Esaie 32 - Ma Zhiklè

Ngi-zuraʼa a zhè

¹ Na haha bi ngiɗè a da gi ɓai te ngi-zuraʼa, a wud bihai ta takaha bi zuraʼa.

² Staɗ staɗ tèlèba ta ara sam nlèaʼa te ri ndombozlor, ara bodom te ri iyam, ara woyam a sam ngworaʼa, ara za mbiaʼa man a pa na mèzhèɓ a di a herkeda ngworaʼa harkangkangaʼa.

³ Ndohi man di ta a zhè, skwi a ndèma ta di asaɓai. Ndohi man zlembaɗ ta a zhè, ta fi zlembaɗ.

⁴ Fali ndohai ta shinè maya, a nèʼèn ndaɓazlam a gèɗè tsarayaʼa, nzlerɗak a te pa ɓai.

⁵ Ndo man maya na ambaɓai, ta sla na ndo mbelaʼa te deɓaʼa asaɓai. Ta sla na nderkèzhè ndo, ndo mbiaʼa te deɓaʼa asaɓai.

⁶ Aman ndo man maya na ambaɓai, a gèɗè ma madadau, a ndav nengaʼa a her skwi ambaɓiaʼa. A gi skwi a shèwa, a cèkèlma a gèɗ Ndo nzi pèc pècèk, a va na skwi a ndo man mi a keɗaʼa azɓai, a va na iyam a ndo man iyam a dza na azɓai.

⁷ Skwi man nderkèzhè ndo a gi mizlinè a vna, ambaɓai. A hèsh maya nzlai, a gedas ta ndohi ntawassaʼa a ncèkèlma, ko mbelawa sa a goɗ a nzuraʼa.

⁸ Aman ndo mbelaʼa a hér skwi mbelaʼa, a gi skwi mbelaʼa.

Pats mai – pats nwèl va

⁹ Kinè ngwozi man kin tskwasl-kaɗauda ɓai! Va-slambaɗa, va-tsena daʼai ga! Kinè zukom dalahai! Va-tsena ma ga!

¹⁰ A tèra, kin da gudzai, kinè zukom dalahai! Aman ta da pèr nyi wof asaɓai, ta tsi dau asaɓai.

¹¹ Kinè man kin hér gèɗ zlau azɓai, va-gudzau! Zukom dalahai, va-gu zlau! Va-suda na maslaka auda a va, va-nza adai, sèi skwi deɓa genè!

¹² Va-peda ri a gèɗ, va-kuɗau a géɗ gi dau, a géɗ wof mbelaʼa te gi lak,

¹³ a géɗ herkeda ndohi ga, man vatak a nkuɗdzarai ta pizlèda pa. Va-kuɗau a géɗ gihi man mwuffe te pa, a géɗ kokwar man ta gi ngolala te pa.

¹⁴ Aman gi bihi nʼnde na a dikai. Nhèzlèwè kokwar klèng, ko kuda ɗiak a cinè te pa azɓai. Gi ngurèʼa a ma ntskal a nʼnde na hi ara dala ambalai. Skwi dak a wuffè te pa, skwi kuɗom a ndi mandi a pa,

¹⁵ ha pats man mèzhèɓ a shkèhi te géɗèʼa a géɗ nga. Te deɓaʼa tazli hèshèkèɗ nʼngwoda a gi dau, a gi dau nʼngwoda na a gi lak.

¹⁶ Te deɓaʼa kita nzuraʼa a nzi tʼhèshèkèɗ, ngi-zuraʼa a nzi te gi dau.

¹⁷ Ngi-zuraʼa a cko gumi auda, nyi ngi-zuraʼa, nengaʼa man ta nzi ɓar-ɓararaʼa a mèdèp.

¹⁸ A ndohi ga ta da nzi a sam gumai, a gi man skwa a ga ta te pa azɓai, a sam man ta nzi ɓar-ɓararaʼa.

¹⁹ Vandzal a gédèshè gi lak, kokwar a mʼmbeɗ na hai;

²⁰ aman m wuffè a sam kinè, aman kin zlekai a ma woyam tèlèba, a kin pra zlè a kɗèh a sam tèlèba.