Esaie 35 - Ma Zhiklè

Matakwan ndohi Zhiklè klèng

¹ Hèshèkèd, a herkeda ngworaʼa, da wuffa! Mohozo gi dau da shüd gèɗ, da dzuv skwai! Da dzuva ara nwuzad!

² Da dzuv skwai, da wuffa, da wuffa, da shüd gèɗ te pa a yata! Zhiklè a da va na nʼnjèl Liban, mbambi Carmel a mbambi Saron. Ta da rka nʼnjèl Ndo nzi pèc pècèk, nʼnjèl Zhiklè nga mbikaɓai.

³ Va-sala ri man a wush na hai, va-sala gurm-bèzhi man ntulè a keɗ ta.

⁴ Va-gaɗa ta ndohi man ndav ta mʼmbeɗ na: Va-sassaya di kinè, kin gu zlau ɓai! Na haha Zhiklè kinè! A shkè a mpil gèɗ ndohai, a jhèɗè skwi mpil gèɗ, nengaʼa a shkè a ntakaha kinè a ri na.

⁵ Te deɓaʼa di ndohi mandazlai a win na. Zlembaɗ ndohi ndaɓazlam a win na.

⁶ Te deɓaʼa ndo vedal a hi ara mènèɗ. Nèʼèn ndo ɓagga a pre na a sli dimèsh. Tʼhèshèkèɗ nlèlè iyam a hi auda, a iyam a tsoko gèɗ auda a tsohi-tsoh.

⁷ Wyak nwotwotaʼa ara vogwa a nʼnge na a sam nhèyè iyam; herkeda nʼngwora kusalaʼa a nʼnge na a nlèlè iyam. Tʼhwaɗ wof ntus-tusaʼa man gi nvalaval te pa, cénjè-ra a wasla ta grè a pa.

⁸ Civèɗ mʼmbazla te pa, man ta baha na civèɗ nkezlaʼa. Ndo man ambaɓai a dè a pa azɓai. Civèɗ man ndohi nengaʼa ta da bizhè a pa. Ko ndo man maya na azɓai, a zi te pa azɓai.

⁹ Ma-rizhèlè a te pa ɓai, skwi dak a bizhè a pa azɓai, kin zli gèɗ a skwi dak te pa azɓai. Sèi ndohi man Zhiklè a sumka ta a deɓa, ta bizhè a pa,

¹⁰ a ndohi man Zhiklè a mpreka ta auda, ta menkaɗa deɓa a ngwi a Sion. Ta hèzlèwè, a mwuffè a hela ta te di dzayaʼa, man a ndiv azɓi a mèdèp. Mwuffè a pombai a feda ta ma; matakwan a nlèyè ta kal ta.