Esaie 30 - Ma Zhiklè

Egypte a takaha ndo azɓai

¹ Wobau a géɗ wudahi man ta tse-na gèɗ ɓai, Ndo nzi pèc pècèk a gaɗa. Man ta gi skwi man i hur ka ɓai, ta derzla ma, aman te Mèzhèɓ ga ka ɓai, a ta tsama na malai a deɓ malai.

² Ta dè a kokwar Egypte, a ta dzhaɗa a sam ga ɓai, a ta woya a ta nzi tʼhwaɗ ri Pharaon, a ta hèsh mèzhèɓ Egypte, a ta nzi a verziaʼa ara mèzhèɓ wof.

³ Aman ri Pharaon man kin nzi tʼhwaɗaʼa a da pa kinè hori a dai, a mèzhèɓ Egypte man kin nzi a verziaʼa a da ga kinè matakwan.

⁴ Bihi nengaʼa ta dè tar Tsoan, a ndohi sak nengaʼa tar Hanès.

⁵ Aman ndohi ta takaha ta azɓai, ta da ta a va azɓai, ta ngècè skwi a sam ta azɓai, sei hori a di genè, hori a keɗ ta a vèvèɗ.

⁶ Ma a géɗ skwi dakhai te Négeb: Ta da bizhè a ndev kokwar man zlau a nlèyè te pa, man marizhèlè a ngwoz na ta kuɗi te pa, man ndemhal a ntümsho te pa; a ta da skwi ta a deɓ kɗèh a skwi mèshèlè tengaʼa a deɓ zlugumai a sam ndohi man ta takaha ta azɓai,

⁷ a sam ndohi Egypte. Aman skwi Egypte, man ta hur a da takaha nga, skwi ambalai, skwi ntakaha ta ka ɓai. Gar haha i baha na: Rahab, man ta tseda na ma a pa.

⁸ Anai do, windeda wof a sam di ta, windeda ɗèlèwèr, a da gi a malwudi pats ngiɗè a mèdèp.

⁹ Ta ndohi man ta tsena gèɗ ɓai, wudahi ncèkèl-ma, man ta fi gèɗ a ma kita Ndo nzi pèc pècèk azɓai,

¹⁰ man ta gada ta ndohi nsun skwai man a da gi a ma ma: Kin sun skwa ɓai! Kin hodko nga ma ɓai! Vo-hodko nga ma man ambaha nga a zlem-bad nga! Vo-hodko nga ma nzlai!

¹¹ Va-jèkeda civèɗ, va-beza zlawa, kin slefa nga Zhiklè Israel nkezlaʼa a tsagi nga ɓai!

Zhiklè a zhèrèʼa

¹² Gar haha Zhiklè Israel nkezlaʼa a goɗ aranta: A géɗ man kin kwola ma haha, a kin pi ndav a civèɗ ndzaraʼa nlèwèɗè nlèwèɗè, a kin gshè va a vna,

¹³ mali haha a gi a sam kinè ara zlazlar ngurèʼa, man a woɓ na, tsam-tsam mʼmbeɗ na;

¹⁴ Mʼmbeɗ na ara shiɗèf man a buh na, man mbazla wèc-wècèʼa, ko kizlèɗ man ta hil ndazli vogwa te rèwèc a vna, a ta ɓèl iyam a pa a wotsakihai, azɓai.

¹⁵ Gar haha Ndo nzi pèc pècèk, Zhiklè Israel nkezlaʼa, a goɗ aranta: Aman kin menkaɗa deɓa a kin nza, kin da mbél kinè. Aman kin nzi tètèʼa, a kin pi ndav a Zhiklè, kin ngècè wuɗai; aman kin woya ɓai,

¹⁶ a kin gada: Aʼai! Ngawoy anga hi a deɓ plèsh! Gar haha ndohi mparaha kinè ta hi a verzi kinè.

¹⁷ Ndohi gozhèm gozhèm kumba ta da hi ta auda a sam ndo staɗ man a guv ta. Kin hi kinè a sam ndohi zlam man ta guv kinè, skwi ngiɗè a jèka a sam kinè azɓai, sèi bata kinè a géɗ za, a ndohi ta sen kinè te pa.

