Esaie 27 - Ma Zhiklè

Kita Zhiklè

¹ A pats nasa Ndo nzi pèc pècèk a dè a kéɗè léviathan, zhüzhok man a mwuc na; léviathan, zhüzhok nluwaɗ-luwaɗaʼa; a kéɗèʼa a tsakwal nengaʼa mwuɗitpa, mbiaʼa, nshfaʼa, a keɗa skwi nara kedam te woyam mbiaʼa.

² A pats nasa, ta da sli dimèsh a géɗ gi wof barassa mbelaʼa:

³ Iyè Ndo nzi pèc pècèk, i ɓerèʼa, i ɓala na iyam, i ɓala na iyam, i wara na dai a pats a vaɗ, skwi ngiɗè da ga na ɓai.

⁴ Man vatak a nkuɗdzarai a fcè, i gi ndav azɓai, i gi wuɗi a vna, i fa na vog-wa.

⁵ Man ta woy a i takaha ta, sèi ta tsi gumi a iyè kla, a nga tsi gumi a tengaʼa.

⁶ A pats man a di a shkè, Jacob a da tsi zluzlor, Israel a da fcè, a wurzhè, a nyi nengaʼa a ndha herkeda tèlèba.

⁷ Ndo nzi pèc pècèk a ntsau Israel lèmèlèmè ara man a ntsau ndo ntse Israel ɗè? Ta bazla lèmèlèmè ara ndohi mbazl ta ɗè?

⁸ A versl ma a nengaʼa aranta: a nkwolaʼa, a ndzawaʼa, a ndzaraʼa ara kozlar mbiaʼa man a nslambaɗa te verzi gai.

⁹ Mali Jacob mpela a vna, mali nengaʼa mpraʼa arante: a da kerɗa kwa mblom ara dadangwos; kwa nzlatseda azɓai, ta slèmbèɗdè vri azɓai.

¹⁰ Kokwar mbiaʼa a nza, ndohi ta jèkeda, ndo a te pa ɓai, nʼnza a pa ara hèshèkèɗ. Kra zlè a da ndi mandi te pa, a mènè a pa, a ndeda vah ntustusaʼa tèlèba a ma.

¹¹ Aman ntsatseriaʼa ngwora, ta pasledaussa. Ngwozi ta shkè a ta fa na vogwa. Aman ndohi haha ta tsena gèɗ ɓai, gar haha ta si Ndo nzi pèc pècèk man a ge ta, te va azɓai, Zhiklè nʼnge ta a va ta pombi azɓai.

Zhiklè a ɓicka ta ndohi Israel a deɓa

¹² A pats nasa Ndo nzi pèc pècèk a da kizlè dau, a hinè te woyam Euphrate, ha ndè a woyam Egypte. Ta da par kinè tʼhai, staɗ staɗ, kinè ndohi Israel.

¹³ A pats nasa ta da tsi tolom mbiaʼa, a ndohi man ta zlak ta te kokwar Assyrie, man ta dzam ta a kokwar Egypte, ta da shkè a deɓa a ngwai, a ta kèlèhi a deɓ sak Ndo nzi pèc pècèk, a géɗ za nkezlaʼa te Jérusalem.