Esaie 44 - Ma Zhiklè

¹ Aman anai, Jacob, ɓèl ga, a Israel, man i ngotskodauda, va-tse-naʼa!

² Ndo nzi pèc pècèk, man a nge ka, man a fe ka a hwaɗ mam ngaya, nengaʼa man a takaha ka, a gaɗa ka: ka gu zlau ɓai, Jacob, ɓèl ga, a Israel, man i ngotskoɗauda.

³ I da géj iyam a herkeda ngwo-raʼa, a iyam a hi a sam ngworaʼa. I da bèd Mèzhèɓ ga a gèɗ wudahi ngaya, a i pshè ta ma ndohi verzi ngaya,

⁴ a ta dai ara mandai a daʼar, ara wof a ma woyam.

⁵ Ngidè a da gaɗa: Iyè a Ndo nzi pèc pècèk! Ngidè a da cè nzlembaɗ Jacob. Ngidè ba a da windè a deɓ ri nengaʼa: Iyè a Ndo nzi pèc pècèk. A ta va na nshibèn nengaʼa Israel.

Zhiklè staɗgenè

⁶ Ndo nzi pèc pècèk, bi Israel, ndo mʼmbel nengaʼa, Zhiklè ndohi var, a gada: I ndo nshèlèkuraʼa, ndo nʼndikèma skwai; Zhiklè ngiɗè azɓai, sèi iyè.

⁷ Nlèmdè va a iyè wa? Da shkè, da goda da ngrayè! Da njoko skwi ntʼhinkaɗ na, da ngreda skwi man a di a shkè!

⁸ Kin gudzu ɓai, kin gu zlau ɓai! I senda kinè, i ngreda kinè nʼnzi a zhè ka ɓi ɗè? Kinè ndohi malwuɗihi ga! Zhiklè ngiɗè a zhè a tsagi ga ɗè? Sam ngedeng-gedengaʼa ngiɗè a zhi ɗè? I sun ngiɗè ɓai.

⁹ Ndohi nrèm vrai, ta tèlèba ndohi ambalai. Skwi man ta wuffè a géɗèʼa, skwi ka ɓai. Ndohi malwudihi tengaʼa, ta rka skwa ɓai, ta sun skwa ɓai, ta ngècè hori a dai.

¹⁰ A rèm vrai, a zlècèdè kwa ara mblom, man a takaha ndo azɓai, wa?

¹¹ Nahaha, ndo-hi vri tèlèba ta ngècè hori a dai, ndohi nroma tèlèba, ndohi genè. Ko ta haya tèlèba, a ta zlècè, ta da gudzai, a ta gi hori tèlèba.

Skwi mbèh skwai, skwi nrzlaʼa

¹² Ngwozla a viɗè skwi na te gezla a vo-var, a tsi a géɗ kwa, a tsi a ri ndaɓaraʼa, ko mi a hértèʼa, ko iyam a gworama na ndav.

¹³ Ndo mbèzl wof a livè a teɓa, a m vèhè skwi na, a pètè wof, a ɗèlè ara man a vöho, a gi mbiaʼa ara ndo, a lèmdè ara ndo aman a nzi a gai.

¹⁴ Ndo ngiɗè a ngi vozom, a iyam a ngrè. Pats ngiɗè a ngél wof, ko tèngètè, ko wof gagaɗ, a ɗaɗawaz, a mparka ta auda te va wofhi ngiɗè.

¹⁵ A ndohi ta ngècè shègwa, ta ngélèʼa, a ta dzi vogwa. Ngidè a ti ɗaf a vna, ngiɗè a pètè a zhiklè na, a kèlèhi a deɓ sak nengaʼa, a giaʼa, a tsi riaʼa.

¹⁶ Njèkèɗiaʼa a vècè vogwa a vna, a pin zluèɗ a ndazliaʼa, a ndi zluèɗ mpinaʼa a ngèzhè a hwaɗ. A dzi vogwa, a gada: Hem … vogwa a day a ndav du-hoʼa.

¹⁷ Njèkèɗiaʼa a pètè a zhiklè, a vrai, a tsi riaʼa a kèlèhi a deɓ sak nengaʼa, a kuɗi a sam na: Mbelyè, ka zhiklè ga!

¹⁸ Ta rka ɓai, ta sun nɗèlè ɓai, di tengaʼa ndahaʼa, ta rka ɓai, ndav ta a sun maya ɓai.

¹⁹ Ndohi ta hérè te gèɗ azɓai, ta ngècè maya te gèɗ a ta gèɗè azɓai: rèta i va-tsa vogwa a vna, a i pin zluèɗ a vna, a i ndau; a i da gi a njèkèɗiaʼa skwi horai, a i kèlèhi a deɓ sak godozlom wof ɗè?

²⁰ Ndo ngshè va a mèrwèc, ndav nengaʼa ngworaʼa a zlakeda. A mbela nshèffè na ɓai, a hérè azɓai: gar skwi man i gshè va a vna, skwi ncèkèlma ɗè?

Israel da huro!

²¹ Huro, Jacob, huro, Israel, ka ɓèl ga! I ge ka, ka ɓèl ga! Israel, i da pca ka a gèɗ ɓai!

²² I kalda mali ngaya ara vanai man kozlar a nkalda; i hela mphömè ngaya ara ndodok. Menkaɗa deɓa a sam ga; aman i sumka ka deɓa ma.

²³ Kinè gidfèkihai, va-gu langlangaʼa; aman Ndo nzi pèc pè-cèk a ngau. Kinè herkeda tʼhwaɗaʼa, va-wuffa! Kinè zahai, a wof nhayaʼa, a wofhi ngaya tèlèba, va-hazlawa a mwuffè! Aman Ndo nzi pèc pècèk a sumka Jacob a deɓa, a ngreda nʼnjèl na auda a sam Israel.

Skwi man Zhiklè a hérèʼa a géɗ Israel

²⁴ Ndo nzi pèc pècèk, man a mbel ka, man a fe ka a hwaɗ mam ngaya, a gaɗa: Ndo nzi pèc pècèk, man i gau skwi tèlèba, man i wuzhè giɗfèk kerpaʼa, iyè a géɗ ga, a i dizla herkeda – nga a wa?

²⁵ I gedassa ta njè-ma ndohi vri aussa. I ndede ta ndohi mpi kwa a madaɗauhai, a i wushede ta ndohi maya aussa, a i ndeda skwi man ta slebda ta ndohai a skwi nrzlaʼa.

²⁶ I nzala ma ɓèl ga, a i gi ara man ndohi sak ga ta goɗo. I gaɗa na Jérusalem: Ndo da nza a pa! I gaɗa ta kokwarhi Juda: Da ram kinè zaʼa! Gi man mʼmbeɗ na, da ɗaɗayda pa!

²⁷ A i gaɗa na iyam mbiaʼa: Gwor ngaya! A i gwora woyamhai.

²⁸ I gaɗa na Cyrus: Ndo mɓer skwi ga! Da rufa skwi than i woya tèlèba! I gaɗa na Jérusalem: Da ram ka zaʼa! A géɗ gi Zhiklè: Da ɗaɗayda pa!