Esaie 46 - Ma Zhiklè

Mʼmbèh skwai, skwi ambalai

¹ Bel a nhurv na. Nébo a ngurɓahai. Ta vi skwi mbèh skwi tengaʼa a deɓ kɗèh, a deɓ zlugumai, a nzala ta kumba.

² Tèlèba ta hurv ta, a ngurɓ ta a hai, ta slaha ta zhüɓ skwi nʼnzala ɓai; a géɗ va tengaʼa ta dè dangai.

³ Kinè ndohi gi Jacob, va-tsena ma ga; a kinè njèkèɗi ndohi gi Israel tèlèba, man i takaha kinè daga man kin ya di ɓai, a i wara kinè dai daga nyakad kinè!

⁴ Ha kin hala ma, i gi lèmèlèmè; ha mokozlar te gèɗ kinè, i takaha kinè. I gau, te va nasa; i woya a i giaʼa, a ma ma. I takaha kinè, a i mbel kinè.

⁵ Kin humdyè, a kin lèmdyè, a va wa? Kin lèmdyè a wa, a nga gi lèmèlèmè a vna?

⁶ Tengaʼa man guro a verzhègenè te shiɗèf te gai, ta dè a sam ngwozla mviɗè guro a da viɗè zhiklè a guro; a ta kèlèhi a deɓ sak nengaʼa, a ta tsi ri a nengaʼa.

⁷ Ta feda a daʼai, a ta daʼa a sam nʼnzi na. A nza te pa, a gidè va auda a samaʼa azɓai. Ta baha na, a mbeɗa ta ma azɓai, a takaha ta te matakwan azɓai.

Zhiklè a rufa skwi na

⁸ Va-hur skwi haha, kin ndohi nlè-ɓèslɓiaʼa; va-mana ndav kinè!

⁹ Va-hur skwi nshèlèkuraʼa man a zhè tʼhinkaɗ na: Iyè Zhiklè, ngiɗè azɓai. Iyè Zhiklè staɗgenè, nlèmèlèmè ara iyè azɓai.

¹⁰ Tʼhinkaɗ na i njè kinè skwi man a da gai; halaʼa, man nʼnga di ɓai. I gaɗa: Skwi man i huro, i giaʼa; skwi man i woya a i giaʼa, i rufaʼa.

¹¹ I baha na ndo man ara mangayak te verzi gai, a i gi skwi a vna ara man i huro. Aman i goɗo, a shkè; i huro, a i gi arsa.

¹² Va-tsena ma ga, kinè man ndav kinè mʼmbeɗ na, man kinè dra a sam skwi mʼmbel ndo.

¹³ I herda kinè skwi mʼmbel ndo a tsagi ma, az dra ɓai. Skwi mʼmbel ndo ga a goko ndodoh azɓai. I va na skwi mʼmbel ndo a Israel te Sion, a Israel, nʼnjèl ga.