Esaie 25 - Ma Zhiklè

Dimèsh nshid gèɗ

¹ Ndo nzi pèc pècèk, ka Zhiklè ga! I woya a i nzal ka, i woya a i slébèrdè nzlembaɗ ngaya. Ka gu nrkedai. Skwi man ka hur daga zlèzlèa, skwi nzuraʼa a vava.

² Ka ndeda kokwar a kwazlazlam, ka mbeɗda zlazlar kokwar, a gi bihai, aussa. Ndohi nsawalkaɗa a gèɗ ta nza a dala a ta rèm kokwar te deɓaʼa asaɓai.

³ A géɗ nengaʼa ndohi herkeda ngiɗè, kokwar man wuɗi ta a zhè, ta slebarde ka. Kokwar ndohi herkeda man ta gi shèwa, ta gi zlau ngaya.

⁴ Te va nasa ka sam nlèaʼa man a ndohi man wuɗi ta azɓai; sam man mbelaw ndohai ta nghédè va te nlèyè ta; sam man ta nzi a hwaɗaʼa a pats man iyam a gai; sam mèzhèɓ man pats kumba: Aman ndohi ta vèɗ htsan, nara iyam man a vèckaɗa a viaʼa,

⁵ ara vazaza begedza a herkeda nsulaʼa. Ka keɗa gèɗ a nhèzlèwè ndohi nsawalkaɗa a gèɗ, ara vanai man a keɗaha gèɗ pats man a da na dai. Ka va ta civèɗ a ndohi shèwa a ta tsi sabi azɓai.

Zhiklè a wara ta di a ndohai

⁶ Zhiklè bi mbiaʼa a da tila ta movar a ndohi herkeda tèlèba a géɗ za haha, skwi nʼndi ngraʼa, barassa nva a gai, skwi nʼndi laɓdekdekaʼa, barassa nva a gai, nɗizhèʼa.

⁷ A da cèma ta skwi ndèma ta dai a ndohi herkeda auda a dai a géɗ za haha, a cèma ta maslaka man a pizlè ta ndohi herkeda a pa, auda.

⁸ A da gedas-seda mʼmetsi aussa a mèdèp. Bi Zhiklè a da saha ta kuda auda a di a ndohi na, a cè hori auda a di tengaʼa, a di a herkeda tèlèba. Aman Ndo nzi pèc pècèk a ngoɗa.

Zhiklè a mbel ta

⁹ A pats nasa ta da gèɗèʼa: Na haha Zhiklè nga, man nga pu ndav a vna, man a mbel nga. Nasa Zhiklè mao nga pu ndav a vna! Ngo-wuffokoya, ngo-gokoy langlangaʼa, a géɗ man a mbel nga.

¹⁰ Aman mpshè ma Ndo nzi pèc pècèk a da nzi a géɗ za haha. Ndohi Moab, Ndo nzi pèc pècèk a da mbatsaha ta a sak a sam nʼnzi ta, ara man ta gècè wujèɗ a kuza te diaʼa.

¹¹ Aman ta da pelaha ri ta, ara ndo man a tsi madandav, a manda ta ri a hai, a ta slaha ta slèmbèɗè azɓai.

¹² Zlazlar tengaʼa ngurèʼa, ndakmaʼa, a mʼmbeɗdahai, a ndumdahai, a ndedahai tohtohaʼa.