¹⁸ Ko gar haha Ndo nzi pec pecek a zhèrèʼa, a woya a nva kinè pombi genè. A slèmbèɗè, aman kin sia te va. Aman Ndo nzi pèc pècèk, Zhiklè ngi kita nzuraʼa. Mwuffè a sam ndohi tèlèba man ta zhèrèʼa te ndav!

Jérusalem a da ngècè mpshè ma

¹⁹ Kinè ndohi Sion, man kin nzi te Jérusalem, kin da kuɗi a ma ma asaɓai. Kin da si Zhiklè te va, aman kin da kuɗi a sam na; ncin na, a cèʼa.

²⁰ Aman Zhiklè a mva kinè matakwan ara movar, a iyam a kala kinè a ndav genè; aman nengaʼa man a slebda kinè ani a nghédè va asaɓai. Di kinè ta da rkaʼa pèc pècèk.

²¹ Aman kin nza te ndev civèɗ: i dè a civèɗ ri man-di dè, dè i dè a civèɗ ri gula ɗè? – a di kin tsena ngèɗè te deɓ kinè man a gaɗka kinè a zlembaɗ: Na haha civèɗ, va-dzodzora!

²² Te deɓaʼa kin da rka skwi mbèh skwi verzhègenè, a mblom mbèʼa te pa a guro, ara skwi nlizhèʼa, a kin da wushedaussa ara skwi man a ndara kinè, a kin gaɗa: Vo-do aussa!

²³ Zhiklè a da vi iyam nzlekai, a dau te gi dau a gi ngurlaklakaʼa, nhuɓalaʼa. Skwi kinè a da ndi mandai a pats nasa a dalbara mbiaʼa.

²⁴ Zlè a kɗèh man ta pizhè a vna, ta da ndi ksof a blèm mpshèʼa a pa, ndzaɓa zuraʼa.

²⁵ A géɗ za mbiaʼa, a géɗ za nkèshèʼa tèlè, iyam a hi te wurrai, te woyam; a pats man Zhiklè a bazl ta kumba, a gihi ngurèʼa ta mbeɗ ta.

²⁶ Te deɓaʼa skwi nhél sam kia, lèmèlèmè ara skwi nhèl sam pats. Skwi nhél sam pats ta ta mpats ngiɗè tsaraɗ, a pats staɗ a hél sam te di mʼmèn tsaraɗ; a pats man Ndo nzi pèc pècèk a da mèn mblè ndohi na, a pa na zungwa a va mpaslaʼa.

Zhiklè a ga na matakwan à Assyrie

²⁷ Na haha, nzlembaɗ Ndo nzi pèc pècèk a tsenaha dra – ndzoan man a vècè ara vogwa a slèmbèɗè mbiaʼa, a taɓatsa ma, nèʼèn nengaʼa ara vogwa man a ndi skwai,

²⁸ shèffè nengaʼa ara woyam man a hi auda a dzah, ta a daʼai, a wutè ndohi nengaʼa, a ngedas ta, dzala te ma ndohi herkeda man a bezde ta a zlawa.

²⁹ Kin da sli dimèsh ara pats ngolala, ha ndikè a ma vaɗ. Ndav kinè a da wuffè ara ndo man shingelèk a ma na, a dè a za Ndo nzi pèc pècèk, za Israel.

³⁰ Zhiklè a bèhè ara ntsi iyam mbiaʼa, a geda ri na a tsiaʼa, a ndav mbiaʼa a nèʼèn vogwa man a ndi skwai, a ndombozlor a iyam mbiaʼa a vandzal.

³¹ Assyrie a da gi zlau a sam mbèhè Zhiklè, a gi zlau man Zhiklè a ndah ta ndohi na a mènèwèɗ.

³² A géɗ mali staɗ staɗ man ta gau, a ndah ta staɗ staɗ, a tsi ganga a ganzavar a géɗèʼa, a ndah ta, a nceda ri a zhiklè a vata.

³³ Ta laɓa vogwa klèng ma, ta ngela a ta ɓica shègwa kumba, a vogwa a gi a vata. Aman Ndo nzi pèc pècèk a ftèʼa, a vècè vogwa a zlèzlèmèʼa.