Esaie 37 - Ma Zhiklè

Ezéchias a jhèɗè a Esaie

¹ Aman bi Ezéchias a ntsena ma haha, a nkuratsa maslaka nengaʼa, a mfeda maslaka sam kuɗa a va, a ndo a gi Zhiklè.

² A nzlinda Eliakim, ndo mɓer gi ɓai, a Shebna, ndo mwindè ɗèlèwèr, a ndohi mvi skwi a Zhiklè nhalaʼa, a maslaka sam kuda a va, a sam Esaie, ndo nhadka ma, kra Amots.

³ Ta gaɗa na: Ezéchias a goɗ arsa: A patsna, pats matakwan, a ndzoan, pats man ta derɗe nga. Pats nyi wudahi ma, wuɗi man ta jkaʼa azɓai.

⁴ Gar Ndo nzi pèc pècèk, Zhiklè ngaya, a ntsena ma bi sojè bai, man bi Assyrie, bi nengaʼa, a nzlündo, aman a ndérdè Zhiklè man a zhè a nshèffè, – a da ga na skwi ambaɓiaʼa a géɗ ma man Ndo nzi pèc pècèk, Zhiklè ngaya, a ntsenaʼa. Gar haha tsu rai a géɗ njèkèɗihiaʼa man ta zhè a nshèffè dai.

⁵ Aman ɓèlèlihi Ezéchias ta shkè a sam Esaie,

⁶ Esaie a ngaɗa ta: Va-gaɗa na bi kinè: Ndo nzi pèc pècèk a goɗ arsa: ka gu zlau ma man ka tsena ɓai, man golahi bi ta derɗyè a vna.

⁷ Na haha i woya a i da na mèzhèɓ ngiɗè, a cè ma nengaʼa, a minè a deɓa a kokwar na. Te pa i da kéɗèʼa a tsakwal.

Ezéchias a tsi ri a Zhiklè

⁸ Aman bi sojè ɓai a mshkè a deɓa a ngwai, a nʼngots bi Assyrie a gi var a Libna, te man a ntsena, ta da gi var a vna, a ta ɗaha va te Lakis.

⁹ A ntsena a géɗ Tiraka, bi Ethiopie, man ta gaɗa: A mdo a nda gi var a ka. Aman a ntsenaʼa, a nzlin-de ta ndohi sak a sam Ezéchias, a ngaɗa na:

¹⁰ Sèi kin gaɗa na Ezéchias, bi Juda, aranta: Ka zhor skwi te ri Zhiklè ngaya ɓai, nengaʼa man ka pi ndav a vna, a ka huro: Bi Assyrie a da ngècè Jérusalem azɓai.

¹¹ Ka ba ka tsena skwi man bihi Assyrie ta ga ta ndohi herkeda tèlèba, ara man ta venda ta gèɗ. A ka huro, ka da mbél ngaya ɗè?

¹² Zhiklèhi ndohi herkeda, man bababhi ga ta gedas ta, ta mbela kokwar ta ɗè? Gozan, Charan, Retseph, a ndohi Eden man ta zhè te Telassar?

¹³ Bi Hamath, bi Arpad, bi kokwar Sepharvaim, Héna, Ivva, ta tema?

¹⁴ Aman Ezéchias a nʼngots ɗèlèwèr te ri ndohi sak, a nteva a gi Zhiklè a géɗèʼa, a mwinè ɗèlèwèr a sam Ndo nzi pèc pècèk.

¹⁵ Ezéchias a ntsu ri a Zhiklè:

¹⁶ Ndo nzi pèc pècèk, Zhiklè bi mbiaʼa, Zhiklè Israel, man ka nzi a géɗ sam nʼnzi ɓai a géɗ cherubimhai. Ka staɗ ka Zhiklè a géɗ kokwar-bihi tʼherkeda tèlèba. Ka gu giɗfèk a herkeda.

¹⁷ Fu zlembaɗ a ka tsenaʼa! Pu di a ka rkaʼa! Tsun ma man Sanchérib a zlündo a haha, a nderɗe Zhiklè man a zhè a nshèffè a vna.

¹⁸ A vava, Ndo nzi pèc pècèk: bihi Assyrie ta gedas-sa ndohi herkeda a kokwar-bihi tengaʼa tèlèba.

¹⁹ Ta wusheda zhiklèhi mbèh skwi tengaʼa a vogwa. Tengaʼa Zhiklè ka ɓai, sèi skwi man ri ndo a ngau, wof a kwa. Skwi man ta slaha ta gedassaʼa.

