Esaie 42 - Ma Zhiklè

Ɓèl Zhiklè, man Zhiklè a nʼngotskoɗauda

¹ Na haha ɓèl ga, man i gshè va a vna, man i ngotskoɗauda, man ndav ga a wuffè kumba a gèɗ nengaʼa. I va na Mèzhèɓ ga a gèɗ, a nengaʼa a da njè ta ma nzuraʼa a ndohi herkeda.

² Nengaʼa a bèhè a nhèzlèwè azɓai, ndo a cinè daʼai nengaʼa a dal kokwar azɓai.

³ A pèslè pandar ngurɓaʼa azɓai, a mbècè vogwa ndüzhoʼa azɓai. A da ma kita a ma nzuraʼa auda a gèɗ herkeda.

⁴ Nengaʼa a kéɗè gèɗ a hi azɓai, a pèslèʼa azɓai, ha a mpu saba ma nzuraʼa tʼherkeda tèlèba; a ndohi tʼherkeda te ndev iyam ta zhèr ma nengaʼa.

⁵ Zhiklè Ndo nzi pèc pècèk, man a ngau giɗfèk a wuzhè ker-paʼa, a mvau herkeda gedeng-gedengaʼa a gi a skwi a fcè te pa, man a gi a ndohi ta shèffè a pa.

⁶ Iyè, Ndo nzi pèc pècèk, i baha ka te nzuraʼa, i gs ka te rai, i til ka, i ga ka a ndo nderzla ma a ndohai, a skwi nhél sam ndohi herkeda.

⁷ A ka winè di mandazlai, a ka pra ta ndohi ndzawaʼa auda te dangai, a ka pra ta ndohi auda te ndev ruva.

⁸ Iyè, Ndo nzi pèc pècèk, nzlembaɗ ga Ndo nzi pèc pècèk. I vi nʼnjèl ga a ndo ngiɗè azɓai, i vi nslébèrdè ga a skwi mbèh skwi azɓai.

⁹ Skwi nshè-lèkuraʼa, anai nʼnga ma, i ngreda kinè skwi mɓuaʼa. Ga a fcè, i ngreda kinè lan-ga.

Dimèsh mɓua ʼa a Ndo nzi pèc pècèk

¹⁰ Va-sla na dimèsh mɓuaʼa a Ndo nzi pèc pècèk! Vo-slubordo ha ndè a verzi herkeda! Iyam mbiaʼa a skwi tèlè te pa, herkeda nte ndev iyam a ndohi man ta te pa, do slubordo Ndo nzi pèc pècèk!

¹¹ Hèshèkèɗ da wuffa, a ndohi man ta bizhè a pa, a gihi man ndohi Kédar te pa. Ndohi te za sèi da wuffa; va-guzlau te za!

¹² Sèi ta slébèrdè Ndo nzi pèc pècèk, a ta njè nʼnjèl nengaʼa tʼherkeda tèlèba man nte ndev iyam.

¹³ Ndo nzi pèc pècèk a dè a ma ma ara ngul ndo, ara ngul var a nslambaɗda ta ndohi ngiɗè, a ntsi tolom, a nguzli var, a gi ngul mayamhi na.

¹⁴ Nʼnzi a zhè i gada skwa ɓai, i nza tètè, i gerdda ma ga a hwaɗ; anai i woy a i tsi la-lau ara ngwoz man a yi kra, i tokossa va.

¹⁵ I woya a i gwora za a ngègèdhai, a kuza a pa a gwora tèlèba, a woya a gwor na, a nhèyè iyam a she na.

¹⁶ I gi a ndo nce ta ma mandazlihai, a i de ta a civèɗ man ta sun halaʼa ɓai. I woya a i hela ruva a ma tengaʼa, a i lèmdè sam kwa. Nasa skwi man i giaʼa, a i jèkè azɓai.

¹⁷ Taherda va ta a deɓa a ta ngècè hori a dai, ta tèlèba man ta dzodzor vrihai, man ta gaɗa ta skwi mbèh skwihai: kinè zhiklèhi nga!

Israel a gi mèdègèɗ genè

¹⁸ Kinè man kin tsena zlembaɗ ɓai, va-tsenaʼa! Kinè mandazlihai, va-rka dai!

¹⁹ Mandazli a wa, ɓèl ga ka ɓi ɗè? Ndaɓazlam man i zlündo ara ndo sak ga, wa? Mandazli, ara nengaʼa man Zhiklè nkezlaʼa, wa? Ndaɓazlam ara ɓèl Ndo nzi pèc pècèk, wa?

²⁰ Ka pu di a skwi kumba: aman ka rka skwa ɓai. Ka fu zlembaɗ, a ka tsena ɓai.

²¹ Ambaha Ndo nzi pèc pècèk, aman a va na nʼnjèl mbiaʼa a ma kita nengaʼa, a gèɗ nzlembaɗ na.

²² Aman anai, ndohi haha, metsarhi ta helama ta skwai, ndo ntakaha ta azɓai. Ta dzaw ta a gi za, a ta pizl ta a gi dangai, ta te ri me-tsarhai, ndo ntakaha ta azɓai. Ta ndeva-ma ta skwi ta, ndo a gaɗa: ckoɗa deɓa, azɓai.

²³ Te ndev kinè wa, man a woya a fi zlembaɗ a ma haha; ndo nhérè wa? A ngi may a a skwi man a di a shkè wa?

²⁴ A mva na Jacob a ri a metsarhai; a Israel a ri a ndohi nhelama ta skwi, wa? Ndo nzi pèc pècèk ka ɓi ɗè, man ta gu mali a sam na, man kin woy a kin dè a civèɗ nengaʼa ɓai, kin tsena ma kita nengaʼa ɓai.

²⁵ A géɗ nengaʼa a ga ta ndzoan a ndohi na, a matakwan var mwuɗitpa, a tèuda ta a pa ara nèʼèn vogwa, a fa na vogwa a skwi tèlèba; aman ta woy a ta hérè azɓai. Ko vogwa a nʼnde ta ma, ta héra te ndav ɓai.