ta va ka wuɗai.

¹³ Ka ge matakwan a va ngaya a sam ndohi nʼngatsa ka maya – sèi ta shkè! Ndohi man ta ngela giɗfèk, tengaʼa man ta ɗèlè te bantai, ta hér skwi te mvèng kia te mvèng kia, da takaha ka a ta ngra ka skwi man a da ga ka.

¹⁴ Na haha, ta ara düsh pandar, vogwa a nde ta ma. Ta slaha ta mbelko nshèffè auda te ri vogwa azɓai; ndazliaʼa, a ta nzi a pa, a ta dzai, azɓai.

¹⁵ A ga ka lèmèlèmè a sam ngwozlazlihi ngaya, man ka ngeza a sam ta te gol ngaya. Ngiɗè a kèlè auna, ngiɗè a kèlè auna; ta slaha ta takaha ka ɓai, ko staɗ.