²⁰ Anai, Ndo nzi pèc pècèk, Zhiklè nga, mbel nga te ri nengaʼa; a kokwar-bihi a géɗ herkeda tèlèba ta shinèʼa, ka staɗgenè Ndo nzi pèc pècèk, man ka Zhiklè.

Zhiklè a mbeɗa na a ma Ezéchias

²¹ Esaie, kra Amots, a nzlündo ndo a sam Ezéchias, a ngaɗa na: Ndo nzi pèc pècèk, Zhiklè Israel, a goɗ ar haha: Skwi man ka dzhoɗo a géɗ Sanchérib, bi Assyrie, i tsenaʼa.

²² Na haha ma man Ndo nzi pèc pècèk a goɗ a géɗ nengaʼa: Bidalai, dem Sion a rka ka ara zai, a ngwossaha ka. Dem Jérusalem a geda gèɗ kwota-kwotaʼa te deɓ ngaya.

²³ Ka ngwossaha wa, ka derɗe wa, ka gaɗa na ma nfi va a wa, ka paka na di nfi va a wa? A Zhiklè Israel nkezlaʼa.

²⁴ Ka zlindeka ta ɓèlèlihi ngaya a ta derɗyè, a ka gaɗa: A kikihi ga man ta zhè kumba sa, i dè a géɗ za, a verzi Liban tèlèba. I ngela wof nhayaʼa a wof mparaʼa te pa, a i dè a géɗèʼa, a i tsi gèɗ auda te ndev gi lak nengaʼa.

²⁵ I ri vèvèɗ a i si iyam ndohi kokwar ngiɗè, a i gwora woyam Egypte tèlèba tʼhwaɗ sak ga.

²⁶ Ka tsena ɓi ɗè? Daga nʼnzi a zhè, i hur arsa; i peda saba a hi halaʼa. Anai i gia ma, kokwar mbiaʼa, nʼnzalaʼa, ta nde-da kwazlazlam ambaɓiaʼa.

²⁷ A ndohi man ta nza te pa, ndohi man wuɗi ta azɓai, ta gi zlau a ta ngècè hori a dai. Ta ara kuza gi dau, ara kuza man a ftse tok-tok, ara kuza man a ftse a géɗ gai, ara dau man vogwa a ndeda ma. I suna aman ka slèmbèɗè,

²⁸ i suna aman ka nza tʼhai, i suna aman ka dè, i suna aman ka shkè, i suna aman ka gi ndzoan.

²⁹ A géɗ man ka gay ndzoan, a i tsena ara man ka fi va a sam ga, i woya a i tuma ka dasi a htsan, a i va ka dzala a ma, a i da ngazl ka a civèɗ man ka bezkaɗa pa.

³⁰ Na haha skwi man a da ngra ka arsa: A vi na, ta ndi skwi man nwusha tʼhai. A tèra, ta da ndi tsatseriaʼa. A tèrauta, va-wushe skwai, va-ɓica skwai, va-gau gi lak, va-ndau skwi te pa!

³¹ Njèkèɗia ndohi te Juda, man ta zhè a nshèffè dai, ta da tsi te zluzloraʼa zaʼa, a yiè a géɗèʼa.

³² Aman njèkèdia a zhè, aman a da shkè te Jérusalem, a ndohi man ta hu ta a ta mbel ta te za Sion. Srak Zhiklè bi mbiaʼa a da gi arsa.

³³ Gar haha Ndo nzi pèc pècèk a goɗ a géɗ bi Assyrie aranta: A da shkè a kokwar haha azɓai, a da ɓèr sulom te pa azɓai, a gidè gambar te pa azɓai, ta ngèlè a pa a zlazlar azɓai.

³⁴ A dè minè a deɓa a civèɗ man a bezkaɗa pa; aman a kokwar haha a da shkè azɓai, Ndo nzi pèc pècèk a gaɗa.

³⁵ I woya a i ɓer kokwar haha, a i takaha, a gèɗ nzlembaɗ ga, a géɗ David, ɓèl ga.

Zhiklè a bazl ta ndohi Assyrie

³⁶ Gol Ndo nzi pèc pècèk a mdo, a mbazl ta ndohi var Assyrie 185.000 a sam man ta mana a pa. Te mangoslèmaʼa, tèlèba ta bazl ta ma, sèi nckondohi mènè.

³⁷ Sanchérib, bi Assyrie, a nslambaɗa, a ndo a deɓa a ngwai, a nʼnza te kokwar Ninive.

³⁸ Pats ngiɗè, aman a ntsu ri te gi zhiklè mbèh skwi Nisroc, wudahi nengaʼa, Adrammélec a Sharetser, ta keɗaʼa a tsa-kwal. A ta hu ta a kokwar Ararat. Esar-Haddon, kra nengaʼa, a ngu bi te di man a na.