Esaie 22 - Ma Zhiklè

Jérusalem ndzakaɓa

¹ Nhèdè ma a géɗ slrats za Hinnom. Kin tèlèba, kin tivè a géɗ gai, nʼnga kine mè?

² Kinè ndohi kokwar man kin gi yaw-yawaʼa, kin hèzlèwè, kin wuffè kumba. Ndohi kinè man ta bazlaʼa, ta bazla a tsakwal ka ɓai, ta bazl ta a sam var ka ɓai.

³ Ndohi ncè ta ma ndohi kinè tèlèba ta hu ta, ta hu ta dra. Ndohi ngul var kinè ta par ta a ɓèlè tèlèba, ta ɓar ta a sulom ka ɓai.

⁴ A géɗ nengaʼa i gaɗa: Va-ngwodkay deɓa, a i kuɗi tsektsekaʼa, a géɗ wuɗi ndohi ga man ngedas na. Kin jkudo aman kin bidyè ɓai!

⁵ Pats man Bi Zhiklè bi mbiaʼa a mpra ta zlau a va, a nzler ta, a ndzakaɓ ta. Te slrats za Hinnom a mʼmbeɗa zlazlar, a ta tsi lalau a der za.

⁶ Ndohi Elam ta co godoma, a ta til kiki var, a ta dzawa plèsh. Kir a nkelawkodi gambar.

⁷ Slrats za kinè mbelaʼa ta ndha a kiki var, a ndohi plèsh ta zlatsa a ntamagi kokwar.

⁸ A sam ndohi Juda, skwa nʼnza ta a di asaɓai. A pats nasa kin da pi di a deɓa a gi ko-longwi var.

⁹ Kin pi di a zlazlar kokwar David man ncizlèʼa, ncizlèʼa a sam tsaɗ tsaɗ. Kin hayda iyam a hai a sam iyam te godok.

¹⁰ Kin ngra gihi kokwar Jérusalem, a kin mbeɗda gihi aussa a ntil zlazlar.

¹¹ Te ndev zlazlar, kin ndè iyam a sam man a hayda va a pa halaʼa. Aman kin pi di a ndo nʼngau azɓai, a kin rka nengaʼa ɓai man a ntilda skwi na a hi arsa daga nʼnzi a zhè.

¹² Bi Zhiklè bi mbiaʼa a mboho a pats nasa, a woya aman ta kuɗai a ta tsi lalau, atashi gèɗ atavi maslakasam kuɗa a va.

¹³ Aman ta ga arsa ɓai. Ta wuffè, ta ngwèshè, ta bazla marai a tambak, ta ndi zluèɗ, ta si zom. Ngo-dokoya, ngo-dos-sokoya! Aman angoslèm nga da bèzl nga klèng ma!

¹⁴ Aman Zhiklè bi mbiaʼa a ngaɗayè a zlembaɗ ga: A vava, mali haha i pra kinè azɓai, ha kin bèzl kinè. Zhiklè bi mbiaʼa a goɗ arsa.

Shébna

¹⁵ Bi Zhiklè bi mbiaʼa a goɗ aranta: Do a sam bi kokwar haha,

¹⁶ man ndohi ta ra na gi dzavi na a hai te za te géɗèʼa, man ta ra na vèvèɗ gi dzavi te za: Skwi ngaya haha a zhi dè, ndo ngaya a haha a zhi ɗè; a ka ri gi dzavi ngaya a haha èhèmè?

¹⁷ Na haha Ndo nzi pèc pècèk a da kalde ka hi baf kata; ka nguraʼa, a gs ka, a ku-rats ka,

¹⁸ a gudumbal ka tʼherkeda ara guya, a nda dra. Ka metsi ngaya a pa, a kiki bi ngaya nʼnzalaʼa ta da gédèsh ta te pa, ka pa na hori a di a gi bi ngaya.

¹⁹ I woya a i kaldeka ka auda, a i ngazl ka auda a sam nʼnzi ngaya.

²⁰ A pats nasa i da baha na Eliakim, ɓèl ga, kra Hilkija:

²¹ I da va na maslaka ngaya a va, i da dzawa deɓ nengaʼa a skwi deɓ ngaya, i da va na wuɗi bi ngaya a ri a nengaʼa. A nengaʼa a gi a bab ndohi Jérusalem a ndohi gi Juda.

²² I woya a i va na skwi mɓèr ntamagi man a gi David a rai. A da winèʼa, ndo ngiɗè a slaha a mpizlè te deɓaʼa ɓai. A da pizlèʼa, ndo ngiɗè a slaha a nwinè te deɓaʼa ɓai.

²³ I woya a i dizlèʼa ara sulom züdo man a wurɗè auda azɓai, a nengaʼa a gi a sam nʼnzi bi nʼnzalaʼa a ndohi gi bab na.

²⁴ Ndohi gi bab na rèdèdèʼa tèlèba ta gshè va a vna, a ndohi nte verzi na tas, a ndohi nte verzi géɗ kra baba, a kolongwi ba, a kokwi ba, a gandaf ba, a shiɗèf ba.

²⁵ Zhiklè bi mbiaʼa a gaɗa: A pats nasa sulom züdo man ta dizla a sam man a wurɗè auda azɓai, a nlüɓ na, a pèsl na, a nkal na hai, a skwi man ta gso va a vna tèlè ta wush ta hai. Aman Ndo nzi pèc pècèk a ngoda.