Esaie 26 - Ma Zhiklè

Jérusalem, kokwar gumai

¹ A pats nasa ndohi kokwar Juda ta da sli dimèsh haha: Nga ngots kokwar mbiaʼa nʼngala te pa ndadeɓa cèw, a nga nzi ɓarɓararaʼa.

² Va-wina ntamagai, a ndohi nzuraʼa ta dè a pa, man ta lèɓèslè a ma ma.

³ Ndo man a mʼmana ndav na kangaʼa, a nzi a gumai, a géɗ man a pi ndav a ka.

⁴ Va-pu ndav kinè pèc pècèk a Zhiklè! Aman Ndo nzi pèc pècèk, nengaʼa sam ngedeng-gedengaʼa a mèdèp.

⁵ Halau, a tsede ta ndohi nte géɗèʼa a herkeda. Kokwar falawaʼa nte géɗèʼa a mʼmbeɗdahai. A mʼmbeddahi a herkeda vènènèhnèhèʼa,

⁶ a sak a mbècè a pa; sak mbelawahai, sak ndohi man wuɗi ta azɓai.

⁷ Civèɗ ndo nzuraʼa, civèɗ nlèmda fèhèʼa. Civèɗ ndo nzuraʼa, ka nlèmdèʼa.

⁸ Ko a civèɗ kita ngaya, nga zhèr ka, Ndo nzi pèc pècèk. Ndav ga a woya a shid gèɗ, a slebarde ka.

⁹ Ndav ga a woy ka a vaɗ; mpataka ngaya a keɗyè; aman kita ngaya a shkè a géɗ herkeda, ndohi a géɗ herkeda ta slebi ngi-zuraʼa.

¹⁰ Aman ndo nderɗe Zhiklè a nʼngatsa; pombi ɓai, a nslebau ngi-zuraʼa ɓai. A gi malai tʼherkeda man ta gi skwi zuraʼa a pa, a sun a ngaɗa Zhiklè mbia ɓai.

Nckondohi ta slèmbèɗè

¹¹ Ndo nzi pèc pècèk, wuɗi ri ngaya a zhè, aman ta rka ɓai. Sèi ta da rka pats ngiɗè, a ta ngècè hori a dai. Srak a géɗ ndohi ngaya, a vogwa a géɗ mayamhi ngaya, sèi da nde ta a ma.

¹² Ndo nzi pèc pècèk, ka da va nga gumai. Skwi tèlè man nga giaʼa, ka rufaʼa.

¹³ Ndo nzi pèc pècèk, Zhiklè nga, bihi ngiɗè ta gi bi a géɗ nga. Nga sen ka staɗgenè, nga slébèrdè nzlembaɗ ngaya.

¹⁴ Ndohi mʼmetsaʼa ta ngècè nshèffè te deɓaʼa asaɓai. Mèzhèɓ man pats a geda a herkeda, a slèmbèɗè azɓai, a géɗ nengaʼa ka ga ta ndzoan, ka ga ta matakwan, ka gedas ta, ko ndo staɗ a hér ta te deɓaʼa asaɓai.

¹⁵ Ka gu a ndohi ta zlèzlèmè, Ndo nzi pèc pècèk! Ka gu a ndohi ta zlèzlèmè, ka ngreda nʼnjèl ngaya, a ka herdaha kuma kokwar a deɓa.

¹⁶ Ndo nzi pèc pècèk, te va matakwan ta woy ka. Aman ndzoan ngaya a nʼngats ta, ta kuɗai.

¹⁷ Ara ngwoz man pats nyi kra nengaʼa a mshkè a zhümdè va, a kuɗi te ndish va, Ndo nzi pèc pècèk, ko nga, nga gu arsa a sam ngaya.

¹⁸ Nga a hwaɗ, nga zhümdè va, nya ma, kra ka ɓai, kozlar ambalai. Nga mbela kokwar ɓai, nga yau ndohi kokwar te pa ɓai.

¹⁹ Ndohi ngaya mʼmetsaʼa ta da nzi a nshèffè, nckondohi ngaya ta da slèmbèɗè, ndohi te va mberfenèk ta da piɗèkwe ta a ta wuffè. Minmèn ngaya a tèsl sam, a herkeda a da vi mèzhèɓ zaʼa.

Kita a di a shkè

²⁰ Ndohi ga, vo-do a gi kinè, va-pizlè ntamagi te deɓ kinè, va-ngheda va kètè, ha ndzoan a ndev na.

²¹ Na haha Ndo nzi pèc pècèk a nslambaɗkaɗa a sam nʼnzi nengaʼa ma, a nʼnga ta kita a ndohi herkeda. Te deɓaʼa herkeda a ngrédè pombaz ndohi mbazlaʼa auda, a nghédè asaɓai.