Esaie 23 - Ma Zhiklè

Tyr

¹ Nhèdè ma a géɗ Tyr. Va-tsu lalau, kinè wuromhai te kokwar Tarsis! Zlazlar kokwar kinè mʼmbeɗ na! Civèɗ az a pa asaɓai. Aman ta shkè ngwi te Kittim, ntsenaha ta.

² Ndohi a ma wo-yam ta gedassa, a nda ndohi ganai te Sidon.

³ Ndohi sak kinè to do a wurom a ta sawala a géɗ iyam tsaɗ tsaɗ. Skwi man ta gi gani a vna, ta ngotsko a ma woyam Nil, ta ɓickoɗa te woyam Nil, a ta pra ta ndohi herkeda.

⁴ Sidon, gu horai! Aman woyam mbiaʼa a gaɗa: I ɗüsh va, i yakra ɓai, i gra golahi a dalahi ka ɓai.

⁵ Aman ndohi Egypte ta da cinèʼa, ta da gudzai a géɗ skwi man nʼnga na Tyr.

⁶ Vo-do a wud woyam, a kokwar Tarsis, va-tsu lalau, kinè ndohi a ma woyam!

⁷ Nasa kokwar kinè man ta wuffè te pa ɗè? Man ta gaʼa nʼnzi a zhè a vata, a ndohi ta shkè a sak dra a ta gu a kokwar ta.

⁸ Nhuro a géɗ kokwar Tarsis aranta wa? Tarsis man a kezli skwi mpèɗè gèɗ. Ndohi mprè skwai, ta bihai; ndohi ganai, ta ndohi mbibihiaʼa.

⁹ Zhiklè bi mbiaʼa a nhur aranta, aman a gédèshè nfi va herkeɗa a skwi nengaʼa mbelaʼa tèlèba, a manda ta gèɗ a hai a ndohi mbibihiaʼa tʼherkeda.

¹⁰ Dalahi Tarsis! Va-puz mpizhè, sam nhèyè wurom a ma woyam mbiaʼa klèng!

¹¹ Zhiklè a ngeda ri nengaʼa a géɗ woyam mbiaʼa, a gudzede ta kokwar-bihai. Ndo nzi pèc pècèk a ngoɗ a géɗ Canaan, man ta mbeɗda zlazlar ko-kwar nengaʼa aussa:

¹² Ka dem Sidon nsossuraʼa, ka wuffa ani asaɓai! Slambaɗa, do a kokwar Kittim! Te pa ba, ka da ngècè nshèk va azɓi genè.

¹³ Na haha kokwar ndohi Chaldee; halaʼa, nʼazɓai. Ndohi Assyrie ta ngau. Ta ramda gi ngurèʼa a pa, a kokwar mbiaʼa, a gi bihai, ta mbeɗda Tyr aussa.

¹⁴ Va-tsu lalau, kinè wuromhai te Tarsis! Aman sam-nhèyè kinè ngedas na.

¹⁵ A pats sa, Tyr a pca ta a gèɗ a ndohai, mvi 70. Te deɓ mvi 70, man bi ngiɗè mʼmena a pa, a da gi te Tyr, ara man dimèsh fali dam a gaɗa:

¹⁶ Hul dakocèr, sawala a civèɗ, fali dam man ta kwolaʼa! Gots ngècè amba, slu dimèsh a deɓaʼa, a ta woy ka zaʼa!

¹⁷ Te deɓ mvi 70, Ndo nzi pèc pècèk a da hér Tyr zaʼa, a da ngècè skwi ntul na ara fali dam. Tyr a da hèsh civèɗ ndè a kokwar-bihi a géɗ herkeda tèlèba, ara dem nhèsh baki a dala.

¹⁸ Aman skwi gani na, a skwi ntul na, ta da va na Ndo nzi pèc pècèk, ta hèyèʼa a gozhèm ta azɓai. Ndohi man ta nzi a sam di Ndo nzi pèc pècèk, ta da ngècè skwi gani ta, a ta ndi skwi a ta ngezaʼa, a ta vi maslaka mbelaʼa a va.