Esaie 28 - Ma Zhiklè

Kita Zhiklè a géɗ Ephraim

¹ Wobau a géɗ mpèɗè gèɗ ndohi zom te Ephraim! Wobau a géɗ nwurzhè mɓutaʼa, man ndohi zom ta jézlè gèɗ a vna.

² Na haha gol Zhiklè a shkè, mbiaʼa, mwuɗitpa, a shkè ara vandzal a ndombozlor, ara iyam nchè-nchè mbiaʼa man a hèy va a hai, a ncurhaʼa, a ntsede ta hi a herkeda a wuɗai.

³ A mbatsaha mpèɗè gèɗ ndohi zom Ephraim a sak.

⁴ Nwurzhè mɓutaʼa man a jézlè gèɗ a vna, nte géɗèʼa, slrats te godok, a da gi a sam na ara nyi wof slakawai: ndo a rkaʼa, a nasa nasa a ngelaʼa, a ndiaʼá.

⁵ A pats nasa Ndo nzi pèc pècèk, Zhiklè bi mbiaʼa, a da ndi a skwi mpèɗè gèɗ mbelaʼa, a shèwadai man a si dai, a sam njèkèɗi ndohi na.

⁶ A ndi a mèzhèɓ kita a ndo man a bèzlè kita, a ndi a wuɗi ngul ndohai man ta dzam ta ndohi var auda a ntamagi kokwar.

Ndohi mvi skwi a Zhiklè, ndohi nhadka ma Zhiklè, ta gedassa

⁷ Aman ko tenga haha ta dè dzaw-dzawaʼa ara ndohi zom, man zom a keɗ ta: ndohi mvi skwi a Zhiklè a ndohi nhadka ma, ta dè dzaw-dzawaʼa te ri zom, barassa a dzakaɓama ta gèɗ. Aman ta hodko ma, ta gèɗè zlakzlakaʼa. Aman ta bèzl kita, ta bèzlè tsarayaʼa azɓai.

⁸ A sam skwi nʼndai, sam man ta vinèhè skwi a pa ɓi ba, azɓai.

⁹ Nda ngatsa na may a a wa? Nda senda na wa? A wudahi wa man ta jèkeda ncèɗè wa ɗè?

¹⁰ I senda ta ‘dè, dè, dè, dè, ɗè? Ma, ma, ma, ma, ɗè? Ba, ba, ba, ba,’ ɗè?

¹¹ A vava Zhiklè a da bezda na ma nengaʼa a ma nukom-ndo, a da gaɗa ta ndohi haha a daʼai kokwar tsaɗ.

¹² Nengaʼa man a gaɗa ta: Na haha nshèk va! Va-va na nshèk va a ndo man ntulè a keɗaʼa, nasa man a pra na ma dara va. Aman ta woy a ta cinè ɓai.

¹³ Gar haha Ndo nzi pèc pècèk a da gaɗa ta ndohi aranta: dè, dè, dè – ma, ma, ma – ba, ba, ba – a ta dè a ta tèngèlè a deɓa, a ta pasl ta, skwi a slawama ta sak, a dzaw ta.

¹⁴ Gar haha, va-tsena ma Ndo nzi pèc pècèk, kinè ndohi ngwossaha Zhiklè, man kin kwor ta ndohi te kokwar Jerusalem!

¹⁵ Kin gaɗa: ngaderzla ma a mʼmetsai, nga gaɗda ma a hai a sam mʼmetsai. Iyam man a hi tsuvoɗoh-tusvoɗohaʼa a ndikè nga a va azɓai. Sam man nga nghe-da va a hwaɗaʼa, ncèkèlma. Nʼngwèdè ndo, sam man nga ngheda va nga a diaʼa.

¹⁶ A géɗ nengaʼa Zhiklè Ndo nzi pèc pècèk a gaɗa: Na haha, i tilda kwa a Sion, géɗ kwa, verzi kwa mbelaʼa. Ndo man a nco nengaʼa a ndav, skwa a tsama na sak azɓai.

¹⁷ Ma nzuraʼa, skwi man i livè a vna. Ngi-zuraʼa, skwi man i ɗèl gi a vna. Vandzal a da gédèshè sam nʼnghédè va te ncèkèlma aussa, a iyam a ceda sam kinè nlèaʼa a ma.

¹⁸ Nderzlè-ma kinè man kin mbeɗaʼa a gi dzavai, a ndikè a pa azɓai. Aman iyam a hi tsuvoɗoh-tsuvoɗohaʼa, a hel kinè a ma.

¹⁹ A mhi na, a hil kinè a ma, ko pats, ko vaɗ. Aman verzi skwi haha nʼngreda tʼuda ma, ta gi zlau genè.

²⁰ Sam mʼmènè a slra ɓai, aman ndo a plèh va a pa. Ɓorkwa a shélè a va ɓai, kumba nkèpaʼa.

²¹ Aman Ndo nzi pèc pècèk a da slèmbèɗè, ara man a gu a za Peratsim. A tsi iyam ngiɗ-giɗ-giɗèʼa ara man a gu te slrats Gabaon. A gedassa skwi man a gau; ngédèshè skwi nengaʼa haha mè? A rufa mizlinè nengaʼa; maya nengaʼa mè?

²² Anai kin ngwossaha ɓai, a skwi ndzaw kinè a gi holholaʼa azɓai! Ma ngédèshè, a ndzoan a géɗ herkeda tèlèba, ntsenahayè a sam Bi Zhiklè bi mbiaʼa.

Tsaval-ma ndo mpizhè

²³ Va-fu zlembaɗ, va-tsena daʼai ga! Va-gu maya, va-tsena ma ga!

²⁴ Ndo mbezlai man a woya a nzlekai, ndèl na a mbezli genè ɗè? Ndo man a pizhè gi dau, ndèl na a mpizhè genè ɗè?

²⁵ Ar haha ka ɓi ɗè: Aman a mbezla ma, a wush mbertak, a gogom, a zleki dau a dia, a vanda, a ntèuda a pa a mtwoz.

²⁶ Skwi man ta sun ngi aranta, Zhiklè a ngra ta, a nsenda ta.

²⁷ Ta tésh gogom a mtwoz a mbelau azɓai; ta téshè a rai.

²⁸ Ta shidè vanda azɓai; ta hèslèʼa, vova a bizhè a deɓ vanda lèk lèk azɓai; ta kérɗèʼa azɓai.

²⁹ Skwi haha ba a nshkè te Zhiklè bi mbiaʼa. Skwi man nengaʼa a mhuro, skwi mbelaʼa. Maya nengaʼa mbiaʼa.