Esaie 45 - Ma Zhiklè

Zhiklè a gi mizlinè a Cyrus

¹ Ndo nzi pèc pècèk a ngaɗa na Cyrus, ndo man a bada na mbar a gèɗ: Ka man i gs ka te ri mandai, a i bazl ta ndohi herkeda a ma ngaya. I pra skwi deɓ bihai, a i winè ntamagi mpizlèa a ma ngaya.

² I woya a i dè a ma ngaya; i nde ta ngègèdhai a hai, i kuratsa ntamagi züdo, a i pasla skwi mɓèr ntamagi züdo.

³ I woya a i va ka skwi mèshèlè man ka sun ɓai, skwi mèshèlè nʼnghedaʼa, a ka da suna, iyè Ndo nzi pèc pècèk, man i baha ka a nzlembaɗ ngaya, Zhiklè Israel.

⁴ I baha ka a nzlembaɗ ngaya a géɗ Jacob, ɓèl ga, a géɗ Jérusalem, man i ngotskoɗauda. I va ka nzlembaɗ mbiaʼa, man ka senyè di ɓai.

⁵ Iyè, Ndo nzi pèc pècèk, ngiɗè azɓai. Zhiklè ngiɗè a tsagi ga azɓai. I mana ka skwi deɓ ngaya, man ka senyè di ɓai.

⁶ A ndohi tèlèba te civèɗ mvèng pats, ha civèɗ nkèl pats, ta suna, Ndo nzi pèc pècèk, iyè, ngiɗè azɓai, sèi iyè. Ndo nzi pèc pècèk iyè, ngiɗè azɓai.

⁷ I gi skwi nhél sam, i gi ruva, i tsi gumai, i vi matakwan, iyè Ndo nzi pèc pècèk, man i gi skwi haha tèlèba.

⁸ Giɗfèkihai, va-tkwoɗi ngi-zuraʼa a hai, a vanai va-dzurvkaɗi ngizuraʼa a hai! Herkeda da winè ma na, a skwi mbel ndo da ftsa, a ngi-zuraʼa i da gra te pa! Iyè Ndo nzi pèc pècèk, i gau arsa.

Zhiklè a mbeɗa na a ma Israel

⁹ Wobau a géɗ ndo man a gi ma a géɗ ndo nʼngau. Nengaʼa shiɗèf te va shiɗèfihai. Rɓasl a ngaɗa na ndo nrèmèʼa: Ka ga a haha mè, a gada na ɗè? Skwi man ndo ngiɗè a giaʼa, a gada na ndo ngiaʼa: Ri ngaya azɓai! – a gada na ɗè?

¹⁰ Wobau a géɗ ndo man a gada na bab na: Ka fiyè a hwadèhèmè? A gaɗa na ngwoz: Ka yi kra èhèmè?

¹¹ Ndo nzi pèc pècèk, Zhiklè Israel nkezlaʼa, nengaʼa man a nge ka, a gaɗa: Kin woy a kin dzhaɗyè a géɗ wudahi ga, a géɗ skwi man ri ga a ngau, a kin woy a kin fay ma a géɗ ɗè?

¹² I gau herkeda, i gau ndohi man a géɗ herkeda, ri ga a wuzhè giɗfèk, a i gaɗa ta golahi ga.

¹³ I baha na Cyrus a ma nzuraʼa, a i tila na civèɗ tèlèba. Nengaʼa a da ɗaɗaya kokwar ga, a da pre ta ndohi ɓèlè ga auda, a suli ka ɓai, a skwi mpil gèɗ ka ɓai, Zhiklè bi mbiaʼa a gaɗa.

Ndohi tʼherkeda ta njè Ndo nzi pèc pècèk

¹⁴ Ndo nzi pèc pècèk a gaɗa: Skwi ntul mizlinè ndohi Egypte, a gani kokwar Ethiopie a ndohi Saba, ngur-gurhiaʼa, a dè a sam ngaya, a gi a skwi ngaya. Ta dè a verzi ngaya a cèlèlèu te sak, ta da kèlèhi a deɓ sak ngaya, a ta kuɗi a sam ngaya: Zhiklè a zhè, sèi a sam ngaya genè Israel, a sam ngiɗè azɓai, Zhiklè ngiɗè azɓai.

¹⁵ A vava ka Zhiklè nʼnghedaʼa, Zhiklè Israel, Bi mʼmbel ndo.

¹⁶ Ndohi mayamhi ngaya tèlèba ta ngots hori a dai, gèɗ ta ndzakaɓ na. Ngwozlazlihi mʼmbèh skwai ta kal ta, ta ndara ta ndo-hai.

¹⁷ Ndo nzi pèc pècèk a mbel Israel, a mbelaʼa a mèdèp; kin ngècè hori a di azɓai a mèdèp.

Zhiklè staɗgenè

¹⁸ Aman Ndo nzi pèc pècèk, man a ngu giɗfèk, nengaʼa staɗgenè Zhiklè, man a ngau, a ndizla herkeda, a mpau; a gu a géɗ hèshèkèɗ ka ɓai, a gu a géɗ man ndo a nzi a pa. Iyè Bi Zhiklè, ngiɗè azɓai.

¹⁹ I goɗ a metsar ka ɓai, te ndev ruva ka ɓai. A ndohi te verzi Jacob i gaɗa ta ɓai: ko kin woy iyè, kin woy iyè ambalai. Iye Ndo nzi pèc pècèk, i gèɗè a nzuraʼa, i njè skwi man a da gi a vava.

²⁰ Va-ɓica va, vo-washkè, kin tèlèba! Va-herdeka va, kin njèkèdia ndohi herkeda man kinè a zhè a nshèffè dai. Tengaʼa man ta shèwèlè a vri te rai, man ta tsi ri a zhiklè mbèh skwai man a mbel ta azɓai, ta sun maya ɓai.

²¹ Vo-godo, va-ngreda, a ta cèmma a va ta. Nʼngreda ma haha halaki wa? Nʼnju ma haha halaʼa wa? Iyè Ndo nzi pèc pècèk ka ɓi ɗè? Iyè Zhiklè, ngiɗè azɓai, Zhiklè nzuraʼa, Zhiklè mʼmbel ndo, sèi iyè, ngiɗè az a tsagi ga ɓai.

²² Vo-ngwodko ndav a sam ga, aman i mbel kinè, kinè te verzi herkeda tèlèba. Aman Zhiklè, iyè, ngiɗè azɓai.

²³ I mbaɗa a ma ga, i goɗ zuraʼa te ma ga, ma man a fshè-wa azɓai. Gurmbèzhi tèlèba ta da gurɓè a sam ga, tèlèba ta mbèɗè te ma:

²⁴ Nʼngul skwai a wuɗai sèi te Ndo nzi pèc pècèk. Tèlèba man ta gu ndav a géɗ nengaʼa, ta da shkè a sam na, a ta gi horai.

²⁵ Ndohi te verzi Israel tèlèba ta da gi a ngul ndo-hai, a ta wuffè a géɗ Ndo nzi pèc pècèk.