Esaie 3 - Ma Zhiklè

Zhiklè a gudzeda Juda

¹ Na haha, Bi Zhiklè bi mbiaʼa a hulkoɗi te kokwar Jérusalem, te kokwar Juda, skwi man ta gso va a vna auda: ɗaf a iyam,

² ngul ndo, ndo var, ndo kita, ndo nhadka ma, ndo mpi kwa, ndo nhalaʼa,

³ tsuvomaʼa, ndo nsalaʼa, ndo ncèmma, ndo mʼmbèh skwai, ndo kilèa.

⁴ I da pa ta golahi a bi ta, ndohi nderkèzhè ta gi bi ta.

⁵ Ndohi tèlèba, ngiɗè a ga na matakwan a ngiɗè, ngiɗè a ga na matakwan a ngiɗè, mandala a mandal nengaʼa ta gi matakwan a va ta, gola a da slambaɗa na va a babgai, fali ndo a ga na ma a va a ndo mbiaʼa.

⁶ Ndo ngiɗè a gshè kramam nengaʼa te gi bab na, a gaɗa: Dawar ngaya a zhè, nda a ndo ncè nga ma! Vara ngedassaʼa haha nga va ka a ri a ka!

⁷ A pats nasa a da gaɗa na: I ndo madzaf ka ɓai. Te gi ga, dawar azɓai, movar azɓai, kin fiyè a ndo ncè kinè ma ɓai!

Juda mʼmbeɗ na

⁸ Jérusalem mʼmbeɗ na, Juda ngedas na, ko te skwi man ta gèɗèʼa, ko te skwi man ta giaʼa, ta woy Ndo nzi pèc pècèk ɓai, ta gi zlau a sam di bi nengaʼa azɓai.

⁹ Ndohi ngi massayaf ta shin ta auda. Ta gidè mali auda ara ndohi Sodome, ta ngheda ɓai. Wobau a géɗ tengaʼa man ta gedassa va ta a ri ta.

¹⁰ Va-gaɗa na ndo nzuraʼa: Mwuffè a sam ngaya! Aman nengaʼa a da ngècè skwi ntul mizlinè na.

¹¹ Va-gaɗa na ndo ambaɓiaʼa: Wuditpa! Aman nengaʼa a da ngècè skwi lèmèlèmè ara man ri nengaʼa a ngau.

¹² Ndohi ga, nderkèzhè ndo a ga ta matakwan; a ngwozi ta gi a ngul ta. Ndohi ga, ndohi ncè kinè ma ta zlakede kinè, a ta gedassa civèɗ man kin bizhè a pa.

¹³ Ndo nzi pèc pècèk a nslambaɗa a ngi kita, a zlècè aman a mbèzlè kita ndohi na.

¹⁴ Ndo nzi pèc pècèk a ga ta kita a ndohi nhalaʼa, a wud bihi ndohi na. Kinè man kin ndoko skwaʼa auda te gi lak, a kin helda skwi ndohi ntawassaʼa a ma a wuɗai.

¹⁵ Kin zler ta ndohi ga èhèmè, kin ga ta matakwan a ndohi ntawassaʼa èhèmè? Bi Zhiklè bi mbiaʼa a gaɗa.

Skwi nfi va daiahi Sion

¹⁶ Ndo nzi pèc pècèk a gaɗa: A géɗ man dalahi Sion ta fi va, ta dè a ndèngèl va, a ta cèkè di a nfi va, ta dè ceslèok-ceslèokaʼa, a dasi te sak tengaʼa a slhè,

¹⁷ Bi Zhiklè a da shèma ta gwots auda te gèɗ, a Ndo nzi pèc pècèk a da jèka ta perzlembaɗ a dala.

¹⁸ A pats nasa Bi Zhiklè a da helama ta skwi wi auda a va tèlè: skwi te sak, shèwadai, a dzadzaɓi a pa,

¹⁹ danguri zlembaɗ, dasi rai, maslaka nfi a gèɗ,

²⁰ ncèffè gèɗ, gatsatsa te sak, skwi deɓa, koloba ɓurdi, matava,

²¹ tèslrai, iyam htsan,

²² maslaka wai, gudèl, maslaka nkèldè-nkèldè, gozhèm,

²³ koturmai, maslaka man di a pi a pa cerh-cerhaʼa, sa-labai, maslaka nfi a dai.

²⁴ Modo a da zhkè te di man a ɓurdi; zhèwèd ambalai te di man a skwi deɓa; gèɗ nshèʼa te di man a gèɗ ntsaffaʼa; bho te di man a maslaka mbelaʼa; wuɗah te di man a mbambi man a dai.

²⁵ Ngurhi ngaya ta da bèzl ta a tsakwal, a ngul ndohi ngaya ta bèzl ta te var.

²⁶ Ntamagihi kokwar ta kuɗai a ta gi wobau. Ta dumda ma, skwa a te pa asaɓai.