Esaie 33 - Ma Zhiklè

Zhiklè nʼnzalaʼa

¹ Wobau a géɗ ngaya, ndo nge-dassa skwai, aman ka, ka gedassa ɓai! Wobau a géɗ ngaya, ndo metsar, aman ta ga metsar a skwi ngaya ɓai! Aman ka gedassa skwi klèng ma, ta da gedas ka. Aman ka ga metsar klèng ma, ta da gi metsar a sam ngaya.

² Ndo nzi pèc pècèk, nga da se ka te va! Nga pi ndav nga a ka. A nciɗ sam a nciɗ sam, takaha nga! Mbel nga te matakwan!

³ Ndohi herkeda ta hi ta a ntsi iyam; man ka slambaɗa, ta venda gèɗ ta.

⁴ Ta ndeda skwi ta a ma ara ntandla, a ta gi gazawa a géɗèʼa ara dzarai.

⁵ Ndo nzi pèc pècèk mbiaʼa, a nzi te zhiklè te géɗèʼa, a ndha Sion a ngi-zuraʼa, a kita zuraʼa.

⁶ Ka da nzi ɓar-ɓararaʼa. Nshin skwai, verzi skwi mèshèlè mbél ndo. Zlau Ndo nzi pèc pècèk, skwi mèshèlè Sion.

Ngi-zuraʼa te ndev mphömè

⁷ Na haha, ngul ndohai ta gi wobau tʼuda, a ndohi sak gumai ta kuɗi heɓek-heɓekaʼa.

⁸ Civèɗ nʼnde na ara civèɗ hèshèkèɗ, ndo a shèwèlè a pa azɓai. Nderzlè-ma mpraʼa, ndohi ta derɗe kokwar, ta rka ndo ara koskosai.

⁹ Herkeda a lèyè, a gwor na. Liban a gi horai, a metsi na. Saron nara hèshèkèɗ, wof a te pa ɓai. Basan a Carmel, vahaʼa a wush na.

¹⁰ Ndo nzi pèc pècèk a gada: Antanta i woy a i slèmbèɗè. I slèmbèɗè a i zlècèdè va.

¹¹ Kinè a mandi a ksof tʼhwaɗ, kin thè auda ara düsh pandar. Nshèffè man kin soff-koɗauda te ma, a nde kinè a ma ara vog-wa.

¹² Ndohi man a nde ta a ma, a ndar ta ara hutsoɗ, ara vatak nʼngelaʼa man vogwa a zlèzlèmè a pa.

¹³ Kinè ndohi ndraʼa, va-tsena skwi man i gau! Kinè ndohi ndul ndulaʼa, va-sun wuɗi ga!

¹⁴ Ndohi malai ta gudzi te Sion. Nder-kèzhè ndohai ta gi gurts te va tengaʼa. Ta jhèɗèʼa: Nslaha a nzlècè a tsagi nèʼèn vogwa wa? Nslaha a nzlècè a tsagi vogwa man a mbècè azbi a mèdèp, wa?

¹⁵ Nen-gaʼa man a dè te ngi-zuraʼa, man a gèɗè ma nzuraʼa, man a kwola gani ngi ri, man a hela ri na a nkwola skwi man ta woy a ta ruɓè a vna, man a ndè zlembaɗ na, a woya a ncinè tsaval ndohi nkeɗe ndo ɓai, a pizlè di na, a woya a nrka mali ɓai.

¹⁶ Nenga a da nzi a géɗèʼa, gi nengaʼa a sam nlèaʼa te za, movar a iyam a ndiv a sam nengaʼa azɓai.

¹⁷ Di ngaya ta da rka ɓai te mbambi nengaʼa. Ka ngél di a géɗ herkeda dra.

¹⁸ Ndav ngaya a hér pats man ka gudzu a pa halaʼa: Ndo man a ngra suli, na tema? Ndo man a lüv skwai, na tema? Ndo man a wor golahai, na tema?

¹⁹ Tsokoɗof ndohai ka da rka ta te deɓaʼa asaɓai, ndohi man daʼai tengaʼa tsaɗ, man ndohi ta tsena ɓai, man ta ɓerɗa nèʼèn te ma ndo, a slaha a ncinè ɓai.

Zhiklè, bi nga

²⁰ War Sion, kokwar ngolala nga! Di ngaya a da rka kokwar Jérusalem, sam man ka nzi a pa ɓar-ɓararaʼa. Ka rkaʼa ara gi man ta mbeɗè a hi azɓai, man ta pelèshè azɓai, a skwi a ndi hubat nenga azɓai.

²¹ Te pa Ndo nzi pèc pècèk nʼnzalaʼa a vata a sam di nga. Nlèlè iyam mwi-nèa, aman ta wurr wurom a pa azɓai, wurom mbiaʼa a shèwèlè a géɗ nengaʼa azɓai.

²² Aman Ndo nzi pèc pècèk man a gi kita nga. Ndo nzi pèc pècèk, nengaʼa a da mbel nga.

²³ Gada wurom mʼmana ɓai, teɓa ngédè wof a hi azɓai, a kozlar a slaha a gidè bata azɓai. Te deɓaʼa manda-zlihai ta kezli skwi man ta heldama, a ndohi vedal ta hil skwi te pa.

²⁴ Ndo man a gaɗa: i mbelakaɓai, az te kokwar ɓai. A ndohi te kokwar Jérusalem, mali tengaʼa mpraʼa.