Esaie 2 - Ma Zhiklè

Skwi mbel ndo a shkè te Sion

¹ Ma a gèɗ skwi man a da gi a ma, man a rka na di a Esaie, kra Amots, a gèd Juda a Jérusalem.

² A pats man a di a shkè, a da gi arsa: Za man gi Ndo nzi pèc pècèk te pa, a da nzi a gèd zahi tèlèba, a da tsoko gèɗ auda a sam zahi tèlèba. Ndohi tʼherkeda tèlèba ta da hi a pa,

³ a ndohi man verzi ta tsaɗ a vata ta dè a pa a ta gaɗa: Vo-washkè, ngo-dokoya a za Ndo nzi pèc pècèk, a gi Zhiklè Jacob, aman a da ngra nga civèɗ nengaʼa, a nga bizhè a pa. Aman ma kita a shkè te Sion, ma Ndo nzi pèc pècèk a shkète Jérusalem.

⁴ Nengaʼa a da gi kita ndohi herkeda tèlèba, a bèzlè kita a gèɗ ndohi man verzi ta tsaɗ tsaɗ. Ta da hil tsakwal ta, a ta viɗè a devar; a ta da hil su-lom ta, a ta da viɗè a gwodza. Ndohi herkeɗa ngiɗè ta da slambaɗa ta a va ndohi herkeda ngiɗè asaɓai, a ta slebi var te deɓaʼa asaɓai.

Ndohi ta mbèh skwai, ta woy skwi herkeda

⁵ Ndohi gi Jacob, vo-washkè, ngo-dokoya te va skwi nhél sam Ndo nzi pèc pècèk!

⁶ Aman ka kwola ndohi ngaya, ndohi gi Jacob; aman kokwar tengaʼa nʼndha a ndohi mpi kwa, a ndohi mʼmbèh skwi kumba, lèmèlèmè ara ndohi Philistie, a ta gi mandala a mbrokihi verzi ngiɗè.

⁷ Te kokwar tengaʼa verzhègenè a guro a zhè a vata, skwi mèshèlè tengaʼa a ndev ɓai. Plèshi kumba te kokwar ta, a kiki var a ngrè azɓai.

⁸ Kokwar tengaʼa nʼndha a skwi mbèh skwai. Ta kalahi a deɓ sak skwi man ta gau, a skwi man ta rom a ri ta.

⁹ Ndohi mbibihiaʼa ta da mèndè gèɗ a hai; a ndohi nkèshkèshèhiaʼa ta da gi huyokokoʼa holholaʼa. Ka da pra ta mali ɓai!

¹⁰ Do za, a ka ngheda va ngaya a gi za, te ri zlau Ndo nzi pèc pècèk, a sam nʼnjèl bi nengaʼa mbiaʼa.

¹¹ Ndohi nfi va ta da kèldè gèd ta a hai, ngurhi man ta grè gèd ta da mèndè gèɗ a hai. Ndo nzi pèc pècèk staɗgenè man nʼnzalaʼa a pats nasa.

Pats kita Zhiklè

¹² A pats staü, Zhiklè bi mbiaʼa a shkè a gèɗ ndohi nfi va a ndohi ngrè gèɗ, a gèɗ skwi tèlèba man a woya a ngi a skwi mbiaʼa, a manda na gèɗ a hai:

¹³ a gèɗ wof tsna te Liban, a gèɗ lakalak te Basan,

¹⁴ a géɗ za mbiaʼa a za nkèshèʼa man gèɗ tengaʼa tʼuda, tèlèba;

¹⁵ a gèɗ gi ngurèʼa tèlèba, a géɗ zlazlar ntskaʼa, ndakmaʼa tèlèba,

¹⁶ a géɗ wuromhi te Tarse tèlèba, a géɗ skwi mbelaʼa tèlèba.

¹⁷ A pats nasa ndohi nfi va ta da mèndè gèɗ a hai, ndohi ngrè gèɗ ta gi huyokokoʼa. Ndo nzi pèc pècèk staɗgenè man nʼnzalaʼa a pats nasa.

¹⁸ Vrihai, ta da ndev ta tèlèba.

¹⁹ Va-hau a gi za, va-ngheda va kinè a vèvèɗ, te ri zlau Ndo nzi pèc pècèk, a sam nʼnjèl bi nengaʼa mbiaʼa, aman a slèm-bèɗè, a gudzeda herkeda.

²⁰ A pats nasa ndohi ta da wushedè skwi mbèh skwi man ta gu a verzhègenè a guro, man ta tsi riaʼa, aussa; ta da wusheda ta a mudwa-hai a faya.

²¹ A ta da hi ta a slerɗi kwa, a slrats kwa, te ri zlau Ndo nzi pèc pècèk, a sam nʼnjèl bi nengaʼa mbiaʼa, aman a slèmbèɗè, a gudzeda herkeda.

²² Kin fu gèɗ a ndo ɓai, man a shèffè tʼhtsan gene; nengaʼa kala mè!