Esaie 24 - Ma Zhiklè

Kita Zhiklè a géɗ herkeda

¹ Na haha Ndo nzi pèc pècèk a kslahda skwi aussa a géɗ herkeda, a gedassaʼa, a ngwoda herkeda a hwaɗaʼa, a ksar ta ndohi a géɗ herkeda.

² Ndo mvi skwi a Zhiklè a da gi lèmèlèmè ara ndo kokwar ambalai; babgi lèmèlèmè ara ɓèlè; ngwoz nfi dam a mizlinè lèmèlèmè ara dem ngi mizlinè; ndo mprè skwai lèmèlèmè ara ndo nshum skwai; ndo mvi skwi a slembelom lèmèlèmè ara ndo ncè skwi a slembelom; ndo mvi skwi a dua lèmèlèmè ara ndo ncè skwi a dua.

³ Herkeda nkslahdaussa, herkeda mʼmbatseda pa. Ndo nzi pèc pècèk a ngoda.

⁴ Herkeda a woy iyam, skwi nengaʼa a ngwor na. Géɗ herkeda a giɗfèk ta gedas ta cèw ba,

⁵ a géɗ man ndohi ta derɗe kokwar ta, ta tawaɗaha ma kita, ta dzadzara ma nkwèr ta ɓai, ta pra nderzlèma ta, man ta derzla a mèdèp.

⁶ Gar haha ma mphömdè herkeda a gedassa herkeda, a ndohi herkeda ta pil gèɗ mali ta. Vogwa a ndi ndohi herkeda a ma, njèkè kèshkata genè.

⁷ Zom a gi wusswussaʼa te gai, wof te gi lak mɓüt na, ndohi man te va nasa ta wuffè, ta shèkèt ta.

⁸ Ntsi ganga klèng, nhèzlèwè hudok klèng, ntsi ganzavar klèng.

⁹ Ta sli dimèsh te gi zom asaɓai, zom a mwuc na, a ndohi zom ta woy a ta sia ɓai.

¹⁰ Kokwar, sam ngedassaʼa, civèɗ ndè a gi asaɓai.

¹¹ Wobau a civèɗ, a géɗ zom haha. Mwuffè klèng, nhèzlèwè mwuffè nze na a géɗ herkeda.

¹² Kokwar, sam ngedassaʼa genè; ntamagi kokwar mʼmbeɗ na.

¹³ A da gi a géɗ herkeda, a sam ndohi herkeda, ara man ta kèldè ny i wof, ara man ta tsa dau klèng ma, a ta pèr iyamaʼa tʼhai.

¹⁴ Tengaʼa ta wuffè a ta sli dimèsh. Ta njèl Ndo nzi pèc pècèk a ma woyam mbiaʼa:

¹⁵ Gar haha vo-slubordo Ndo nzi pèc pècèk a géɗ herkeda te civèɗ mvèng pats, vo-slubordo nzlembaɗ Ndo nzi pèc pècèk, Zhiklè Israel, a géɗ herkeda nte ndev iyam!

¹⁶ Nga tsena dimèsh te man a verzi gai: Nʼnjèlè a sam ndo nzuraʼa! A i gaɗa: Wobayè, wobayè! Ndohi metsar ta gi metsar, metsar man ta gia holholaʼa!

¹⁷ Zlau, vèvèɗ, skwi nslawama kinè sak a guv kinè, ndohi herkeda!

¹⁸ Ndo man a hi auda a sam wobau, a kèlèhi a vèvèɗ; ndo man a shkè auda te vèvèɗ, teɓa a slawama na sak. Nvakavar te géɗèʼa mwinèʼa, verzi herkeda a gudzai.

¹⁹ Herkeda a cizl na, a mbéɗ na, a pèsl na, a wurc na, herkeda a gudzai gagagaʼa.

²⁰ Herkeda a gi dzaw-dzawaʼa ara ndo zom, a gi zhèw-zhèwaʼa, ara skwi mʼmana te wof. Mali a nzala na herkeda a vata, mʼmbeɗ na, a slèmbèɗè te deɓaʼa asaɓai.

²¹ A pats nasa Ndo nzi pèc pècèk a da ga ta kita a ndohi var mɓicaʼa te géɗèʼa, a bihi herkeda a géɗ herkeda.

²² A pizl ta a vèvèɗ staɗ, ara man ta pizleda ndo a dangai. A pizl ta pa, te deɓ mʼmèn kumba a nda ga ta kita.

²³ Kia a gi hori a ndo na tibèr; pats a nde na zhiklè syem. A Ndo nzi pèc pècèk a gi ɓai a géɗ za Sion, a gi ɓai te kokwar Jérusalem. A nʼnjèlè a zhè a sam di ndohi nengaʼa nhalaʼa.