Esaie 38 - Ma Zhiklè

Ezéchias mbelakaɓai

¹ A pats sa, Ezéchias mbelakaɓai holholaʼa, a woya a ndivdè va. Esaie, kra Amots, ndo nhadka ma, a ndo a sam nengaʼa, a ngaɗa: Ndo nzi pèc pècèk a goɗ aranta: Njè ta ma a ndohi gi ngaya; ka da metsi ngaya, ka mbelè azɓai.

² Ezéchias a nʼngwoda va na a der-gai, a ntsu ri a Ndo nzi pèc pècèk, a ngaɗa:

³ Na haha, Ndo nzi pèc pècèk, heryè; i do a civèɗ ngaya a nlèɓèslè, a ndav tèlèba, a i gau skwi man ambaha ka te di ngaya. A Ezéchias a nkuɗau ngezlar-ngezlaraʼa.

⁴ Ndo nzi pèc pècèk a ngaɗa na Esaie:

⁵ Do a ka gaɗa na Ezéchias: Ndo nzi pèc pècèk, Zhiklè David, bab ngaya, a goɗ aranta: I tsena ntsi ri ngaya, i rka kuɗa a di ngaya, a i woya a i herdeka nshèffè ngaya a ma a gi mvi 15.

⁶ I woya a i mbel-ka kinè a kokwar haha auda te ri bi Assyrie, a i woya a i ɓer kokwar haha.

⁷ Na haha skwi man Ndo nzi pèc pècèk a ngre-da ka, a ka suna, ma man a ngoda, a da gi arsa.

⁸ Na haha, a sam man Achaz a dèl pats te mèzhèɓ, i woya a i herdaha mèzhèɓ a deɓa a deɓa a gi 10. A sam man ta dèl pats te pa, a nherdaha mèzhèɓ a deɓa a deɓa a gi 10.

Dimèsh Ezéchias

⁹ Dimèsh bi Ezéchias, bi Juda, man a mwindo, man mbelakaɓai, a mbelaʼa, te matakwan:

¹⁰ I gaɗa: Mʼmetsi a da keɗyè te gola; rèta mvi ga ngiɗè i da gi a sam mʼmetsai.

¹¹ I gaɗa: I da rka Ndo nzi pèc pècèk a ma azɓai a géɗ herkeda man ndohi ta zhè a nshèffè. I da rka ndo a géɗ herkeda a di ga asaɓai.

¹² Ta ndi gi ga, ta dè a sam ngiɗè ara ndohi nwèr skwai. Nshèffè ga ara maslaka man ndo ntsi maslaka a mpaɗaʼa, a nzlokodauda te gormbi ntsi maslaka. Pats a kalahay ɗè, sam a cidahay ɗè, i zhuwa a ma gi dzavai.

¹³ Ha ndè ma a prèk, i gi wobau, i kuɗai ara ma-rizhèlè, a paslay vatasl a va.

¹⁴ 1 kuɗi ciu-ciu ara mbèkbékèu, a i kuɗi ara nkudhom. Kuda a pay a dai. Ndo nzi pèc pècèk, wuɗi a gayè, takahayè!

¹⁵ Skwi man nengaʼa a ngau, i da gaɗa na ar i kè? Ndav ga a her gèɗ a i tara nzhun ɓai a géɗ kuda te ndav ga.

¹⁶ Ndo nzi pèc pècèk, i zhèr ka. Mbelyè, vakay nshèffè a deɓa!

¹⁷ A vava, skwi man a dzay te ndav ɗekeɗekeʼa, a nʼngwoda na a gumai; ka ngskay a deɓa a ma vèvèɗ mʼmetsai, man i woya a i kèlèhi a pa. Ka wusheda mali ga tèlèba a deɓ ngaya.

¹⁸ Sam mʼmetsai a wuffè a géɗ ngaya azɓai, mʼmetsai a slébèrdè ka azɓai. Ndohi man ta bazl ta, ta te vèvèɗ mpèltemtemaʼa, ta zhèr nlèbèslè ngaya azɓai.

¹⁹ Ndo man a zhè a nshèffè; sèi ndo man nshèffè na zhè, a nzai ka, lèmèlèmè ara man i gi a patsna. Bab kra a njè ta nlèɓèslè ngaya a wudahi na.

²⁰ Ndo nzi pèc pècèk, mbel nga! A nga woya a nga tsi ganzavar a ma gi Zhiklè, Ndo nzi pèc pècèk, a pats nshèffè nga tèlèba.

²¹ Esaie a ngaɗa: Va-kerɗa deɓ mbrom, va-pa na a ma mblè, a da mbel na. Ezéchias a gaɗa:

²² Skwi man a ngrayè, aman i dè a gi Ndo nzi pèc pècèk, mè?