Esaie 40 - Ma Zhiklè

Ma mbelaʼa a géɗ Sion

¹ Va-bid ta, va-bid ta ndohi ga! Zhiklè kinè a gaɗa.

² Va-gaɗa na kokwar Jérusalem, a kin pa ta ndav a pa. Va-njè ta: Mizlinè ɓèl tengaʼa a ndev na ma, mali tengaʼa mpela ma. Ta ngots kita sak cèw te ri Ndo nzi pèc pècèk, a géɗ mali tengaʼa.

³ Ndo ngiɗè a bèhè: Va-tila civèɗ Bi Zhiklè tʼhèshèkèɗ, va-lèmda na civèɗ a Zhiklè nga te dak!

⁴ Nkulgodokihai ta ɗa-ɗal ta, za a ngègèɗhai tèlèba ta da mbeɗka ta a hai, a kwazlazlam a ndi a sam tsuɗusl-tsuɗuslaʼa a lèmdè na, a kurzla-zli kwahai ta nde ta hai.

⁵ Aranta nʼnjèl Zhiklè a gudko va a dai, a ndohi tèlèba ta rkaʼa. Ma Ndo nzi pèc pècèk a ngoɗa.

⁶ Daʼai ngiɗè a gaɗa: Boho! A i gaɗa: I bèhè ma mè? Ndohi tèlèba ara kuza, a nʼnjèl tengaʼa tèlèba nara nwurzhè te gi dau.

⁷ Kuza a gwèr na, nwurzhè a wush na, man Mèzhèb Zhiklè a ftè a pa.

⁸ Kuza a gwèr na, nwurzhè a wush na; aman ma Zhiklè nga a nzi a mèdèp.

⁹ Ka man ka hada na ma mbelaʼa a Sion, do za ngurèa! Boho a wuɗai, ka man ka hada na ma mbelaʼa a Jérusalem! Ka goɗ a zlau bail Gaɗa ta kokwarhi te Juda: Na haha, Zhiklè kinè!

¹⁰ Na haha, Bi Zhiklè a shkè a wuɗai, a gi ɓai a ri nengaʼa man wuɗi na zhè. Na haha skwi ntul na a zhè a ma na.

¹¹ A wèr rèwè na ara ndo mɓer skwai, a humbètè wud tambakihi a ndav nengaʼa, a tiɓish ta a sam staɗ, a lè ta mam tambakihi zhèhèɗ-zhèhèɗèa.

Ngar Zhiklè azɓai

¹² Nliv iyam a hwaɗ ri wa? Nliv giɗfèk a zur pandar wa? Nliv wyak tʼherkeda a ngu guvda a ri wa? Nliv zahi a kilo nkelawa, a ngègèɗhai a kilo man a zhidè va, wa?

¹³ Nliv Mèzhèɓ Ndo nzi pèc pècèk a ri wa? Nʼngra na maya wa?

¹⁴ Nʼngra na maya haha, nʼngra na civèɗ kita, nʼngra na aman a nshin skwi haha wa?

¹⁵ Na haha, ndohi herkeda ta ara iyam man a tkwè a shiɗèf, ta ara lokotor a deɓ kilo. Na haha, herkedahai man ta tsoko gèɗ auda te iyam, nliv ta a fena tser wyak staɗ azɓai.

¹⁶ Liban a slra a shègwa ɓai, skwi dak te pa a slra a skwi nvi a Zhiklè ɓai.

¹⁷ Ndohi herkeda tèlèba a sam di nengaʼa ara skwi ka ɓai, skwi ambalai, ara man ta azɓai.

¹⁸ Kin woy a kin lèmdè Zhiklè a wa, a mèzhèɓ mè?

¹⁹ Ngwozla man a sun nrèm vrai, a rèmèʼa, a ngwozla nviɗè guro a mbèda guro a deɓaʼa, a pa na cirèɓ verzhègenè a va.

²⁰ Ndo man skwi na azɓai, a woy wof man skwi a ndia azɓai, a hèsh ngwozla man maya na zhè, man a sun nrèm vrai man a verzi tassaʼa.

Ndohi man ta pi di a verzi Zhiklè

²¹ Kin sun ɓi ɗè? Kin tsena ɓi ɗè? Ta ngra kinè halaʼa ɓi ɗè? Daga nhin herkeda kin sun ɗè?

²² Nengaʼa man a nzi a géɗ sam nʼnzi bi a géɗ herkeda ndalpangaʼa, a ndohi a géɗ herkeda ta ara dzarai, nengaʼa man a pi giɗfèk ara balak, a winèʼa ara man a wuzhè gi maslaka a nzi a pa.

²³ Nengaʼa man a bazl ta bihai, a ndede ta ndohi kita herkeda a skwi ambalai.

²⁴ Ta ge ta a patsna; ta zlekau a patsna, ta tsau zluzlor tʼherkeda. Aman a ftè ta, ta gwor ta, ndombozlor a hel ta a ma ara koskosai.

²⁵ Kin woy a kin lèmdyè a wa, a kin gaɗa, i lèmèlèmè ara nengaʼa? Zhiklè nkezlaʼa a gaɗa.

²⁶ Va-cid gèɗ a zhiklè, a kin da rkaʼa: Ngau skwi ar haha wa? Nde ta skwihi kumba man ta dè a haha wa? Mbaha ta staɗ staɗ a nzlembaɗ na, a gi a wuɗi nengaʼa mbiaʼa, aman ko staɗ a pceda deɓa ɓai, wa?

²⁷ Kinè ndohi Jacob, a ndohi Israel, kin gèɗè èhèmè: Civèɗ ga nʼnghedaʼa a sam Bi Zhiklè; ngi-zuraʼa ga bezaw bezawaʼa a sam Zhiklè ga.

²⁸ Kin sun ɓi ɗè? Kin tsena ɓi ɗè? Ndo nzi pèc pècèk, Zhiklè a mèdèp, nengaʼa man a gu verzi herkeda tèlèba. A ngézhè azɓai, ntulè a keɗaʼa azɓai, maya nengaʼa a hi ara iyam te woyam.

²⁹ A va ta wuɗai a ndohi man ta ngeza, a va ta wuɗai a ndohi man wuɗi ta azɓai.

³⁰ Golahi ta ngeza, a ta men ta a deɓa; ko ndohi var ta kèlèhai;

³¹ aman ndohi man ta pi di a verzi Zhiklè, ta ngècè wuɗi mɓuaʼa. Ta slèmbèɗè a kelpasl ar mangayak, ta hai a ta ngézhè azɓai, ta dè a ntulè a keɗ ta azɓai.