Esaie 21 - Ma Zhiklè

Babylone

¹ Nhèdè ma a géɗ Babylone: Te civèɗ hèshèkèɗ, a dal Négeb, ndombozlor a nslambaɗkaɗa te kokwar te dukwaɗ.

² Skwi mwuɗitpa man a da gi a ma a nrkay a dai: Ndo metsar a gi metsar, ndo ngédèshè skwai a gédèshè skwai. Ndohi Elam, vo-washkè dai! Ndohi Médie, va-ɗaha va! — I da ndevda na nlèyè na.

³ A géɗ nengaʼa a gurtsedyè te va. I dish va ara ngwoz man a yi kra. Matakwan a ndèmay zlembaɗ, a payè a dai.

⁴ Ndav ga a ndzakaɓ na, zlau a keɗyè a vèvèɗ; a sam bengbengaʼa man pèc pècèk ambahayè, a pray zlau a va.

⁵ Ta til table, ta til sam nʼnzai, ndohi ta ndi skwai a ta si skwai… Kinè bihai, va-psheda iyam a gambar!

⁶ Aman Bi Zhiklè a ngaɗayè: Do, zlatseda ndo nʼngél dai. Skwi man a da rkaʼa, da ngra ka.

⁷ Aman a da rka ndohi plèsh a ndohi kɗèh a ndohi zlugumihai, ta ɗaha cèw cèw, fu zlembaɗ ndèngaʼa!

⁸ A nengaʼa a mboho: I pu dai, Bi Zhiklè, i zlatsa a sam nʼngél dai, a pats a vaɗ; i zlatsa a i ɓer samaʼa a vaɗ tèlèba.

⁹ Na ahngata, ndohi plèsh, ta ɗaha cèw cèw! A nengaʼa a ngaɗa: Kokwar Babylone nduma ma, nduma ma, a zhiklèhi mbèh skwi tengaʼa ta bazldaussa.

¹⁰ Kinè ndohi ga, ta kizl kinè ara dau man ta kizlè tʼhedak! Ma man i tsena a sam Zhiklè bi mbiaʼa, Zhiklè Israel, i ngreda kinè ma.

Duma

¹¹ Nhodko ma a géɗ Duma. I tsena man ta bahayè te kokwar Seir: Ndo mɓer kokwar, vaɗ a pa di ɗè? Sam ntèkè? Ndo mɓer kokwar, vaɗ a pa di ɗè? Sam ntèkè?

¹² A ndo mɓer kokwar a ngaɗa: Sam prèk, aman vaɗ dai. Aman kin woy a kin jhèɗèʼa, va-menkaɗa deɓa a kin dzhodo!

Arabie

¹³ Nhèdè ma a géɗ Arabie. Ndohi zlugumihai te Dedan, va-mana a dak!

¹⁴ Kinè ndohi kokwar Théma, va-ɓala ta iyam a ndohi man iyam a dza ta! Va-va na movar a ndo man a hi na!

¹⁵ Ta hi ta a géɗ tsakwal, tsakwal man mpho tʼuda; a géɗ lèkèɗ, man sulom a deɓ lèkèɗ, a géɗ var nduzoʼa.

¹⁶ Aman Bi Zhiklè a ngaɗayè aranta: Mvi makar dai, ara mvi sojè, nʼnjèl Kédar klèng,

¹⁷ njèkèɗi ndohi lèkèɗ te kokwar Kédar cèw kata menè. Ndo nzi pèc pècèk, Zhiklè Israel, a ngodo.