Esaie 36 - Ma Zhiklè

Sanchérib a gi var a Juda

¹ Aman bi Ezéchias a ngu bi mvi 14 ma, Sanchérib, bi Assyrie, a mdo a ngu var a nduma kokwarhi Juda man ta ngala te pa.

² Bi Assyrie a nzlinda bi sojè te Lakis a kokwar Jérusalem, a sam bi Ezéchias, a ndohi var kumba a verzi nengaʼa, a nɗaha va a ma iyam nhayaʼa te géɗèʼa, a sam gi dau ndo nligüɗè skwai.

³ Eliakim, kra Hilkija, ndo mɓer gi ɓai, a Shebna, ndo mwindè ɗèlèwèr, a Joach, kra Asaph, ndo mɓer ɗèlèwèr, to do auda a sam na.

⁴ Bi sojè a ngaɗa ta: Va da menda na Ezéchias: Bi Assyrie, bi mbiaʼa, a goɗ aranta: Ka gshè va a wa?

⁵ Ka hur, ngèɗè te ma ambali a ngra ka maya, a va ka wuɗi a ngi var ɗè? Ka jèkyè a ka gshè va a wa?

⁶ Na haha, ka gshè va a pandar ngurɓaʼa, ka gshè va a Egypte, man ko wawa man a thè va a vna, a tizhè riaʼa, a tsi gèɗ auda. Pharaon, bi Egypte, a gu arsa a sam ndohi tèlèba man ta gso va a vna.

⁷ Aman agassa ka gaɗayè: Nga pi ndav nga a Ndo nzi pèc pècèk, Zhiklè nga – nengaʼa ka ɓi dè, man Ezéchias a ngedassa sam mvi skwi a nengaʼa, a kwa nzlatseda, a ngaɗa na Juda a Jérusalem: Sèi kin tsi ri a sam mvi skwi a Zhiklè haha!

Sanchérib a titka ta a gèɗ

⁸ Anai, va-tsu gèjau a bi ga, bi Assyrie: I woya a i va ka plèshihi 2.000. Ka slaha ka pi ndohi nʼnzi a deɓ plèsh ɗè?

⁹ Ka woy a ka dzama ntabaw ɓèl bi ngaya, ko staɗgenè ɗè? Ka gshè va a Egypte a géɗ kiki var a ndohi plèsh nengaʼa ɗè?

¹⁰ I shkè a i gi var a kokwar haha, aman i gé-dèshèʼa, ara man Zhiklè a woya ka ɓi ɗè? Zhiklè kinè a ngaɗayè: Do a ka gu var a kokwar sa, a ka gedassaʼa!

¹¹ Eliakim, Shebna a Joach, ta gada na bi sojè ɓai: Gaɗa ta ɓèlèlihi ngaya a daʼai aramée, nga cinèʼa. Ka gaɗa nga a daʼai judée ɓai, mah ɓai ndohi a ma zlazlar kokwar tèlèba ta tsenaʼa.

¹² Bi sojè ɓai a mʼmbeɗa ta a ma: Bi ga a nzlindkayè, a i gaɗa na bi ngaya, a i gaɗa na bi kinè ɗè, i gaɗa ta ndohi a ma zlazlar ka ɓi ɗè? Tengaʼa man ta si zai a kuri a sam kinè?

¹³ A bi sojè a nshkè a mboho a wuɗai a daʼai judée: Va-tsena ma bi mbiaʼa, bi Assyrie!

¹⁴ Bi a goɗ arsa: Kin va na civèɗ a Ezéchias, aman a nda ngwode kinè ɓai! Nengaʼa a slaha a mbel kinè azɓai.

¹⁵ Aman bi Ezéchias a da bid kinè a nzlembaɗ Zhiklè, a gaɗa: Ndo nzi pèc pècèk a da mbel nga a vava, kokwar haha a nzi a ri a bi Assyrie azɓai, kin fa na gèɗ ɓai!

¹⁶ Kin co ma Ezéchias ɓai! Aman bi Assyrie a goɗ arsa: Ngo-tsokoy gumai, va-shkè kinè a va iyè! Staɗ staɗ te ndev kinè a da ndi dau te gi dau na, a ndi nyi wof barassa a nyi wof kslor na, a si iyam thal na,

¹⁷ ha pats man i shkè a i da hil kinè a kokwar ngiɗè man lèmèlèmè ara kokwar kinè, man dau a barassa, man movar a gi wof barassa a ndev ɓi te pa.

¹⁸ Kin va na civèɗ a Ezéchias a ngwode kinè ɓai, man a gada: Ndo nzi pèc pècèk a da mbel nga. Kin ngots zhiklèhi ndohi herkeda tsaɗ tsaɗ man ta mbel ta kokwar tengaʼa te ri bi Assyrie ɗè?

¹⁹ Zhiklèhi Hamath a Arpad, ta tema? Zhiklèhi Sepharvaim, ta tema? Ta mbela kokwar Samarie te ri ga ɗè?

²⁰ Te va zhiklèhi kokwar haha tèlèba, man a mbela kokwar na te ri ga, wa? A Zhiklè kinè a dè mbél kokwar Jérusalem te ri ga ɗè?

²¹ Aman ta nza tètè tèlèba, ta mbeɗa na a ma ɓai. Bi a mfa ta ma a gèɗ: Kin da mbeɗa na a ma ɓai!

²² Eliakim, ndo mɓer gi ɓai, kra Hilkija, a Shebna, ndo mwindè ɗèlèwèr, a Joach, kra Asaph, ndo mɓer ɗèlèwèr, ta shkè a sam Ezéchias, a maslaka nkuratsaʼa a va, a ta menda na ma man bi sojè bi a goɗa.