Esaie 43 - Ma Zhiklè

Zhiklè a sumka ta ndohi Israel a deɓa

¹ Anai Ndo nzi pèc pècèk, nengaʼa man a fe ka, nengaʼa man a nge ka, a gaɗa ka, Israel: Ka gu zlau ɓai! I sumka ka a deɓa ma; i baha ka a nzlembaɗ ngaya, ka a ga.

² Aman ka bizhè a va iyam, i zhè a sam ngaya. Aman ka bizhè a ndev woyam, iyam a mbizhèma ka a pa azɓai. Aman ka bizhè a ndev vogwa, a la-war ka azɓai, nèʼèn vogwa a nde ka ma azɓai.

³ Aman iyè, Ndo nzi pèc pècèk, i Zhiklè ngaya. Iyè, Zhiklè Israel nkezlaʼa, man i mbel ka. I vi Egypte a skwi mpil gèɗ ngaya. I vi Ethiopie a Saba te di man a ngaya.

⁴ A géɗ man ka ara skwi man gani a pa kumba a sam di ga, skwi mbe-laʼa, a i woy ka a ndav ga, i vi kokwar-bi-hai a géɗ ngaya, a ndohi herkeda te di nshèffè ngaya.

Wuɗi Zhiklè a zhè aman a mbel ndo

⁵ Ka gu zlau ɓai; aman i zhè a sam ngaya. I da mendeka ta ndohi te verzi ngaya a deɓa te civèɗ mvèng pats, a i da ɓicka ta te civèɗ nkèl pats.

⁶ I da gèɗè te civèɗ man a géɗèʼa: Vo-pokoyè! Te civèɗ man a dukwad: Ka gse ta hi ɓai! Mendeka ta wudahi ga a deɓa te pa, a dalahi ga te verzi herkeda!

⁷ Ta tèlèba man ta co nzlembaɗ ga, man i pe ta, a i ge ta, a ta gi a nʼnjèl ga.

⁸ Va-helka ta mandazlihai man di ta a zhè, a ndaɓazlamhai man zlembaɗ ta a zhè, auda!

⁹ Kokwar-bihi tèlèba da ɓicko va, a ndohi herkeda tèlèba da humda va! A nhèdè ma haha te va tengaʼa wa? Nʼngreda nga skwi ngu nshèlèkuraʼa wa? Sèi ta zlècèdè malwuɗihai a ta mbelko gèɗ ta auda, a ta cinèʼa a ta gaɗa: Gok-wèn, a vava.

¹⁰ Kinè malwuɗihi ga, Ndo nzi pèc pè-cèk a gaɗa; ɓèl ga man i ngotskoɗauda, a ta hérèʼa, a ta ciyè a ndav, a ta suna, i Ndo nzi pèc pècèk, i nengaʼa, tʼhinèkaɗ na iyè Zhiklè, ngiɗè azɓai. Te deɓ ga, Zhiklè ngiɗè a shkè azɓai.

¹¹ Iyè, i Ndo nzi pèc pècèk, ndo mʼmbél ndo ngiɗè azɓai, sèi iyè.

¹² Iyè man i ngreda ta, i ge ta, i njè ta skwi mbel ndo. Zhiklè ngiɗè tsaɗ a te ndev kinè ɓai. Kinè malwuɗihi ga, Ndo nzi pèc pècèk a gaɗa, iyè Zhiklè.

¹³ Ko a ma ma i lèmèlèmè, ndo mʼmbelkaɗauda te ri ga azɓai. Iyè i giaʼa; nʼngwèdè wa?

¹⁴ Ndo nzi pèc pècèk, man a mbel kinè, Zhiklè Israel nkezlaʼa, a goɗ aranta: I zlindè ndohi var a kokwar Babylone, a ndohi tenga tèlèba ta hi ta auda a sam ta, a i ngwoda mwuffè ndohi Chaldée a wobau, a gèɗ kinè.

¹⁵ Iyè, Ndo nzi pèc pècèk, Zhiklè kinè nkezlaʼa, iyè man i gu Israel, iyè bi kinè.

Zhiklè a njè ta ndohi Israel

¹⁶ Ndo nzi pèc pècèk, man a mbazlda civèɗ a ndev woyam mbiaʼa, a mwinèʼa civèɗ te va iyam mbiaʼa, a goɗ aranta.

¹⁷ Nengaʼa man a nzlündo kiki var a ndohi plèsh a ndohi var a bihi sojè tèlèba; ta kala tʼhai, ta slèmbèɗè azɓai, ta mbats ta ara vogwa pitirla man teɓa a ndev na te pa.

¹⁸ Kin hur a gèɗ skwi nzlèzlèa ɓai, skwi nte deɓa kin hur ɓai!

¹⁹ Na haha i gi skwi mɓuaʼa. Anai a gi ma, kin rka ɓi ɗè? A vava, i bazlda civèɗ a hèshèkèɗ, a woyam a tsohi-tsoh.

²⁰ Skwi dak ta da sle-bardyè, nvalaval a zhèrèu. Aman i kèl iyam tʼhèshèkèɗ, a woyam a tsohi-tsoh, a i va ta iyam nsai a ndohi man i par ta,

²¹ ndohi man i ge ta a ndohi ga. Ta da njè ma ga te nshid gèɗ.

²² Jacob, ka mʼmbahay ka ɓai! Israel, ka geda matakwan a va a verzi ga ɓai.

²³ Tambak man ka zloho ka vay a iyè ka ɓai. Ka vay skwi a ka ndaray skwi ka ɓai. Skwi man ka va na Zhiklè, vodzok man a zhkè amba, i fa ka a gèɗ ɓai.

²⁴ Ka suma burdi a ka vay ɓai. Ka vay mbeza skwi ngaya ɓai. Sèi ka gay wuɗi a mali ngaya, a ka ngezyè a maharam ngaya.

²⁵ Iyè, i pana mali ngaya, a gèɗ ngaya ka ɓai, a gèɗ va ga; a i her mali ngaya te deɓaʼa asaɓai.

²⁶ Goɗo, aman a hakay a gèɗ, a ngo-do kita cèw. Ngreda kita ngaya, a ka tsko gèɗ ngaya auda!

²⁷ Babab ngaya ba a ngu malai, ndohi sak ngaya ta lèɓèslè a sam ga ɓai.

²⁸ Gar haha bihi mizlinè Zhiklè, sèi i rka ta ara ndohi nderda Zhiklè. I jè-keɗa Jacob a ri a ndohi man ta phömdèʼa, a Israel a ri a ndohi man ta dérɗèʼa.